Psalm Late 139
139
Pathian ii A kicing Heakna le Khoina
1 Topa awng, nangma in nong sit ngiingeei zo a nong he hi.
2Nangma in ka sep ka vawt theampo na he hi;
ka ngaisutna theampo a khuala na panin na he hi.
3Na ka sep laitak ahizong, ka tawlngak laitak ahizong, nong mu hi;
ka ngamtatna theampo na he hi.
4Ka pau ma ngawngawn in
ka son tu teng na he zo hi.
5Nangma in ka kiimkot mun theampo ah na om hi;
na vaangletna taw kei nong dal hi.
6Kei nong heakna sia
thuk mama a;
kei tel zawk ahi bua hi.
7Nangma pial in koisung zuan thei tu khi ziam?
Nang omna pan koisungah ka tai thei tu ziam?
8Vantung ah paito kaleng zong tua munah na om hi;
mithi khua ah lum kaleng zong tua munah na om hi.
9Nisuana kalhin ka leang hial zong
ahibuale nitumna sang a khuala belna ah teang kaleng zong
10kei hong lampui tu in tua mun ma ah na om tu hi,
kei hong hu tu in tua mun ma ah na om tu hi.
11Khuazing ii hong sealcip natu,
tua ahibuale ka kiimkot khuavak sia
zan a suak tu in ka ngen thei hi,
12ahihang khuazing ngawngawn nang atu zing tuan ngawl a,
zan sia sun bangin a taang hi.
Khuazing le khuavak sia nang atu in kibang hi.
13Nangma in ka pumpi sungah
a om na theampo na bitphua hi;
Ka nu naubu sungah ka pumpi nong ngawmtua hi.
14Nangma kong pok hi,
banghang ziam cile
nangma in kiitak tu na hi hi;
na sep na vawt theampo tumdangin lamdang hi.
Tuasia ka thinsung theampo taw ka he hi.
15Ka ngute kipiangsak in,
ka nu naubu sungah pha takin kingawmtua a,
a thimtham in ka khanto hunin,
tua munah ka om hunlam nong he hi.
16Ka sua ma in kei nong mu zo hi.
Kei atu hong kisee sa ni le hunte
a kipat ma in na laibu sungah kiciamtee siat zo hi.
17Pathian awng, na khua ngaisutnate sia
kei tel tu bangza haksa ziam, bangzata tam ziam!
18Keima in tuate sim hi leng
senvui za sangin tamzaw tu hi.
Ka khanlaw ciang zong nangma taw ma ka omkhawm lai hi.
19Pathian awng, mihing seksolte
hong thalupsak le te ka uuk hi!
mihing ngoltolte, kei
hong nusia in tai le ka uuk hi!
20Amate in nangma taw kisai in
seksol kamte hong zangh uh hi;
na min siat thethei natu in
pau uh hi.
21 Topa awng, nang hong ngaimawte bangza in ngaimaw khi ziam!
Nang hong langpante bangza in ensan khi ziam!
22Amate sia ngaimawk tawpin ka ngaimaw hi;
amate keima ngal bangin ka nei hi.
23Kei hong sit ta'n, Pathian awng, ka thinsung hong he ta'n;
hong sittel ta'n a, ka ngaisutnate a thakin na mu in.
24Ka sungah siatna a om ziam hong mu ta'n a,
tawntung lampi ah kei lam hong pui ta'n.
Currently Selected:
Psalm Late 139: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
