EZEKIEL 1
1
LANGHNAK PAKHATNAK
(1.1—7.27)
Pathian Ṭhutdan
1Kum sawm thum kum, thla linak thla, ni nga ni ah cun, saltangmi hna sinah Khebar tiva pawngah khan ka um i van kha aa hung i Pathian langhnak kha ka hmuh hna. #Biat 19.11 2Cu thla ni nga ni ah cun, cucu Jehoiachin sal i a tan a kum nganak a si. #2Sia 24.10-16; 2Cha 36.9-10 3Khaldi mi hna ram i Khebar tiva pawngah khan Buzi fapa tlangbawi Ezekiel sinah khan Bawipa bia cu a phan; cun khika ah Bawipa kut cu a cungah khan a um.
4Khua ka hei cuan i zohhmanh, chaklei in ṭotho pakhat a rung hran kha ka hmuh; cu ṭotho sinah cun khuadawm nganpi pakhat a um i cu khuadawm cu ceunak nih a kulh i a chungah cun dar bantukin a tleumi ceunak a um. 5Cun mei chungah cun minung mui a lomi thilnung pali an um. An muisam cu hi bantuk hi an si: minung pumruang an ngei. #Biat 4.6 6Sihmanhsehlaw pakhat nih hmai pali cio an ngei i thla pali cio zong an ngei fawn. 7An ke cu a ding i an ketin cu cawfa tin bantuk an si i dar kheng bantukin an tleu. 8Cun an hrap pali i an thla toi cio ah cun minung kut kha an ngei cio. 9Cun thilnung pali hna nih cun hmai le thla an ngei cio i an thla cu pakhat le pakhat an i tawng dih. An kal tikah khan an i mer lo, hmailei ah khan an kal cio ko. 10An hmai cu, an hmailei hmai cu minung hmai an si; an pali khan an orhlei kap hmai cu chiandeih hmai an si i an pali khan an kehlei kap hmai cu cawtum hmai an si i an pali khan an hnulei hmai cu mupi hmai an si. #Eze 10.14; Biat 4.7 11Cu thilnung hna cu an thla tuah khat nih khan an hawile thla kha an tongh hna i tuah khat nih khan an pum kha an huh hna. 12Cun annih cu hmailei ah khan ding tein an kal cio ko i thlarau a kalnak lei paoh ah khan i mer lo tein an kal. 13Thilnung hna cu an mui cu meiṭil vang hiamhuam in a ummi bantuk khi an si i an lakah cun meizik khi i chawk lengmang seh law cu ko cu a lo; mei cu a ceu ngaingai i mei chung cun nimtlau an chuak. 14Cun nimtlau aa lek bantuk khin thilnung hna cu a kenkip ah an choi lengmang.
15Thilnung pali hna cu ka zoh hna lioah khan vawlei cung an pawngah khan leng kekual pakhat ka hmuh, pakhat caah kual khat cio in. #Eze 10.9-13 16Cu leng kekual an muisam le an umtuning cu hi bangin a si: an mui cu topaz lungvar bantukin a tleu; an pali cun an i lo dih i an umtuning cu leng kekual chungah khin a kual chin si hna seh law cucu an lo. 17Cun an kal tikah hin anmah le an hmai zawn cio ah khan an kal ko i an lam kha an hlen lo. 18Cun leng kekual pali hna nih cun tlang an ngei cio i tung zong an ngei dih; cun an tlang cu a velchum in mit in a khat dih. #Biat 4.8 19Cun thilnung hna kha an kal tikah leng kekual hna cu an pawngin an kal ve; cun thilnung hna kha vawlei in an thawh tikah leng kekual hna zong kha an tho ve. 20Thlarau a kalnak lei paoh ah khan an kal ve i an sinah cun leng kekual cu an tho lengmang ve; zeicahtiah thilnung hna thlarau cu leng kekual chungah khan a um. 21Cu hna cu an kal tikah hi hna zong cu an kal ve, cu hna cu an dir tikah hi hna zong cu an dir ve; cu hna cu vawlei in an thawh tikah leng kekual hna cu an sinah cun an tho ve; zeicahtiah thilnung hna thlarau cu leng kekual hna chungah cun a um.
22Thilnung hna lu cungah cun cungkhuh bantuk hi a um i thlalang bantukin a tleu i an lu cungah cun aa samh. #Biat 4.6 23Cun cu cungkhuh tangah cun an thla cu aa samh cio i pakhat le pakhat kha an i tawng, cun an thla tuah khat nih an pum kha a khuh cio hna. 24Cun an thla thawng zong kha ka theih, an kal tikah an thla thawng cu ti tampi thawng bantuk a si, Lianngan Bik khuari thawng bantuk a simi bu nganpi thawng le ralkap bu thawng bantuk a si; an dir tikah an thla kha an ṭhumh hna. #Biat 1.15; 19.6 25An thla an i thlep i an dir ah khan, an lu cung i a ummi cungkhuh cungah khan thawng pakhat a thang.
26Cun an lu cung i a ummi cungkhuh cungah cun bawiṭhutdan bantuk, safaiar lungvar, bawiṭhutdan a lomi kha a um i cu cungah cun minung pumruang a lomi pakhat a ṭhu. #Eze 10.1; Biat 4.2-3 27Cun a tai in a cunglei cu dar tleu bantuk a si i somei vaam huam in a ummi khi a lo, cun a tai in a tanglei cu mei bantuk a si i a velchum in a ceu dih. #Eze 8.2 28Ruahpi a sur ni ah khuadawm lak i chuncha a chuah bantuk khin a velchum i a ceumi cu a um.
Bawipa sunparnak a muisam cu cu bantuk cu a si. Cucu ka hmuh tikah ka bawk i aw pakhat ka theih.
Currently Selected:
EZEKIEL 1: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
