Paunakte 28
28
1Mihing seksolte sia kuama ii del ngawl bulin tai hi, ahihang a thumaan mihing khat in tawpi bangin hang hi.
2Minam khat a maw ciang ngam uk khat zawkciang khat kilaih tu hi. Ahihang ngam khat sia a pilvang, khuangaisun thei lampuite a nei le, thahat tu a, kip tu hi.
3Mizawngte a zawthawk vawt thunei mihing khat sia lo an a lalsak vui le ngua taw kibang hi.
4Thukham na thusim buale mihing seksolte sangah pang na hi hi; ahizong thukham na ni le amate a langpan na hi hi.
5Mihing ngilote in thukhaikim sia bang ziam ci in a he bua uh hi, ahihang Topa a biate in pha takin tel uh hi.
6Zawng a, thumaan tu sia, hau a thumaan ngawl sangin phazaw hi.
7Thukham a zui khangno khat in mihing pilvang ahi hi. A mannung ngawl ngualtamh a nei pa sia a pa maimawlna ahi hi.
8Mihingte tungah summeet thaakna le ngual duupna taw na hau le na hauna teng mizawngte tungah a thudik khat ii khut sung theng tu hi.
9Thukham na zui buale na thungetnate sia Pathian atu in a ngaimawk huai, a zaak thada suak tu hi.
10Mihing thumaan khat a sia vawt tu in na theam le nangma thaang sung ma ah na taaksuk tu hi. Mawbaang ngawlte thaman a pha kipia tu hi.
11Mihaute sia amate ciim kisa tawntung a, ahihang ngual ii ngamtatzia a thuk a mu thei mizawng khat sia ciimzaw hi.
12Mihing phate in ukna za hong nga ciang mihing theampo lungdamin poai khaam uh a, ahihang mihing siate in ngam a uk ciang mihingte buu uh hi.
13Na mawnate seal tu na hanciam le nuntak sungin zawna na nga ngei buatu hi. Mawna pualaak vun a, nusia vun; tuasia ciang Pathian in na tungah hesuakna hong lak tu hi.
14 Topa thu ni tawntung in, tua hile na lungdam tu hi. Na thin na puisak le siatna sung na theng tu hi.
15A seksol ngamuk khat ii lang ah, mizawngte a hu tu a om bua hi; ama sia tawpi hawk le an zongin a vakkot vompui bangin kiitakhuai hi.
16Khua ngaisutna pha a nei ngawl ngamuk khat sia a ngilo zawthawk thu taw ngamuk khat ahi hi. Thumaan ngawlna a ngaimaw khat in khuangei mama ngam uk tu hi.
17Mihing that pa khat sia ama atu thaankuul a manlang thei za in a to pa ahi hi. Na tho heak vun.
18Thumaan le uhte ngammuangin na om tu uh hi. Na thumaan buale thakhat thu in na puk tu hi.
19Nasia tak a diang lotho pa in neak tu tam mama nei hi. Hun a bosak thawthong mihingte sia, zawng tawntung tu uh hi.
20Thumaan mihingte in nuntakna kicing taw lungdamin a nungta tu uh hi. Ahihang hau tu kaal na ngakla uh le daan na thuak tu uh hi.
21Mi doidanna in khialna hi. Ahihang thukhenmang pawlkhat in sumnguk tawmno po deina ngawngawnin a maan ngawlin naseam tu hi.
22Kaangsung bek a he mihing duhopte in hau tu ngakla in diang ahiciang, zawnna ii vaat tu hun a he bua uh hi.
23Khat pawpo pau in hil vun, a zawkciangin ama in sialpokna sangin diksa zaw tu hi.
24A nu a pate neisa ngukna in mawna in a ngaisun ngawlte sia nguta dangte taw kilamdang ngawl hi.
25Duhopna in ngimna bek piangsak hi. Topa na muan tu sia phazaw pek hi.
26Nangma bek ii ngaisutna teng zuina in mawmawtna hi. Ngammuangin om vun a, tuaciang a ciimzawte ii hong hilnate zui vun.
27Mizawngte pia vun, tua hile bangma hun na kitaangsamh buatu uh hi. A zawngte na en bua uh le mihing tam mama in hong haamsiat tu hi.
28Mihing pha ngawlte in ukna za a nga ciang mihingte buu uh hi. Ahihang amate a za a taak uh ciang a thutang mite in uk kik tu hi.
Currently Selected:
Paunakte 28: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
