Hoseya 12
12
1Efurayimu arya umuyaga;
akurikira umuyaga uturutse mu buseruko rikarinda rirenga,
akagwiza ibinyoma n’umuryano.
Yagiriraniye amasezerano na Ashuri
kandi yarungitse amavuta ya elayo muri Egiputa.
2 Uhoraho arafise ivyo yagiriza Abayuda;
azohana Yakobo ibihuye n’inzira ziwe
kandi azomwishura ibihwanye n’ibikorwa vyiwe.
3Akiri mu nda yaniganye na mukuruwe amufashe igitsintsiri;
amaze gukura naho anigana n’Imana.
4Yaniganye n’umumarayika aratsinda;
yararize asaba umuhezagiro.
Aho i Beteli, yabonye Imana imbonankubone
maze Imana ivuganira na we aho hantu.
5 Uhoraho Imana Mushoboravyose,
Uhoraho ni ryo zina ryiwe!
6Nuko rero, ubu nimugaruke ku Mana
mugumye urukundo n’uguca imanza zibereye,
maze mwame mwiteze Imana yanyu imisi yose.
7Ariko si uko biri, umudandaza akoresha iminzane ibesha
agakunda inyungu mbi.
8Efurayimu arishima ngo:
Ndatunze cane; narironkeye ubutunzi.
Nta woronka ico anyagiriza mu butunzi bwanje bwose
nk’icaha canke kugabitanya.
9Ariko, namye ndi Uhoraho Imana yawe
kuva ukiva muri Egiputa;
nzotuma usubira kuba mu mahema kandi,
nka kurya kwo mu misi mikuru yawe yashinzwe.
10Navuganye n’abavugishwa banje ndabagutumako,
ntuma berekwa vyinshi
ndakubwira mu migani myinshi ncishije muri bo.
11Mbega ab’i Gileyadi ni abanyakibi?
Abantu baho nta co bamaze!
Mbega bashikanira ibimazi vyabo i Gilugali?
Ibicaniro vyabo bizoba nk’ibirundo vy’amabuye
biri mu busize.
12Yakobo yahungiye mu gihugu ca Aramu,
Isirayeli yarakoze ngo aronke umugore,
kugira ngo amukwe yaragiye intama.
13 Uhoraho yakoresheje uwuvugishwa na we ngo adugane Isirayeli amukuye muri Egiputa,
yakoresheje uwavugishwa na we ngo abe umwungere w’abantu biwe.
14Ariko Efurayimu yamuteye uburake bw’inkazi;
Umwami wiwe azomusubiza ku mutwe amaraso yasheshe
kandi azomusubiriza mu nkoko ivyaha vyiwe.
Currently Selected:
Hoseya 12: BKC
Highlight
Copy
Compare
Share
Want to have your highlights saved across all your devices? Sign up or sign in
Bibiliya mu Kirundi coroshe™
Uburenganzira © 2021, 2025 bwa Biblica, Inc.
Vyakoreshejwe bitangiwe uruhusha.
Uburenganzira bwose kwʼisi yose ni ubwa Biblica.
Kirundi Contemporary Bible™
Copyright © 2021, 2025 by Biblica, Inc.
Used with permission. All rights reserved worldwide.
