Psalm Late 10
10
Thumaan natu Thungetna
1Banghangin a khuala ah om ni ziam, Topa awng?
Ngimna ka nga uh hun sungah banghangin buu ni ziam?
2Mi seksolte in kiphasak a, mizawngte vawtsia hi,
amate ii thaangsia sungah amate ma awksak in.
3A seksol pa in ama ii a sia deinate kiphatsak pui hi,
a duhop pa in Topa haamsiat in nial hi.
4Mihing seksol pa in Topa awlmaw ngawl a,
a kiphatsakna in, Pathian thupi sim ngawl hi.
5Mi seksol pa in na theampo sungah zawna nga hi,
Pathian thukhennate tel thei ngawl hi; amate in ngalte nunau uh hi.
6Amate in, “Kei lel ngei
bua vak ing;
ngim nga ngei bua vak ing”
amate le amate kici uh hi.
7A kam uh sia haamsiatna, theamna le ngual tawnna taw kidim a;
amate in ngaimawkna le ngitlona kammalte pau memeang hi. #Rom 3:14
8Khuanote sungah amate mama buu in,
mawnei ngawl mite that tu in pang hi.
Akua cimaw ziam ci in kankuu uh a;
9tawpite bangma in
ama in a bukna pan mizawngte pang hi.
A thaang sungah amate manin kaikeak hi.
10Mat a thuak a cimawte
kisucip hi;
ngoltol thahatna in
amate zo zo hi.
11Mi seksolte in amate le amate,
“Pathian in phamaw sa ngawl hi!
Ama a mit si a, hong mu
ngeingawl tu hi,” ci hi.
12 Topa awng, mihing seksolte daan pia in!
ngim a thuakte phawk in!
13Banghangin mihing seksol pa in
Pathian sia thusim ngawlin
a thinsung ah “Daan hong pia buan te” ci thei ziam?
14Ahihang nang in a ngimna le a thuaknate na mu a,
a hu tu in na kinging tawntung hi.
A cimawte in nang tungah hong ki aap a, a kitaangsamh te na hu tawntung hi.
15Mihing seksolte le mihing ngilote ii thahatna nuaitan in;
khialna a vawt kik nawn ngawl dong daan na pia in.
16 Topa in a tawntung
a tawntungin kumpipa ahi hi;
pathian dang a biate sia
ama ii leitang tung panin mong tu hi.
17 Topa awng, mihing
a kinengniamte ii
thungetna na ngai tu hi;
amate thinletna na pia tu hi.
18Zawthawk thuakte le tangate kaana na za tu hi;
a thithei mihingte ii liinna launa a piansak nawn ngawl natu in
amate sang pangin thu na khen tu hi.
Currently Selected:
Psalm Late 10: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
