EZEKIEL 26
26
Tair Cung Bia
1Hi bia hi kum hleikhat kum, thla khatnak thla ni khat ni i ka sinah Bawipa nih a chimmi a bia an si. A ka thawh i, #Isa 23.1-18; Joe 3.4-8; Amo 1.9-10; Zek 9.1-4; Mat 11.21-22; Luk 10.13-14 2“Mipa, Tair nih Jerusalem cu a thawh i,
A! miphun hna kutka a simi kha
a bauh cang,
A kutka hna cu keimah leiah
an i hung;
Kei cu ka rum chin lengmang,
anih tu cu rawk relrul in
a um ko, a ti.
3Cucaah Bawipa Pathian bia cu
hihi a si:
Tair, nangmah cu kan doh,
Rili nih tilet a hun thawhter hna
bantukin
Na cungah miphun tampi kha
ka thawhter hna lai;
4Tair ralhau kha an hrawh dih hna lai i
a innsang kha an chimh dih hna lai.
A vawlei kha ka ziah dih lai i a tleu in
a tleumi lungpang ah ka ser lai.
5Sur phonak tikulh hmete ah
a cang lai;
Hi bia hi Bawipa Pathian nih ka
chim hna.
Amah cu miphun hna hranchaw ah
a cang lai i
6A fanu hna cu ramlak ah vainam in
an thi lai.
Cuticun keimah cu Bawipa ka si kha
an hngalh lai, tiah a ti.
7Bawipa Pathian bia cu hihi a si: Tair dohtu dingah hin chaklei in Babilon siangpahrang Nebukhadnezzar, siangpahrang hna siangpahrang chin kha ka ratpi lai. Rangtum hna le rangleng hna le rangcung ralkap hna le ralkapbu nganpi he a ra lai.
8Ramlak i a ummi na fanu hna cu
vainam in a thah hna lai.
Nangmah cu ralvennak buk
an sakhnawh lai i
kulhnak lungrual kha
an chonhnawh lai i phaw kha
an tianhnawh lai.
9Vampang chimhnak thingtum in
na ralhau cu a den hna lai i
A hreitlung in na innsang cu
a hau dih hna lai.
10A rangcung ralkap hna nih
an hmanmi
rang a thongthong hna nih leidip in
an in khuh dih lai i
Mi nih a pem ciami khua ah an luh
bantukin na kutka chungah
an luh tikah,
A rangtum khuarit in a rimi hna le,
A rangleng kekual hna thawng ah
cun na vampang hna cu an i hnin
dih lai.
11Khua chung lam kha a rang ke in
a naan dih hna lai i
Na mi kha vainam in a thah hna lai i
Na tung ṭhawngṭhawng kha vawlei ah
an tlu lai.
12Na chawhlawn vialte cu hranchaw
ah an cang lai,
Na thilri vialte cu an in chuh dih lai,
Na vampang cu an cim dih lai,
Na run inn nuamnuam hna cu
an tlu dih lai;
Na lung hna le na thingphel hna le
na hnawmtam vialte hna hmanh cu
rili ah hlonh an si dih lai.
13Cucaah na hla aw cu ka daihter lai i
Na tingtang thawng cu theih
an si ti lai lo. #Biat 18.22
14A tleu in a tleumi lungpi ah
kan ser lai,
Ngatlai hna nih an sur an phonak
hmun ah kan ser lai,
Zeitikhmanh ah sak ṭhan
na si ti lai lo.
Hi bia cu Bawipa nih ka chim cang.
Hihi Bawipa Pathian bia hrimhrim
a si, a ti.
15Mah hihi Bawipa Pathian nih Tair sinah a chimmi bia a si: “Na tluk thawng an theih tik le na chungah hmapumi hna cu an hrum an ai i sam an si cuahmah tikah, zeitluk in dik rilikam ram hna le tikulh hna cu an i hninh lai! 16Cun rili uktu bawi vialte hna cu an bawiṭhutdan cung khan an rung ṭum lai i an puan kha an i chiah hna lai i ṭamhmi an puan kha an i phoih hna lai. A hratmi biar kha an i kaih lai; vawlei ah an ṭhu lai i na cung i a tlungmi thil ruangah khan khuaruahhar lungmit in an um lai. #Biat 18.9-10 17Cun khi tikah hi mithi hla hi an in lawh lai:
Maw khuapi minthang,
Zeitindah na rawh dih ee, zeitindah
rili cungin phiah na si ee!
Nangmah le na chungah a ummi
vialte hna,
Nan ṭhawnnak cu rili chung i
aa chiahmi hna,
Nan ṭihnunnak ram chung i
a khahtertu hna,
Zeitindah nan rawh dih kun ee!
18Na tluk ni ah rilikam ram kha
an ther i
Na loh ni ah rili chung tikulh hna cu
an khuaruah a har.
19Zeicahtiah hihi Bawipa Pathian bia cu a si: Nangmah cu a rawkmi khua, ahohmanh an um khawh lonak khua ah kan ser i na cungah rilipi kha ka tlunter i ti nih an khuh dih tikah, 20khor thukpi chungah a kalmi hna sinah khan kan nam chih lai i hlan lio pi in a thi lengmangmi hna sinah khan kan thlak lai. Vawlei tangah, zungzal in a kingmi hmun ah cun kan umter lai, khor thukpi chung i a vung kalmi hna sinah cun kan umter ve lai. Cucaah zeitikhmanh ah na chungah mi an um ṭhan ti lai lo i a nungmi hna ram chung zongah khan naa tel ti lai lo. 21Nangmah cu ṭih a nungmi donghnak kha kan phakter lai i na um ti lai lo; mi nih an in kawl lai, sihmanhsehlaw an in hmu bal ti lai lo. Mah hihi Bawipa Pathian bia hrimhrim a si. #Biat 18.21
Currently Selected:
EZEKIEL 26: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
