PHUNGCHIMTU 9
9
1Pathian nih zeitindah mifim mi le miding mi hna an rianṭuannak kha a uk i dawtnak an ngeihmi le huatnak an ngeihmi hmanh a uk kha saupi le fak piin ka ruat. Ka hmaiah zeidah a um ti a hngal khomi ahohmanh an um lo. 2Zeihmanh aa dang hlei lo. Miding mi le miṭhalo mi cungah, miṭha mi le michia mi cungah, mithiang mi le mithianglo mi cungah, Pathian a biami hna le a bia lomi hna cungah, a tlungmi thil cu aa khat ṭhiamṭhiam ko. Miṭha kha misual mi nakin zeihmanh ṭhathnemnak an hmu hlei lo, chiat a ser lomi kha a sermi nakin zeihmanh ṭhathnemnak an hmu hlei lo. 3Kan dihlak cungah thil pakhat a tlung ko i vawlei cung i a ummi thil vialte hna an hmaan lo tlukin ahmaan lomi thil a si ve. Mi cu an nun chung paoh ahcun an ruahnak cu ṭhat lonak le pakpalawng in a khat i hmakhatte ah an thi ko. 4Sihmanhsehlaw vawlei cung i a nung rihmi minung hna caah cun ruahchannak tlawmpal a um; uico nung cu chiandeih thi nakin a ṭha deuh. 5A nungmi nih cun kan thi lai ti kha an hngalh, sihmanhsehlaw a thimi nih cun zeihmanh an hngal lo. Annih cu laksawng hmuh ding zeihmanh an ngei ti lo, philh rumro in philh an si ko. 6Dawtnak, huatnak, duhnak an ngeihmi vialte kha anmah sinah cun a thi ve. Hi vawlei cung i a ummi thil ah hin an i tel ve bal ti lai lo.
7Va kal ko, na rawl cu va ei law vaa nuam ko, na zu cu va ding law na tha va nuam ko, na tuahmi paoh cu Pathian hnatla a si ko. 8Lunglawm le thanuam in um zungzal ko. 9Hi vawlei cungah Pathian nih nunnak an pekmi nunnak santlailo chung i na nun chung vialte hi na dawtmi nu he nuamhnak in hmang ko, pakpalawng a simi ni hna cu an dihlak in nuamhnak ah hmang ko hna, zeicahtiah cu vial cu pei harnak na inmi chungin na hmuhmi cu a si ko lai cu. 10Na tuahmi cu a ṭhat khawh chungin tuah, zeicah tiah Sheol ah cun rian siseh, ruahnak siseh, hngalhnak siseh, fimnak siseh a um ti lo i cuka cu na kalnak ding hmun cu a si.
11Vanrang tangah hin thil pakhat ka hngalhmi a um ṭhan hoi: tlik zuamnak ah hin khul a rangmi nih teinak an hmu zungzal lem lo i ralṭhami hi tuknak ah teitu an si zungzal lem lo. Mifim mi hi duhdim in an um zungzal lem lo i mifim mi hi mirum an si bal theng lo. Vanchiatnak hi mi zei cung paoh ah a tlung ko. 12Zeitik ah dah na caan a rat ve lai kha na hngal lo. Kannih cu rap nih a foihmi va bantuk le sur ah aa awhmi nga bantuk kan si. Kan i ruah lopi ah khin caan ṭhalo chungah khan kan i foih tawn ko.
Fimnak Kong
13Thil ka hmuhmi a dang a um rih, cucu fimnak hi vawlei cungah hin zeitindah ruah a si, ti tahchunhnak ṭha ngai a si: 14Khua hmete pakhat hi a rak um i a chungah mi tlawmte an rak um; siangpahrang pakhat nih a ra doh i a dum i raltuknak chuntlung ngan pipi kha a serhnawh. 15Cu khua chungah cun misifak te a simi mifim pakhat hi a um i a fimnak in khua cu a luatter khotu ding a rak si. Sihmanhsehlaw ahohmanh nih cu misifakpa cu an ruat lo. 16Kei nih cun fimnak cu ṭhawnnak nakin a ṭha deuh, ka ti, sihmanhsehlaw kha misifak pate kha ahohmanh nih a ruah in an ruat lo i a chimmi kha zei ah an rel lo. 17Mihrut mi hna an i pumhnak hmun i uktupa a au len thawng ngaih nakin mifim mi nih dai tein an chimmi bia ngaih cu a ṭha deuh. 18Ral hriamnam nakin fimnak nih tam deuh a tuah khawh, sihmanhsehlaw palhnak pakhat nih ṭhatnak tampi kha a hrawh khawh.
Currently Selected:
PHUNGCHIMTU 9: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
