EZEKIEL 32
32
Izipt Ṭah Hla
1Kan saltan kum hleihnih kum, thla hleihnih thla, ni khatnak ni ah Bawipa bia cu ka sin a phan. 2A ka thawh i, “Mipa, Izipt siangpahrang Faro kha mithi hla lawh tuah law amah cu hi bangin chim:
Miphun hna chiandeih tum no,
na lo cang ai!
Nangmah cu Nail tiva i tisartlam,
A thaw a phit tik i ti a ṭhen dih i
A ke in ti a let hluahmah i
Tiva tete hna zong a nawiter dihtu
bantuk na si, a ti,” tiah a ti.
3Mah hihi Bawipa Pathian bia an si: Miphun tampi kha an i pumh tikah ka sur in kan khuh lai i a awng ah khan naa foih lai. 4Vawlei ah khan kan hlonh lai i lei car ah khan kan tengh lai. Van i a zuangmi va vialte kha na cungah ka futter hna lai i ram sa nih na sa cu an i serh lai. 5Na sa cu tlang cungah ka chiah hna lai i nelrawn cu a tholung khan ka khahter hna lai. 6Na chungin a chuakmi thi khan ram cu ka ciah lai i na thisen in tlangpar tiang hrimhrim in ka ciah lai; cun ti luannak kahcham hna cu nangmah thisen in an khat lai. 7Na ceunak kha ka hmih tikah van kha ka phenh lai i a arfi hna kha ka muihter hna lai; ni cu minmei in ka phenh lai i thlapa nih a ceunak a chuah lai lo. #Isa 13.10; Mat 24.29; Mar 13.24-25; Luk 21.25; Biat 6.12-13; 8.12 8Na cung van i ceunak a ummi hna cu ka muihter hna lai i na ram cungah muihnak ka tlunter lai. Mah hihi Bawipa Pathian bia hrimhrim a si.
9A rawkmi na ralkapbu kha miphun dang hna sinah, na hngalh bal lomi ram ah ka kalpi hna tikah mi tampi cu an lungre ka theihter hna lai. 10Nan cung i a tlungmi thil hin mi tampi kha an khuaruah ka harter hna lai; an siangpahrang hna hmaika ah ka vainam kha ka lek tikah an hmulthi a ling dih lai. Na tluk ni ah cun an cung i a tlung ding ciomi thil ruangah khan an ther lengmang ko lai. 11Zeicahtiah hihi Bawipa Pathian bia cu a si: Babilon siangpahrang vainam cu na cungah a tlung lai. 12Na ralkapbu cu an ning piin mi lak i thlachiat a ruat lo bikmi ralkap hna kut khan ka thihter hna lai. Izipt porhlawtnak cu an hrawh cikcek lai i a mi vialte cu hloh an si dih lai. 13An saṭil vialte cu tiva kamah ka thah dih hna lai. Minung ke nih siseh, saram ke nih siseh, a lam ti hna lai lo. 14Khi tikah an ti kha cang loin ka umter lai i an tiva tete hna cu chiti bangin nal ziahmah tein an luang lai. Mah hihi Bawipa Pathian bia hrimhrim a si. 15Izipt cu ka hrawh dih i ram cu a ning piin a rawh cikcek tikah, cun cuka i a ummi hna cu ka tuk hna tikah, annih nih Bawipa ka si kha an hngalh lai.
16Mah hihi mithi hla a si i miphun hna nu hna nih mithi hla bantukin an sak lai. Mithi hla bantukin, Izipt le a mi hna kha an lawh hna lai. Mah hihi Bawipa Pathian bia hrimhrim a si.
17Kum hleihnih kum thla khatnak thla, ni hleinga ni ah Bawipa bia cu ka sinah a phan. A ka thawh i,
18“Mipa, Izipt le a mi hna kha ṭah hla
lawh hna,
Nangmah le miphun hna nu hna nih
lawh hna u,
Khor chungah a vung kalmi hna he
cun tanglei vawlei ah ka vun kalpi
hna lai.
19Nangmah cu midang nakin duhdawt
deuhmi na si maw?
Vung kal law thazang a ngei lomi
mithi hna sinah khan dai tein vung
it ko, tiah vung chim,” a ka ti.
20Vainam cu timh cia in a dir ko. Amah he hmunkhat ah a kalmi le a mi vialte hna cu vainam nih a thahmi vialte hna sinah khan an thi ve lai. 21Faro le a bawmtu hna cu Sheol i ralbawi nih hi bangin a chawnh hna lai;
Thazang a ngei lomi mithi, vainam nih a thahmi hna cu an rung i an it. 22Khika ah Assiria kha a mibu vialte hna he an um ve, a mi vuimi hna cu a velchum khan an um i an dihlak in vainam in thah i a thimi an si. 23A thlan hna cu khor a thuk biknak hmun ah khan tuah an si i a mibu hna cu a velchum ah khan an vui hna, annih cu an dihlak in vainam in thahmi an si, annih cu minung mi hna ram ṭihphannak in a rak khahtertu hna kha an si. 24Khika ah khan Elam kha a um ve, a velchum ah khan a mi hna kha an vui ve hna, an dihlak in vainam in thahmi an si; annih cu thazang zeihmanh ngei loin tanglei vawlei ah khan an vung kal cang, minung ram i ṭihphannak a rak khahter tawntu hna kha atu cu khor chung i a vung kalmi hna ningzahnak kha an i hrawm ve cang. 25Thahmi hna lakah khan amah caah le a velchum in phummi a mi hna caah khan dinhnak hmun serpiak an si; an dihlak in thazang ngei lo lawngte an si dih, vainam in thahmi an si dih. Hlanlio i minung mi hna ram i ṭihphannak a rak umter tawntu hna kha atu cu khor chung i a vung kalmi hna ningzahnak kha an i hrawm cang; annih cu thahmi hna lak i hmun pakhat ah khan chiah an si cang. 26Khika ah khan Meshek le Tubal cu an mibu vialte hna he khan an um ve, an velchum ah khan an mi hna cu an vui hna, annih cu minung mi hna ram ah ṭihphannak a rak umtertu kha an si nain, thazang zeihmanh a ngei lomi le vainam in thahmi an si cang. 27Annih cu thazang ngei loin a tlumi ralkap hna, Sheol ah an hriamnam he a vung kal i an vainam cu an lu tangah aa tlinh i an phaw cu an ruh cungah aa khuh i an ralṭhat ruangah minung umnak ram kha ṭihphannak in a rak khahtertu kha an si lo maw? 28Nang Faro zong, a thimi thazang a ngei lomi hna sinah khan na ril ve lai, vainam in thahmi hna sinah khan naa din ve lai. 29Khika ah Edom zong kha a siangpahrang hna le a bawi hna he an um ve, an ral a rak ṭha hna nain vainam in thahmi hna sinah khan chiah an si ve; thazang a ngei lomi mithi hna le khor chungah a vung kalmi hna sinah khan an i din ve lai. 30Khika ah Chaklei bawi hna le Sidon mi vialte hna kha an um ve, an ralṭhatnak thawngin ṭihphannak an chuahtermi vialte ruangah annih cu thahmi hna sinah khan ningzak in an vung kal ve. Vainam in thahmi hna sinah khan thazang zeihmanh ngei loin an it i khor chung i a vung kalmi hna ningzahnak kha an i hrawm.
31Faro nih khan a rak hmuh hna lai i a rak sunghmi a mi hna caah khan a hna a ngam phah lai — Faro cu a ralkap bu he vainam in thah a si, tiah Bawipa Pathian nih a ti; 32minung mi hna ram ah khan ṭihphannak a rak karhtertu rak si hmanh seh law, amah cu a mi vialte hna he, vainam in thahmi, thazang zeihmanh a ngei lomi mithi hna sinah khan dinhter a si ve ko. Mah hihi Bawipa Pathian bia hrimhrim a si.
Currently Selected:
EZEKIEL 32: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
