Psalm Late 27
27
Pokna Thungetna
1Topa in ka khuavak le kei hong ngumpa hi a,
kuama ka kiita buatu hi.
Topa in launa theampo panin
hong sungsia a, ka lau ngei buatu hi.
2Mihing ngilote in that tu in hong sim ciangin,
amate lutu in puk uh hi.
3Ngalkap hon buppi in
hong kiim uum hial zong ka lau buatu hi;
ka ngalte in hong sim le zong
Pathian ka muang veve tu hi.
4Topa tungah na khat ka ngen a, ka dei khat bek a om hi;
ka khan tawntung Topa inn sungah teang a,
ama ii phatna lamdang ka sak tu le lam hong laknate nget tu ahi hi.
5Ngimna hun sungah ama in hong lia tu a,
ama Biakinnpi sungah hong keamcing tu hi,
tuaciang suangpi saang tungah ngammuangin hong koi tu hi.
6Tua ahikom ka kiim a ka ngalte tungah zawna mualsua na ka nei tu hi.
Lungdamna taw au in a Biakinnpi sungah
sangaw biakpiakna ka pia tu a;
lasa in Topa ka pok tu hi.
7 Topa awng kong biapui ciang hong za ta'n!
Hong hesuak ta'n a hong zo ta'n.
8“Hong pai ta'n a hong bia ta'n” nong ci ciang,
“Hong pai tu khi hi, Topa awng,
9kei kung pan nangma le nangma hong kiseal heak in,” ci in ka zo hi.
Kei tungah hong thin uuk heak in a,
na naseampa hong nungngat heak in.
Nangma in kei hong hupa na hi ngei zo hi;
hong paisan heak in a, hong nusia heak in,
Pathian, kei hong ngumpa awng.
10Ka pa le ka nu in hong nusia thei tha tu hi,
ahihang Topa in kei hong keamcing tu hi.
11 Topa awng, nong sepsak nop thute, hong hil ta'n,
Ngal tam mama ka nei hu in,
a ngammuanhuai lampi ah lam hong pui ta'n.
12Leilot thu le tawnna taw hong ngalvawt
ka ngalte khut sungah hong nusia heak in.
13Hi nuntakna hun sung mama ah Topa phatna
mu lai tu ci in ka kihe hi.
14 Topa muang in, upna nei in, thinkiam heak in.
Topa muang in!
Currently Selected:
Psalm Late 27: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
