PHUNGCHIMTU 5
5
Ruah Set Loin Biakamnak Ser Hlah
1Biaknak inn na kal ah hin i ralring. Cu ka i na va kal tikah zeidah kaa cawn khawh lai ti kha ruat deuh, cucu ahmaanmi thil le ahmaan lo mithil a thleidang kho lomi mihrut hna nih an pekchanhmi raithawinak nakin a ṭha deuh. 2Bia na chim hlanah i ruat hmasa, cun Pathian sinah hnawnam in biakamnak ser hlah. Pathian cu vancung ah a um i nang cu vawlei ah na um, cucaah a herhmi hlei in zeihmanh va chim hlah. 3Na lungre a theih deuh paoh ah mang chia na manh deuh ko lai, cu bantukin tam deuh bia na chim paoh ah hruhnak bia kha tam deuh na chim sual ko lai. 4Cucaah Pathian sin i bia kamnak na tuah tikah khulrang in cucu zul ko. Pathian nih mihrut cu zeihmanh ah a herh hna lo. Ka tuah lai tiah naa kammi kha va tuah ko. #Slm 66.13-14 5Bia i kam ṭung i tuah lo nakcun rak i kam lo lawlaw kha a ṭha deuh. 6Nangmah bia lila kha sualnak chung i an luhpitu siter hlah, Pathian tlangbawi cu, khakha ka ti duhmi a si lo, tiah chimh awk herh in um hlah, zeicah Pathian cu na cungah a thin na hunter lai? Zeicahdah na rak tuahmi cu na hrawhter lai? 7Mang cu manh len ko, cun na tuahmi rian zong cu pakpalawng si koin na chimmi bia cu tam ko hna hmanh seh law Pathian cu na ṭih ṭhiamṭhiam awk a si.
Nunnak Hi Pakpalawng Men A Si Ko
8Acozah pakhatkhat nih misifak kha an hrem hna i dinnak le an hmuh awk a simi kha an pe hna lo, ti na hmuh tikah na khuaruahhar hlah; bawi paohpaoh cu an cung i a ummi bawi cio nih khan an huhphenh hna i cu hna zong cu anmah nakin a sang chin deuhmi bawi nih khan an huhphenh chin ve hna.
9Ram pakhatkhat nih a herh tawnmi cu lo thlawhnak lei i lungthin a ngeimi siangpahrang a si.
10Tangka duhmi na si ahcun, zeitikhmanh ah kaa za cang na ti kho bal lai lo; rum a duhmi na si ahcun, na duhmi vialte kha cu na hmu kho bal lai lo. Pakpalawng a si ko. 11Na rum deuh paoh ah na cawm awk kha an tam chin lengmang ko lai i naa miakmi cu ka rum ti naa hngalh lawng kha a si ko lai. 12Rian hrang a ṭuanmi cu ei awk a zaa a ngeih caan a um lai, a ngeih lo caan zong a um lai, sihmanhsehlaw zan tal ah ṭha tein aa hngilh; sihmanhsehlaw mirum cu tampi a ngei ko nain a lungretheihnak nih khan hngilh lo in a umter.
13Mah hihi thil ṭhalo ngai a si, sihmanhsehlaw vawlei cungah hin ka hmuh cangmi a si: mi nih hin an tangka hi an herh caan caah an khon tawn, 14cun zei maw tiin rian pakhatkhat ah an hloh dih sual i an fale roh awk kha zeihmanh a tang lo. 15Hi vawlei hi kan hung luh bantukte khan kan chuahtak ṭhan lai — zeihmanh lo tein. Zeicahtiah kan tuahmi vialte hi pakhat hmanh kan i kalpi khawh ding a um lo. #Job 1.21; Slm 49.17; 1Tim 6.7 16Mah hihi thil ṭhalo ngai a si ko, kan ratning te khan kan kal ṭhan ko. Rian heh tiah kan ṭuan, thlitu tlaih kha kan i zuam, sihmanhsehlaw zeidah kan hmuh? 17Muihnak chung le ngaihchiatnak chungah hin lungrethei le thinhung le ngandam loin kan nun a herh ko.
18Hihi ka va hmuhmi thil a si. Mi nih hin a ṭha bik a tuah khawhmi cu ei i din i Pathian nih nunnak tawite a pekmi chung i a rianṭuanmi chungin a hmuhmi kha i nuamhpi hi a si ko; cucu minung kan covo cu a si ko. 19Pathian nih mi pakhat khat cu rumnak le thilri a pek i cucu a nuamhpiter hna ahcun, Pathian sinah aa lawmh awk a si ko i a ṭuanmi cu aa nuamhpi awk a si ko. Cucu Pathian laksawng pei a si cu. 20Pathian nih lunglawm tein umnak nawl kha a pek caah a nunnak zeitluk in dah a tawi kha cu, a lungre aa theihpi lai lo.
Currently Selected:
PHUNGCHIMTU 5: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
