EZEKIEL 34
34
Israel Tuukhal Deu Hna
1Mah hihi Bawipa nih ka sinah a chimmi bia an si: 2A ka thawh i, “Mipa, Israel mi tuukhal hna cu chim hna. Thawh hna law, Nannih tuukhal hna, hihi Bawipa bia an si, ti hna: Anmah zawn lawng aa ruatmi Israel mi tuukhal hna hi ka hei hua hna dah! Tuukhal nih hin tuu kha an zawn ruah awk a si hnga lo maw? 3A hnuk kha nan din, a hmul kha nan i aih i a thaumi kha nan thah hna, sihmanhsehlaw tuu kha nan cawm hna lo. 4A bami kha thazang nan pe hna lo, a zawmi kha nan hram hna lo, hma a ingmi kha an hma nan menpiak hna lo, a pingah a kalmi kha nan kirpi ṭhan hna lo i a tlaumi kha nan kawl hna lo; cucu vun chim loin annih cu zaangfahnak ngei lo le puarhrang ngaiin nan uk hna. 5Cucaah annih cu an i ṭhek dih, khaltu an ngei lo, ram sa seh awk men ah an cang. #Nam 27.17; 1Sia 22.17; Mat 9.36; Mar 6.34 6Ka tuurun cu a kenkip ah an vak, fing le tlang kip ah an kal i ram chungah khan an i ṭhek dih; ahohmanh an zei a poi lo i ahohmanh nih an kawl fawn hna lo.
7-8“Cucaah nannih tuukhal hna, Bawipa bia cu thei tuah u. Ka nun hrimhrim bangin ka chim, tiah Bawipa nih a ti: ka tuu hna cu ram sa nih a seh hna i khaltu an ngeih lo caah sahrang ah an can i ka tuukhal hna nih ka tuu kong ah an zeihmanh a poi lo i anmah zawn lawng kha an i ruah caah, 9cucaah nannih tuukhal hna, Bawipa bia hi thei tuah u. 10Hihi Bawipa bia cu an si: Tuukhal cu ka ralchanh hna i annih cu ka tuu kha ka pe hna u, tiah ka hal hna lai. Kha tuukhal hna kha ka hlawt hna lai: anmah zawn lawng i ruat in an um kho ti lai lo; ka tuu cu an kaa chung khan ka chuah hna lai i annih kha i cawmnak ah an hmang ti hna lai lo,” tiah a ti.
11Zeicahtiah hihi Bawipa Pathian bia cu an si: Atu cu keimah hrimhrim nih ka tuu kha ka zohkhenh cang hna lai i ka kawl cang hna lai. 12Tuukhal nih a pawngah a tuu an i ṭhek tikah anmah kawl awkah a kal bangin, ka tuu hna kawl awkah ka kal lai i khuachiat le khuadawm ni zongah siseh, khuazeihmanh ah i ṭhek hna ai kun, an i ṭheknak hmun paoh khan ka chuahpi hna lai. 13Miphun kip sin khan ka chuahpi hna lai, ramdang khan ka pumh hna lai i anmah vawlei te ah khan ka hruai hna lai. Israel tlang cungah khan, a tiva pawng hna le a ram a hrinnak hmun kip ah khan ka tlonter hna lai. 14Tlonnak hmun ṭha ah khan ka tlonter hna lai i an ram hninghno cu Israel tlang sang hna kha an si lai. Khika ah an i din lai, khika ram hninhnonak hmun ah khan an um lai i Israel ram tlang cungah khan ram ṭam awk tampi an hmuh lai. 15Keimah hrimhrim nih ka tuurun cu ka zulh ka khalh hna lai i keimah hrimhrim nih an kawm ah ka khumh hna lai, tiah Bawipa Pathian nih a ti. 16A tlaumi kha ka kawl hna lai, a pialmi kha ka kirpi ṭhan hna lai, hma a ingmi kha ka thlop hna lai, a zawmi kha thazang ka pek hna lai, asinain a thaumi le a ṭhawngmi kha ka hrawh hna lai. Zeicahtiah kei cu dinnak a tuahtu tuukhal ka si.
17Nannih ka tuurun hna, mah hihi nan caah Bawipa Pathian ka bia cu a si: Tuu pakhat le pakhat karlak bia kha keimah nih ka ceih lai. 18Nannih tuukawng le mehehtum hna. Ram hninghno umnak hmun i tlon cu nan i za lo maw? Zeicahdah a dang cu nan ke in nan lamh hna? Asiloah, din awk ti thiang kong zongah, zeicahdah a tangmi ti cu nan ke in nan nawiter dih? 19Nannih nih nan lamhmi le nan nawitermi kha ka tuurun nih an ei le an din a hau. 20Cucaah nan sinah Bawipa Pathian nih a chimmi bia cu hihi a si: Atu cu keimah hrimhrim nih a thaumi le a dermi tuu kha bia ka ceih hna lai. 21A bami kha nan sir le nan liang in nan en hna, nan ki in nan suk hna i nan dawi dih hna i nan ṭhio dih hna. 22Cucaah ka tuurun cu keimah nih ka khamh lai i hrawh an si ti lai lo; tuu pakhat le pakhat kha keimah nih bia ka ceih cang hna lai. 23Cun annih zohkhenhtu dingah tuukhal pakhat kha an cungah ka chiahpiak hna lai i cucu ka sal David kha a si lai; 24anih nih cun a zohkhenh hna lai i an khaltu ah a cang lai. Bawipa cu an Pathian ka si lai i ka sal David cu an bawi a si lai, tiah Bawipa nih ka chim cang. 25Annih kha rumnak pek awkah anmah he biakamnak ka tuah lai; ram chungin sahrang kha ka ṭhawl dih hna lai i saṭil tlonnak hmun ah khan lungdai tein an um lai i tu chungah khan an it lai. 26Ka tlang pawngah khan ka umter hna lai i a caan te ah ruah, thluachuahnak ruah kha ka pek hna lai. 27Ram chung thing nih khan thei an tlai lai, vawlei nih khan rawl a chuah lai i mi cu anmah le an vawlei cio ah lungdai tein khua an sa lai. An hreng kha ka khiah hna i sal i a zuartu hna kut chung khan ka chuah hna tikah Bawipa ka si kha an ka hngalh lai. 28Ramdangmi hna nih an hrawk ti hna lai lo i sahrang zong nih a seh ti hna lai lo; ahohmanh nih hnahnawh ti loin lungdai tein an um lai. 29An cinthlakmi kha ka ṭhatter hna lai i hi ram chungah hin mangṭam kha an ing ti lai lo, miphun dang hna nihsawhnak zong kha an ing ti lai lo. 30Annih nih Bawipa an Pathian, keimah cu an sinah ka um kha an hngalh lai i annih cu ka mi Israel mi an si kha an hngalh lai, tiah Bawipa Pathian nih a ti. 31Nannih cu ka tuurun, ka mi, ka cawmmi ka saṭil nan si i keimah cu nan Pathian ka si, tiah Bawipa Pathian nih a ti.
Currently Selected:
EZEKIEL 34: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
