EZEKIEL 35
35
Edom Dantatnak
1Mah hihi Bawipa Pathian nih ka sinah a chimmi bia an si: 2A ka thawh i, “Mipa, Seir ram lei khi zoh law hi bia hi chimhnawh tuah. 3I thawh law, hihi Bawipa Pathian bia an si, tiah chim:
Maw Seir tlangram, nangmah cu
kan doh:
Na cungah ka kut ka samh lai i
pakpalawng ram ah kan ser lai.
4Na khua cu ka hrawh dih hna lai i
nangmah cu ṭiaotakmi na si lai;
Cuticun Bawipa ka si kha
na hngalh lai.
5Israel mi cu na lungchung tein
na huat zungzal hna caah,
Rawhralnak an ton ni ah le
a hmanung bik dantatnak
an hmuh ni ah
Annih cu vainam sinah na pek hna.
6Cucaah ka nun bangin ka chim,
Thisen chuahnak cu na donghnak ah
ka ser lai i
Thisen chuahnak in na sual caah
Thisen chuahnak nih cun an dawi lai.
7Seir tlangram cu ṭiaotakmi ram,
ramchiahru ah ka ser lai i
A chung i a ummi vialte, aa chawk
aa let lengmangmi hna kha
an donghnak ka phakter hna lai;
8Na tlang hna le na nelrawn hna cu
miruak in ka khahter hna lai i
Vainam nih a thahmi hna kha na tiva
chungah an tla lai.
9Nangmah cu ṭiaotakmi ram ah
a zungzal in kan ser lai i
Na khua chungah mi an um lai lo;
Cuticun Bawipa ka si kha na
hngalh lai, a ti.
10Na thawh i, Miphun pahnih hna, Judah le Israel cu an ram pahnih hna he, khika ah Bawipa ka um ko nain, keimah ta an si lai i ka co hna lai, na ti. 11Cucaah ka nun bangin ka chim, na thinhunnak le na nahchuahnak cu lehrulh na si lai i na huat hna ruangah an cungah na tuahmi kha na cungah ka tuah ve lai, tiah Bawipa nih a ti. Nannih cu bia kan ceih tik hna ah nannih nih nan ka hngalh lai; 12Bawipa ka si kha nan hngalh lai. Israel ram tlang nan thangchiat hnanak vialte i nan i thawh i, ‘Israel ram tlang hna cu ṭiaotakmi an si cang i kanmah ei awkah pek an si cang,’ nan timi kha ka theih dih ko. 13Cun keimah kong zongah khan zeirello ngaiin bia nan chim i nannih nih atu le atu nan ka thangchiat, hihi ka theih dih ko. 14Cucaah hihi Bawipa Pathian bia an si: Nangmah cu kan ṭhumh lai i vawlei cung cu a dihlak in an di a riamh tiang thetse ram ah kan ser lai. 15Ka rothil a simi Israel cungah na diriam tein na tuah bantuk khan na cungah ka tuah ve lai. Maw Seir tlangram, na ṭiao dih lai, cucu Edom vialte donghnak a si lai. Cuticun mi nih Bawipa ka si kha an hngalh lai,” a ti.
Currently Selected:
EZEKIEL 35: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
