EZEKIEL 30
30
Izipt Ṭahnak Hla
1 Bawipa nih ka sinah a chimmi bia cu hihi an si: A ka thawh i, 2“Mipa, chim law hihi Bawipa Pathian bia a si, tiah ti:
Aize, cu ni tak cu dah!
3Cu ni cu a nai ai cang,
Bawipa ni cu a nai ai cang,
Cu ni cu khua a dawm ni, miphun
hna biaceih ni a si.
4Khi tikah Izipt cungah vainam
a tlung lai i
Kush cungah lungfahnak a um lai,
Thahmi hna cu Izipt ram chungah
an tlu lai i
An chawva vialte cu lakpiak dih
an si lai i
a hram vialte cu leh dih an si lai.
5Kush le Put le Lud,
Arab mi vialte le Libia mi vialte le
a ṭangṭimi ram vialte hna cu,
Amah he cun vainam in an thi dih lai.
6Mah hihi Bawipa bia cu an si:
Izipt a bawmmi paoh cu an tlu lai i
Izipt nih aa uanthlarmi a thazang cu
ṭhumh a si lai;
Migdol in Saien tiang vainam in mi
an thi lai.
Hihi Bawipa Pathian bia hrimhrim
a si, a ka ti.
7Ṭiaotakmi ram lakah pakpalawng bik an si lai i an khua hna cu a rawkmi khua lakah an i tel lai. 8Izipt cu mei in ka khangh i a bawmtu vialte hna cu an kiah dih tikah, keimah cu Bawipa Pathian ka si kha an hngalh lai. 9Cu caan cu a phak tikah zeihmanh poi loin a um ko rihmi Kush cu va hlauh awkah ka hmaika in zualko kha khulrang in an kal lai i Izipt caan a phak tikah cun lung retheihnak nih a tlak ve lai, atu hmanh ah hin cu caan cu a ra lio cang.
10Hihi Bawipa Pathian bia a si:
Babilon siangpahrang
Nebukhadnezzar kut in
Izipt mi bu hna cu ka donghter
hna lai.
11Miphun lak i a hrang bik,
Amah le a mi hna nih cun ram cu
an hrawh cikcek lai.
Izipt cungah cun an vainam cu
an i zuh lai i
Ram chungah cun an thahmi hna cu
an khat lai.
12Nail tivate hna cu hmun car ah
ka ser hna lai i
Izipt cu miṭhalo hna sinah
ka zuarh lai;
Ram le a chungah a ummi thil vialte
cu ramdangmi kut in ka hrawh dih
hna lai, tiah Bawipa nih ka ti.
13Mah hihi Bawipa Pathian bia cu a si:
Nof khua bawi hna le siangpahrang
hna cu an donghnak
ka phakter hna lai i
Izipt ram chungah siangpahrang pakhat
hmanh a chuak ṭhan ti lai lo.
Khi tikah khi ram chungah ṭihnak kha
ka chiah lai i
14Pathros ram cu ka hrawh lai i
Zoan khua cu mei in
ka khangh lai i
No khua cungah biaceihnak
ka tuah lai.
15Izipt ram ralhruang Sin khua cungah
ka thinhunnak ka bungh lai i
Nof khua chung minung hna cu
ka thah hna lai.
16Izipt cu mei in ka khangh lai i
Saien cu nganfahnak in
aa kual len lai;
No khua kulhnak cu baoh a si lai i
tilian cu a chungah an lut
hungmang lai.
17On khua le Pi-beseth khua tlangval
hna cu vainam in an thi lai i
Khua hrimhrim zong cu sal ah
an taang lai.
18Tahpanhes ah, Izipt seihnam
cu ka chiah tikah,
Khika ah chun ceu cu a mui lai;
Khi tikah aa uanthlarmi a ṭhawnnak
cu tei a si lai;
Minmei nih a zelh lai i a fanu hna
cu sal ah an taang lai.
19Cuticun Izipt ram cungah khan
biaceihnak ka tuah lai i
Annih nih Bawipa ka si kha
an hngalh lai.
20Kum hleikhat kum, thla khat thla, ni sarih ni i Bawipa bia ka sinah a rami cu hihi a si: 21A ka thawh i, “Mipa, Izipt siangpahrang Faro ban cu ka khiah cang. Zohhmanh, vainam a tlaih khawh ṭhannak ding caah an thlop lo i an tuam lo. 22Cucaah hihi Bawipa Pathian bia an si: Izipt siangpahrang Faro cu ka ralchanh; a kut kha a pahnih tein, a dammi he a kiakmi he khan, ka khiah hna lai i vainam cu a kut chung khan ka tlakter lai. 23Izipt mi cu miphun hna lakah ka ṭhek hna lai i ram kip ah ka ṭhio hna lai. 24Khi tikah Babilon siangpahrang cu ka ṭhawnter lai i a kut chungah ka vainam cu ka chiah lai; sihmanhsehlaw Faro ban cu ka khiah lai i a hmaiah cun hliam in a ril lai i a hrum-ai lengmang lai. 25Babilon siangpahrang cu a ban kha ka ṭhawnter lai, sihmanhsehlaw Faro ban cu a thlep lai. Babilon siangpahrang kut chungah ka vainam kha ka chiah i cu vainam cu Izipt ram cung i a lek tikah, mi nih Bawipa ka si cu an hngalh lai. 26Izipt mi cu miphun hna lakah ka ṭhek hna lai i ram kip ah ka ṭhio hna lai, cun annih nih Bawipa ka si kha an hngalh lai,” a ti.
Currently Selected:
EZEKIEL 30: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
