PHUNGCHIMTU 6

1Vawlei cungah hin dinlonak nganpi minung cungah tuah a si ti kha ka hmuh. 2Pathian nih mi pakhatkhat cu rumnak, upatnak le thilri kha a pek, a duhmi paohpaoh kha a pek ko. Sihmanhsehlaw cu hna cu i lawmhpi awk kha a sianh fawn ṭung lo. Midang pakhat khat tu nih khan a hun i lawmhpi ko hna. Cucu pakpalawng a si i a din zong a ding lomi thil a si. 3Mi pakhatkhat nih fa za khat a ngeih ko hnga i kum saupi a nung ko hnga, sihmanhsehlaw zei caan a nun hmanh ah lunglawmhnak kha a ngeih lo i hmaizahnak tein vuinak kha a hmuh lo ahcun, cu pa nakcun a thi cia i a chuakmi ngakchia kha a ṭha deuh. 4Ngakchia caah chuah kha zeihmanh ṭhathnemnak a um lo; muihnak chungah khan a lo i cuka ah cun philh a si ko. 5Chun ceu kha a hmu bal lo, nunnak zong hi zeidah a lawh ti kha a hngal lo, sihmanhsehlaw anih cu dinhnak tal kha a hmu — 6mi pakhatkhat cu kum thong hnih hmanh a nung ko hnga i a nun chungah nuamhnak hmu ṭung lomi a si ahcun, cu pa nakcun ngakchia kha dinhnak kha a hmu deuh. A donghnak ah cun an pahnih in hmun khat ah pei an va kal ko lai cu.

7Mi nih heh tiah rian a ṭuan cu ei awk hmuhnak ding caah a si ko, sihmanhsehlaw kaa za cang ti cu a um kho hlei lo. 8Zeitindah mifim mi cu mihrutpa nakin ṭhathnemnak a hmuh hlei? Zeitindah kan nun awk a si ti hngalh nih hin misifak cu zeidah a ṭhathnem? 9Pakpalawng a si ko, thlitu dawi bantuk ṭhiamṭhiam a si ko. Ngeihmi cungah lungawi tein um hi ngeih chin lengmang duhnak nakin a ṭha deuh.

10Thil a hung ummi paoh hi hlan piin ruah cia dih an si cang i mi nih amah nakin a ṭhawng deuhmi he bia i al cu a si kho lo ti kha kan hngalh cio. 11Sau deuh nan i al paoh ah pakpalawng a si chin lengmang i na caah zeihmanh ṭhathnemnak a um hlei lo. 12Zeitindah, ahohmanh nih a nun chung caan tawite, pakpalawng ngai a simi chungah hin zeidah ka caah a ṭha bik ti cu an hngalh khawh lai? A nunnak tham cu thladem bangin a lo zaumi pei a si ko cu. Aho nih dah a thih hnuah hin vawlei cungah zeidah a hung um lai ti kha a hngalh khawh lai?

Currently Selected:

PHUNGCHIMTU 6: HCL06

Highlight

Copy