Zakariya 14
14
Uhoraho araje kuganza
1Umusi w’Uhoraho uraje, ewe Yerusalemu, aho ubutunzi bwawe buzosahurwa bukagabanganirizwa hagati mu nzitiro zawe.
2Nzokoraniriza amahanga yose i Yerusalemu ngo bahagwanye; ico gisagara kizofatwa mpiri, amazu asahurwe, n’abagore bafatwe ku nguvu. Igice c’igisagara kizojanwa ari inyagano, ariko abasigaye ntibazokurwa mu gisagara. 3Maze Uhoraho azosohokanwa no kugwanya ayo mahanga, nk’uko agwana ku musi w’intambara. 4Kuri uwo musi ibirenge vyiwe bizohagarara ku Musozi wa Elayono, uri mu buseruko bw’i Yerusalemu, maze Umusozi wa Elayono uzosadukamwo kubiri uhereye mu buseruko ukageza mu burengero, haboneke ikiyaya kinini, igice kimwe c’uwo musozi cimuke kija mu buraruko ikindi mu bumanuko. 5Muzohungira muri ico kiyaya canje c’uwo musozi, kuko kizoshika muri Azeli. Muzohunga nk’uko mwahunze nyamugigima mu misi ya Uziya umwami w’i Buyuda. Maze Uhoraho Imana yanje azoza, ari kumwe n’abejejwe bose.
6Kuri uwo musi izuba ntirizokwaka canke ngo habe gukanya, canke umwijima. 7Uzoba ari umusi wisa, umusi uzwi n’Uhoraho wenyene, ata gutandukanya umurango n’ijoro. No mu gihe c’umugoroba umuco uzogumaho.
8Kuri uwo musi amazi y’ubugingo azotemba ava i Yerusalemu, igice kimwe kizoja mu buseruko mu Kiyaga c’Umunyu ikindi gice kije mu burengero mu Kiyaga Mediterane, mu ci no mu gihe c’imbeho nyinshi.
9 Uhoraho azoba umwami w’isi yose. Kuri uwo musi hazoba Uhoraho umwe, kandi izina ryiwe rizoba rimwe rudende.
10Igihugu cose, uhereye i Geba ugashika i Rimoni, mu bumanuko bwa Yerusalemu, kizoba nka Araba. Ariko Yerusalemu hazoshirwa hejuru cane uhereye kw’Irembo rya Benyamini ukageza mu kibanza c’Irembo rya Mbere, ukabandanya ukageza kw’Irembo ryo mu Mfuruka, ugakomeza ukava ku munara wa Hananeli ukageza ku bwato bwo kuganiramwo umuvinyu bw’i bwami. Kandi hazoguma mu kibanza caho. 11Abantu bazohaba; kandi ntihazokwongera gusamburwa. Yerusalemu hazoba umutekano.
12Iki ni co cago Uhoraho azoteza amahanga yose azotera i Yerusalemu: inyama zabo zizobora bakigendagenda, amaso yabo aborere mu bibanza vyayo, n’indimi zabo zizoborera mu kanwa kabo. 13Kuri uwo musi abantu bazoterwa ubwoba n’Uhoraho. Bazosubiranamwo bagwane. 14Yuda na we azogwanira i Yerusalemu. Ubutunzi bw’ibihugu bihakikije buzokwegeranywa; inzahabu n’ifeza vyinshi cane n’impuzu. 15Icago nk’ico kizoshika ku mafarasi n’inyumbu, ingamiya n’indogoba, n’ibindi bitungano bizoba muri ayo makambi.
16Maze abazocika kw’icumu bo mu mahanga yose yateye Yerusalemu bazoduga uko umwaka utashe gusenga Umwami, Uhoraho Mushoboravyose, no guhimbaza imisi mikuru y’insago. 17Kandi nihagira umuntu n’umwe wo muri ayo moko yo kw’isi atazoduga i Yerusalemu gusenga Umwami, Uhoraho Mushoboravyose, ntazoronka imvura. 18Abanyegiputa nibataduga ngo bifatanye n’abandi, nta mvura bazoronka. Uhoraho azobarekurirako icago azoteza amahanga ataza guhimbaza umusi mukuru w’insago. 19Ico kizoba ari igihano kuri Egiputa n’igihano ku mahanga yose atazoduga guhimbaza umusi mukuru w’insago.
20Kuri uwo musi amajambo “Yerejwe Uhoraho” azokwandikwa ku mijiginya y’amafarasi, n’inkono zo gutekamwo zo mu Ngoro y’Uhoraho zizoba nk’ibikoresho vy’imbere y’igicaniro. 21Inkono zose z’i Yerusalemu n’i Buyuda zizoba zerejwe Uhoraho Mushoboravyose, kandi abazoza gushikana ibimazi bazokwakira zimwe muri izo nkono bazitekemwo. Kandi kuri uwo musi ntihazoba Umunyakanani mu Ngoro y’Uhoraho Mushoboravyose.
Currently Selected:
Zakariya 14: BKC
Highlight
Copy
Compare
Share
Want to have your highlights saved across all your devices? Sign up or sign in
Bibiliya mu Kirundi coroshe™
Uburenganzira © 2021, 2025 bwa Biblica, Inc.
Vyakoreshejwe bitangiwe uruhusha.
Uburenganzira bwose kwʼisi yose ni ubwa Biblica.
Kirundi Contemporary Bible™
Copyright © 2021, 2025 by Biblica, Inc.
Used with permission. All rights reserved worldwide.
