Paunakte 27
27
1Zing ciang thu taw kisai in kisuangtaak khol heak vun. Tua hun le tu kilaklaw bang piang tu ziam na he bua uh hi.#Jas 4:13-16
2Midangte in poksak vun — khualmite ngawngawn in poksak vun; bangma hunin noma le noma kipok heak vun.
3Mawmawt ngamtatna pan a piang thei ngimnate sia suang le sen ii ngitna taw kisontee thei ngawl hi.
4Thin uukna sia tatkha a, lalna piangsak thei hi, ahihang ki eenna sia bangma taw kiteengat thei ngawl hi.
5Mihing khat ii a khialna hu in a kilangh in hilna pauna sia kei bangma hong awlmawk ngawl hita a, hong ci saang phazaw hi.
6Ngualtamh khat in hong nasak tha hial zong, a pha piang le a deina hi. Ahihang na ngal khat in a khut taw na liangko pan hong koai ciang — na kikeam vun!
7Na ngil a va laitakin khuaitui zongh na du buatu hi, ahihang na ngilkial laitakin, ankha khat zongh thum hi.
8A inn pan a puapial khat pawpo sia, a bu sung pan a leang vacim taw kibang hi.
9Paaknamtui le sathau namtuite in hong lungdamsak zaw a, ahihang ngimna in na thinnopna bosak hi.
10Nangma ngualtamhte ahizong na pa ngualtamhte ahizong mangil heak in. Ngim na nga le na suapuipa kungah hu ngen heak in; na nai a om innpaam khat in a khuala a om na suapuipa sangin hong hu thei zaw hi.
11Ciim in, ka tapa awng, tua hile ka lungdam tu hi; kei tungah maw hong zong khat po munah ka zo kik natu om hi.
12Mihing khuangaisun theite in ngimna hong pai ciangin mu thei a pial uh hi, ahihang khuangaisun meal ngawl khat sia tua ii sungah tum vacin tu a, a zawkciang kisiik tu hi.
13Khualmi khat ii leiba teng losak tu in kamciam a pia mi mawmaw khat sia ama ii neisate laaksakin a lo dong vaukhamna in koisak khol kul hi.
14Zing tuungin na ngualtamh te awnging takin nuksetna kam taw na phong le a haamsiat taw zong na kibang thei hi.
15A nge hat zi khat sia nguazuk ni a, mal khakhat veu a taak vakek tui taw kibang hi. 16Bangbangin ama thimsak thei tu ni ziam? Vui vak thimsak tu, ahibuale na khut sungah sathau hum zawk tu na hanciam ngei ziam?
17Thik le thik kitaat a kihiamsak bangin mihingte in khat le khat tung panin heakna nga hi.
18Theikung khat pha takin ou lete theinga na ne tu hi. A topa a ou naseam khat sia kipatoai tu hi.
19Tui sung pan hong leng kik na mu sia nangma maitang hi a, tuasia bangma na thinsung ah na mu sia nangma tatak na hi hi.
20Mihingte ii deina sia mithi khua bang ahi hi — a tamzaw lai te atu mun awng om tawntung hi.
21Meisa in khamh le ngunn a tak le a theam sit a; mihing khat ii minthanna zongh kisit thei hi.
22A mawmawte a thi dektak dongin na vuak bel hang amate mawmawtna lakeak zo ngawl lai tu ni hi.
23Na tuute le na khuite na hi theiza in pha tak vak in, 24banghang ziam cile hauna sia kip ngawl hi. Minamte ngawngawn a tawntungin kip ngawl hi. 25Taangphawte na tan a, tua zawkciang lo sung pan a piang kik tu taangphawte a khan lan in mualpangh ah lopate na meet hi. 26Na tuute pan a piang tuumulte taw puansilhte na vawt thei hi, tuaciang keal pawlkhat na zuak man sum taw leitang na lei thei hi. 27A om lai kealte in nangma le na innkuanpuite, tuaciang na naseam numeite atu zongh noai hong pia tu hi.
Currently Selected:
Paunakte 27: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
