ṬAHNAK HLA 5
5
Pathian Kan Philh Hlah Tiah Thlacamnak
1Maw Bawipa, zei nih dah a kan
tlakhnawh kha philh hlah;
Run zoh law zeitluk in dah nihsawh
kan si kha run kan hmu tuah.
2Kan pale sinin kan comi ro cu
khual sinah pek an si i
Kan inn hna cu ramdangmi sinah
pek an si.
3Kannih cu pa ngei loin, ngakṭah
bantuk kan si,
Kan nule hna cu nuhmei bantuk an si.
4Kanmah ti lila kha din kan duh ah
kan cawk a hau i
Kanmah thing lila kha phaisa in
kan cawk lawngah kan
ngeih khawh.
5Hngawngkual cu kan hngawng ah
khinh kan si i a luan tuk in
hnek kan si;
Kan tha a ba nain dinh mui
kan hmu lo.
6Kannih cu rawl kha an kan pek
nakhnga a chel ah
Izipt mi hna he remnak kan tuah,
A chel ah Assiria mi hna he kan tuah.
7Kan pupa hna nih an rak sual i atu ah
an um ti lo,
Annih sualnak thilrit kha kannih nih
kan phorh.
8Sal hna cu kan uktu ah an i cang i
annih sinin a kan chuahtu
ahohmanh an um lo.
9Ni lin lakah thih le thih tiin
Kan rawl kha ramlak in
kan rak i phorh.
10Rawlṭam linhsatnak nih kan cuar cu
Somei nih a nahter bantukin a nahter.
11Zion ah nu kha tlaihhrem an si;
Judah ram khua hna ah ngaknu thiang
kha tlaihhrem an si.
12Bawi hna cu an kut in thlai an si i
upa nih upatnak an hmu lo.
13Facang rialnak ah tlangval hna cu
an ba i
An thing phor nih a neh hna caah
pa ngakchia cu an ril.
14Upa nih hauka i an biaceihnak kha
an ngol i
Tlangval nih tingtang hri kha
an pet ti lo.
15Lawmhnak nih a kan zamtak cang i
Kan lamnak hna cu ṭahnak ah
an cang cang.
16Pangpar ṭhirual cu kan lu cungin
an tla cang;
Harnak nih a kan khuh cang, misual
kan si caah.
17Hi ruangah hin kan lungthin a zaw i
Hi vialte ruangah hin kan mit
kha a mui:
18Zeicahtiah Zion Tlang cu a ṭiao i
A cungah cenghngia kha an i chawk.
19Maw Bawipa, nangmah cu zungzal in
bawi na si ko,
Na bawi ṭhutdan cu chan khat hnu
chan khat a hmun.
20-22Na kan hlawt rumro a si lo i
tah cawk loin kan cungah
na thin a hun a si lo ahcun,
Maw Bawipa, nangmah leiah
kan hruai ṭhan ko,
hlan lio kan sunparnak kha
kan pe ṭhan ko.
Currently Selected:
ṬAHNAK HLA 5: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
