EZEKIEL 36
36
Israel Thluachuahnak
1Cun mipa, Israel tlang hna cu chawn hna law, Israel tlang hna, Bawipa bia cu thei tuah u, ti hna. 2Bawipa Pathian bia cu hihi a si: Ral nih an i thawh i, Vei mu, zungzal in a hmunmi tlang hna cu, kanmah ta an si cang, an ti. 3Cucaah chim law, hihi Bawipa Pathian bia an si, tiah ti: Nannih Israel tlang hna, miphun dang hna nih an in tlaih hna i an in uk hna tikah nan velchum in mi nih an in rial hna i an in lamhchih hna; nan min cu bia an chimnak kip ah khan an cem chih lengmang. 4Cucaah fing hna le tlang hna le tiva hna le nelrawn hna le nan velchum i a ummi miphun dang hna nih an rok an ramh i an serhsatmi ṭiaotakmi siangpahrang inn hna le zamtakmi khua hna sinah Bawipa Pathian nih a chim tikah a bia kha ngai tuah u. 5Hihi Bawipa Pathian bia cu an si: Ka nahchuahnak mei lin chungin miphun dang hna sinah khan fiang tein ka chim cang i fiang khun in Edom kong ah khan ka chim. Zeicahtiah Edom nih khan porhlawt ruamkai ngaingai in le zeirello ngaiin ka ram kha a lak i a rok a ramh dih. 6Cucaah Israel vawlei le fing le tlang hna le tiva hna le nelrawn hna cu thawh hna law, hihi Bawipa Pathian bia cu an si, tiah chim hna: Nannih nih miphun dang vialte nihsawhnak kha nan in awk a rak herh caah ka thinhun le ka nahchuahnak in ka lungthin kha ka chim. 7Cucaah nan velchum i a ummi miphun hna cu annih nih an in nihsawh hna ruangah khan dantat an si lai, tiah kut hler in chiat ka ser cang. 8Sihmanhsehlaw nannih Israel tlang hna tu nih cun, ka mi hna kha inn i an tlun lai caan a nai cang caah nge thar nan la lai i ka mi Israel mi hna caah cun thei nan tlai lai. 9Zohhmanh u, atu cu nanmah caah ka si cang, nanmah leiah khan kaa mer lai i nannih cu thlawh nan si lai i thlaici tuh nan si lai. Nan cungah minung tampi, Israel chungkhar hna kha an ningpi in ka phun hna lai. 10Khuapi cu mi nih an umhnawh ṭhan hna lai i siangpahrang inn cu an remh hna lai. 11Nan cungah minung tampi le saṭil tampi ka phun hna lai; annih cu an karh lai i tefa tampi an ngei lai. Nannih cu hlanlio nakin tam deuh le rum deuh ah kan ser hna lai. Cuticun Bawipa ka si kha nan hngalh lai. 12Ka mi Israel mi hna cu nan lam kha ka lamhter ṭhan hna lai. Nan chungah khua an sa lai i nannih cu an covo nan si lai; an fale kha nan that ti hna lai lo, tiah a ti.
13Mah hihi Bawipa Pathian bia an si: Mi nih an i thawh i, nang cu a minung a sehmi ram le a miphun hna an fale a thahpiaktu hna ram na si, an in ti. 14Sihmanhsehlaw mi kha na seh ti hna lai lo i na miphun hna zong kha an fale na thahpiak ti hna lai lo, tiah Bawipa Pathian nih a ti. 15Miphun dang nih an in nihsawhnak kha kan theihter ti lai lo i miphun dang hna nih an in serhsatnak zong kha na ing ti lai lo. Hihi Bawipa Pathian bia hrimhrim a si.
Israel Nunnak Thar
16-17Hihi Bawipa nih ka sinah a chimmi bia an si: “Mipa, Israel mi cu anmahle an vawleite i an um ah khan an ziaza le an thil tuahnak in an vawlei cu an thurhhnawmhter; an ziaza cu a thurhnawm i ka mithmuh ah fihnung a si. 18Ram chung i thisen an chuahmi le ram cu an thurhhnawmhnak siasal hna ruangah khan annih cu ka thinhunnak ka bunghhnawh hna. 19Miphun kip sinah ka ṭhek hna i ram dangdang ah an i ṭhen dih; an ziaza le an tuahsernak nih a hlawhmi dantatnak kha an cungah ka tlunter. 20An phaknak kip miphun hna sinah khan ka min thiang kha an thurhhnawmh. Mi nih an i thawh i, Hi hna hi Bawipa mi an si, a ram in a rami an si, an ti hna. 21Sihmanhsehlaw Israel mi nih cun an phaknak miphun kip sinah khan ka min kha thurhhnawmhter hmanh hna seh law ka min thiang ruangah annih cu ka zuah hna.
22“Cucaah Israel mi cu, hihi Bawipa Pathian bia a si, tiah chim hna. Nannih Israel mi hna, hi ka tuahmi hi nanmah ruangah a si lo, nan phaknak miphun kip sin i nan thurhhnawmhtermi ka min thiang ruangah khan a si deuh. 23Cu miphun hna sin i nan thurhhnawmhter cangmi a liannganmi ka min cu ka thianter lai. Annih nih nannih chungin ka thiannak ka langhter kha an hmuh tikah, miphun hna nih cun Bawipa ka si kha an hngalh lai, tiah Bawipa Pathian nih a ti. 24Miphun hna lak khan kan chuah hna lai i ram kip khan kan pumh hna lai i nanmah vawleite ah khan kan kalpi hna lai. 25Nan cungah ti thiang kan theh hna lai i nannih an thurhhnawmhtertu hna thil vialte khan kan thianh hna lai; nan siasal biaknak thurhhnawmhnak vialte khan kan thianh dih hna lai. 26Lungthin thar kan pek hna lai i thlarau thar nan chungah ka khumh lai. Nan pum chungin lung bantukin a hakmi nan lung kha ka lak lai i titsa bantukin a nemmi lung kha kan pek hna lai. #Eze 11.19-20 27Ka thlarau cu nan chungah ka khumh lai i ka nawlbia he aa tlak in kan umter hna lai i ka phunglam zulh in nan nung lai. 28Nan pupa ka pekmi hna ram chungah nan um lai i nannih cu ka mi ah nan i cang lai i kei cu nan Pathian ah ka cang lai. 29An thurhhnawmhtertu hna thil vialte chung khan kan khamh hna lai; fangvoi cu ka kawh lai i tampi ka vuiter lai; nan cungah mangṭam ka tlunter ti lai lo. 30Thingkung kha thei tampi ka tlaiter hna lai i vawlei kha rawl tampi ka vuiter lai i mangṭam nih ningzahnak a chuahtermi kha miphun hna lakah nan ing ti lai lo. 31Nan ziaza ṭhalo le nan tuahsernak a ṭha lomi kha nan i hngal ṭhan lai i nan ṭhat lonak le fihnung nan sinak ruangah khan nanmah le nanmah nan i fih lai. 32Hi ti ka tuah hi nanmah ruangah a si lo ti kha fiang tein hngal u, tiah Bawipa Pathian nih a ti. Cucaah Israel mi hna, nan ziaza ruangah ningzak hmaichia in um tuah u,” a ti.
33Mah hihi Bawipa Pathian bia cu an si: Nannih cu nan ṭhat lonak vialte in kan thianh hna tikah khua chungah cun mi ka umter ṭhan hna lai i siangpahrang inn hna cu remh ṭhan an si lai. 34Atu i ṭiaotak a simi ram, aa chawkmi paoh hmuh awk i pakpalawng in a um komi ram hi, thlawh an si ṭhan lai. 35Mi nih an i thawh lai i hi ram ṭiaotak cangmi ram hi, Eden dum bantuk ah a cang ṭhan cang an ti lai. Hlan i a rak rawk i an rak bauh i an rak chimhmi khua, atu i ṭha tein kulh a si ṭhanmi hna chungah hin, mi khua an sa ṭhan lai. 36Nan velchum i a tangmi miphun hna nih, hrawhmi khua hna a remh ṭhan i ṭiaotakmi ram ah thlaici a cing ṭhantu cu Bawipa ka si hi an hngalh lai; Bawipa nih ka chim i ka tuah lai, tiah a ti.
37Mah hihi Bawipa Pathian bia an si: Israel mi cu hihi ka hal u, tiah ka ti rih hna lai: An pa hna cu tuu zat in ka tamter hna lai, laksawng thiang ah pekchanhmi tuu hna bantukin, puai caan i Jerusalem khua tuu hna bantuk ah ka ser hna lai. 38Cucaah a rawk cangmi an khua hna chungah cun minung a runrun in an khat lai i Bawipa ka si kha an hngalh lai, tiah a ti.
Currently Selected:
EZEKIEL 36: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
