EZEKIEL 31
31
Sidar Kung Bantuk
(Eze 17.22-24)
1Kum hleikhat kum, thla thum thla, ni khat ni ah, hi bia hi Bawipa nih a ka chimh: 2A ka thawh i, “Mipa, hi bia hi Faro le a mi vialte kha chim hna, amah cu thawh law,
Na lianhngannak ah hin zei he dah
kan tahchunh lai?
3Assiria khi zohhmanh,
Lebanon tlang i sidar thing
a rak si khah.
Aa dawhmi a nge nih khan tupi chung
thing kha a lonh hna i
An cungah khan i hlorh vengvung
in a um.
4Cerh nih an cawm i vawlei tang ti nih
an santer,
A velchum vawlei kha tiva nih
an hnawnter i
Ram chung i thingkung dang vialte
hna tiang khan
tiva tete cu an luang.
5A nge cu an tam i a ṭe cu an sau;
Zeicahtiah ti tampi nih
a phak caah a si.
6A nge ah khan van i a zuangmi
va phun kip nih bu an ser i
A nge tangah khan saram phun kip
nih an fale kha an hrin hna i
A thladem ah khan miphun ngan
vialte nih an inn kha an sak hna.
7Thingkung ngan, thingkung dawh
a si taktak ko,
Zeicahtiah a hram kha duhdim tein
ti an hmu.
8Pathian dum chung sidar thingkung
cu zeihmanh nih an lonh kho lo,
Farkung zeihmanh nih a nge kha
an tluk kho lo i
Saipres thing zeihmanh nih
cu bantuk nge cu an ngei lo;
Pathian dum chung i a ummi
thing zeihmanh nih aa dawhnak
kha an tluk kho lo. #Gen 2.9
9 Bawipa nih dawhnak kha ka pek i
Pathian dum Eden dum chung i
a ummi thing vialte nih an in
hngar dih,” tiah chim, a ka ti.
10Cucaah Bawipa bia cu hihi a si: Amah cu cu tluk sang in a ṭhan i thingkung dang hna cungah aa fon i a ṭhan pah in aa porhlawtnak kha a san chin lengmang caah, 11amah a tawngtu ding miphun hna bawi sinah cun ka pek cang; a ṭhat lonak nih a phut rup khan amah cungah cun a tuah lai. 12Thlachiat a ruat lo bikmi miphun, miphun dang nih khan an hau cang i an hlonh cang. Tlang cung kip le hor chung kip ah a nge sau pipi cu an ril liangluang ko hna i ram chung tiva vialte hna kamah khan a nge hna cu kiak reprup in an um ko. A thladem toi khan vawlei cung miphun vialte hna cu an chuak i annih nih amah cu an kaltak. 13A tlumi a luang cungah cun van i a zuangmi va vialte kha an i fu i a nge pawngah cun ram sa vialte kha an dir. 14Cucaah ti ṭha tein a hmumi thingkung vialte hna cu cu tlukin an sang bal ti lai lo i kha thingkung tluk khan thingkung dang cungah an zik a fong ti lai lo. An lak i a ṭhawng bikbik hna zong, ti ṭha tein a hmumi si ko hna hmanh seh law, ding thlerthlur in an dir kho ti lai lo, zeicahtiah an dihlak in thihnak ah chanh an si cang, vawlei tang hmun i kal awkah khiah an si cang i cuka ah cun mi vialte co ciomi kha an co ve lai i khor chungah cun an tla ve ko lai.
15Mah hihi Bawipa Pathian bia an si: Sheol i a vung kal tikah khan ti thuk cu a cungah khan kutka bangin ka khar, a tiva cu ka kham hna i ti tampi cu an car dih. Lebanon nih khan a ṭah i ram chung thing vialte hna kha an uai dih. 16Khor chungah a vung kalmi hna he Sheol ah ka vun kalpi tikah khan, a tluk thawng ah miphun hna cu ka therter hna. Hi vawlei tang hmun hi Eden dum chung thingkung vialte hna le Lebanon thingkung a ṭha bikbik hna le ti nih ṭha tein a cawmmi thingkung hna nih hnangamnak an i laknak hmun a si. 17Annih zong, amah bantukin Sheol ah cun an vung kal ve, vainam in thahmi hna sinah cun an vung kal; cun a thladem tangah a rak um tawnmi hna kha miphun kip sinah ṭhek an si. 18Eden thingkung lakah khan a zei kha dah sunparnak le lianhngannak ah nangmah bantuk a rak si hna? Ahohmanh an si lo, asinain Eden thingkung hna sinah khan tanglei vawlei ah cun kalpi na si ve ko lai; vainam in thahmi hna sinah khan na ril ve ko lai i thazang a ngei lomi mithi hna bu chungah khan na um ve ko lai. Hi nih hin a sawhmi a sullam cu Faro le a minung vialte kha an si. Mah hihi Bawipa Pathian bia hrimhrim a si.
Currently Selected:
EZEKIEL 31: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
