PHUNGCHIMTU 8
8
1Mifim mi lawng nih thil hi zeidah
an si taktak ti kha an hngalh;
Fimnak nih cun mi hmaiah nih thlam
a lenter i an hmaichiatnak kha
a lohter.
Siangpahrang Cu A Nawl Ngai U
2Siangpahrang nih a chimmi kha tuah tuah, Pathian sinah hnawhnam in biakamnak ser hlah. 3Siangpahrang nih cun a duhmi paoh kha a tuah khawh ko, cucaah a hmaika khan va chuak zau, cu bantuk ṭihnungmi hmun ah cun va um hlah. 4Siangpahrang bia cu a sang bik a si i aho nih dah amah cu, “Zeidah na tuah?” an ti khawh lai? 5A nawlbia na ngaih chung cu harnak na tong lai lo, mifim nih cun zeitik ah dah caan kha a ṭhat ti le zeitin tuah ah dah a ṭhat ti kha a hngalh. 6Zei thil paoh hi zei caan ah dah tuah awk an si ti le zei lam in dah tuah awk an si, ti hi a um cio, sihmanhsehlaw kan hngalhmi hi a tlawm tuk hringhran. 7Zeidah a hung um lai ti kha kan hngal lo i aho nih an kan chimh lai ti zong kha kan hngal lo. 8Ahohmanh thi loin a um kho lai lo, a thih ni zong kha a thawn kho pek fawn lai lo. Raltuknak a tlun tikah cun luatnak a um lo, lihchim in kan luat kho lai lo. 9Hi vawlei cung i thil umkalning ka zoh lengmang tikah hin hi vialte hi ka hmuhmi an si: hi vawlei hi mi a cheukhat nih ṭhawnnak an ngeihnak hmun a si i a cheukhat nih an ṭang i hremnak an innak hmun a si kha ka hngalh. 10Miṭhalo hna an phum hna i an vui hna kha ka hmuh, sihmanhsehlaw thlan in kan kir leiah cun ṭhat lonak an tuahnak khua chung hrimhrim ah khan mi nih an thangṭhat len ko hna. Cucu pakpalawng a si.
11Zeicahdah mi nih ṭhat lonak kha an tuah lengmang? Ṭhat lonak an tuahmi caah khan khulrang in dantatnak an in lo caah a si. 12Misual mi nih sualnak kha voi za khat a tuah zongah a nung ṭhiamṭhiam ko. Asi, an chimmi cu ka hngalh, “Pathian na ṭih ahcun zeizong vialte a ṭha dih ko lai. 13Sihmanhsehlaw miṭhalo mi hna caah cun a ṭha dih ko lai lo, an nunnak cu thladem bantukin a liam zau ding an si i Pathian an ṭih lo caah an no tein an thi lai,” an ti. 14Sihmanhsehlaw cucu pakpalawng a si. Vawlei cung i thil umtuning hi zoh ngat u, miding mi nih pei miṭhalo mi hna nih an hmuh awk a simi dantatnak kha an in i miṭhalo mi nih miding mi hna hmuh awk a simi laksawng kha an hmuh tawn ko hi. Mah hihi pakpalawng a si, ka ti. 15Cucaah minung hi aa nuamh khawh chungin i nuam ko seh, ka ti. Zeicahtiah a nun chung i a hmuhmi nuamhnak cu ei le din le mah le mah i nuamh lawng hi a si ko i hi vawlei cung i Pathian nih nunnak a pekmi chung i rian a ṭuannak ah hin hi ceo cu pei a tuah khawhmi cu a si ko cu.
16Fim kha kaa zuam i hi vawlei cung thil umtuning hngalh kha kaa zuam paoh ah hin, chun zan in hngilh loin ka um tawn, 17sihmanhsehlaw Pathian nih a tuahmi thil cu hngalh khawh lo ṭhiamṭhiam a si peng ko, ti kha ka hngalh. Zei tluk hmanh in i zuam law na hngal bal lai lo. Mifim nih kan hngalh an ti hnga, sihmanhsehlaw an hngal lo.
Currently Selected:
PHUNGCHIMTU 8: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
