Psalm Late 9
9
A Thutang khenna hangin Pathian tung Lungdamkona
1 Topa awng, ka thin theampo taw nang kong pok tu hi;
a lamdang na nasepnate ka son tu hi.
2Nangma hangin lungdamna taw
la ka sa tu uh hi.
Vaanglianbel Pathian awng,
na min pokna la ka sa tu hi.
3Nang nong kilaak ciangin ka ngalte
nungkin kik a amate lutu in thi uh hi.
4Nangma thumaan thutang taw thu na khen a, kei sangah nong pang hi.
5Pathian he ngawlte na puavawk zo a,
mihing seksolte na lalthamsak zo hi;
amate kiphawk kik nawn ngawl tu hi.
6Ngalte sia a tawntungin bo siat zo hi,
a khuapite na lalthamsak zo a,
amate kimangil cip zo hi.
7Ahihang Topa sia a tawntungin kumpi hi a,
ama in a thukhenna kumpi tokhum phut zo hi.
8Ama in thutang taw
leitung uk a;
ama in minamte
thukhaikim taw thukhen hi.
9Zawthawk a thuakte atu in
Topa sia bukna kip ahi hi,
ngimna hun sungah
ngammuanna mun ahi hi.
10 Topa awng, nang hong hete in
nang hong muang tu hi;
nang hong zuante
na nusia bua hi.
11Zion pan a uk Topa tungah pokna lasa vun!
Ama nasepnate minam theampo tungah son vun!
12Pathian in a ngimngate phawk a,
a kaana aw a mangil bua hi; tuaciang amate tungah a khialte daan pia hi.
13Kei hong hesuak ta'n, Topa awng!
ka ngalte tung pan ka thuaknate hong en ta'n!
thina pan hong suatak ta'n Topa awng,
14tua hi le Jerusalem mihingte mai ah ding thei a,
nangma kong pokna thute theampo ka son thei tu hi.
Nangma in kei nong hut manin ka lungdam tu hi.
15Pathian he ngawlte in amate ii taw sa dum sungah taaksuk uh hi,
a thaangsiana sungah amate awk zo hi.
16 Topa in thutang khennate taw
ama le ama hong kilaak hi,
mihing seksolte sia
amate ii a sep a vawtte taw ma in awk hi.
17Pathian a nial theampo le a seksol theampo ii
lam tawpna sia thina hi.
18A cimawte kimangil tawntung ngawl tu hi,
a zawngte lametna zongh a tawntungin kisucip ngawl tu hi.
19 Topa awng, hong pai ta'n,
mihingte in nang nalhsak heak in;
Pathian he ngawlte na mai ah samin, amate tungah thu khen in.
20 Topa awng, amate lausak in;
a thithei te ahi lel hunlam kitelsak in.
Currently Selected:
Psalm Late 9: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
