PHUNGCHIMTU 7

1Min ṭha hi a sungmi zihmui nakin

a ṭha deuh;

thih ni hi hrin ni nakin

a ṭha deuh. #Phut 22.1

2Mithi ṭahnak inn i va kal khi rawl

danghnak inn i va kal nakin

a ṭha deuh;

zeicahtiah thihnak nih a kan hngah

cio ko ti hi minung nih kan

hngalh zungzal awk a si.

3Ngaihchiat hi lunglawmh nakin

a ṭha deuh,

zeicahtiah ngaihchiatnak nih cun

na hmai cu a ngaih a chiatter ko

nain na hngalhnak kha

a haarter lai.

4Mifim mi lungthin cu ngaihchiatnak

inn ah a um,

sihmanhsehlaw mihrut mi hna

lungthin cu puai tuahnak

inn ah a um.

5Mihrut mi nih na thangṭhatnak

hlasak in an sak nakin,

mifim mi nih an in sik kha a ṭha deuh.

6Mihrut cu an nih ah khin, hlingkung

mei chung i a puah ṭhukmak bantuk

khi a si, sullam zeihmanh a ngei lo.

7Mifim mi nih midang pakhatkhat

a hlen hna ahcun, mihrut bantukin

rian a ṭuan a si.

Nawhthuh nih lungthin a ṭhutter.

8Thil donghnak hi a hramthawknak

nakin a ṭha deuh;

lung a saumi hi aa porhlawmi nakin

a ṭha deuh.

9Na thin i sum khawh kha i zuam,

lungchung in mi uam peng hi

hruh a si. #Jei 1.19

10“Zeicahdah hlan lioah khan atu nak

hin thil kha a rak ṭhat deuh?”

ti hlah, cucu fimnak biahalnak

a si lo.

11Fimnak hi a sungmi ro a si, a nungmi

hna caah laksawng ṭha a si;

12Zeicahtiah fimnak nih cun tangka

tlukin lung hnangamnak a pek

khawh i hngalhnak nih ṭhatnak a pek

khawhmi cu hihi a si: hngalhnak

a ngeimi nih cun fimnak

a hmuh i fimnak nih cun

him tein a umter.

13Pathian rianṭuanmi hi va ruat tuah,

a kawiter cangmi cu aho nih dah

a dinter khawh lai?

14Ṭhat ni ah i lawm law harnak na ton ni ah hihi va ruat tuah: Pathian nih lunglawmhnak zong cu a umter i harnak zong cu a umter, hmailei ah zeidah a um lai ti bel, ahohmanh nih an hngal lo.

15Ka nun chung hi pakpalawng a si ko, sihmanhsehlaw hi chungah hin zeizong vialte ka hmuh dih; pakhat cu a ding ko nain a thi i pakhat tu cu a ṭhalo ko nain a chan a sau. 16Cucaah a ṭhat zong ṭha tuk hlah, a fim zong fim tuk hlah, zeicahdah nangmah le nangmah cu naa thah lai? 17Asinain ṭhat lo zong ṭha lo tuk fawn hlah, a hruh zong hrut tuk fawn hlah, zeicahdah na caan a tlin hlanah na thih lai? 18Mah hihi naa tlaih ahcun a ṭha, cun mah cucu thlah ti hlah; Pathian a ṭihmi na si ahcun thlua na chuak kho lai.

19Uktu pahra nih khua pakhat caah ṭhatnak an tuahmi nakin fimnak nih minung pakhat caah a tuahmi cu a tam deuh.

20Ṭhatnak a tuah zungzal i a sual bal lomi miding pakhat hmanh vawlei cungah hin an um hrimhrim lo.

21Mi nih an chimmi paoh kha biapi in va la hlah, na sinum nih chiat an serh kha na theih sual lai, 22nangmah hrim zong nih midang kha chiat voi tampi na serh hna cu na hngalh ko.

23Mah hi thil vialte hna hneksaknak caah hin ka fimnak kha ka hman. Fim hrimhrim kaa tim; sihmanhsehlaw cucu ka ti khawh leng a si. 24Zeitindah mi nih nunnak hi zeidah a si tiah an tuak khawh lai? Kan caah a thuk tuk, hngalhawk a har tuk. 25Sihmanhsehlaw hngalhnak le cawnnak ah khan ka pum kaa pe; fimnak kha hmuh awkah kaa zuam i ka biahalnak lehnak kha ka kawl; cun hruhnak a ṭhat loning le a hruhning kha hngalh awk kaa zuam. 26Thih nakin a kha deuhmi thil ka hmuhmi cu a lungthin rap le sur a si i a kut cu hreng a simi minu kha a si; Pathian duhnak a tuahmi cu amah sin cun an luat, sihmanhsehlaw misual cu a tlaih hna. 27Zohhmanh mah hihi ka hmuhmi cu a si, tiah Phungchimtu nih a ti, biahalnak lehnak ka kawlmi kha tlawmpal tete in ka hmuh lengmang. 28A dang lehnak zong kha ka kawl, sihmanhsehlaw ka hmu hna lo. Pa thong khat chungah hin a fimmi pakhat cu a um ko lai, sihmanhsehlaw nu fim ti hi cu a um bal lomi thil a si. 29Ka va hngalhmi cu mah vial hi a si ko: Pathian nih hin cun minung hi tliang tein a kan ser ko, sihmanhsehlaw kanmah le kanmah nih hin hnawk ngaiin kan i ser.

Currently Selected:

PHUNGCHIMTU 7: HCL06

Highlight

Copy