Isaiah 42
42
1 Topa in, “A tha ka hatsak
ka naseampa sia hi sungah om hi —
ama sia ka teal pa hi a, ka lungkim hi.
Ka thaa taw ama ka dimh zo a,
minam theampo tungah thumaanna puak tu hi. #Mt 3:17; 17:5; Mk 1:11; Lk 3:22; 9:35
2Ama au ngawl, a aw saangsak ngawlin,
lampi ah a ngingin pau ngawl tu hi.
3Ama in pumpa kung koai khat thiaktan ngawlin,
lalciin meitaang phe valep sia mitsak ngawl tu hi.
Ama in mihing theampo tungah a kip thukhaikim thengsak tu hi.
4Ama in lametna bo ngawlin thin kiam ngawl tu hi;
leitung ah thukhaikimna piangsak tu hi.
A khuala ngamte in ama ii
thuhilna ngakla uh hi,” ci hi. #Mt 12:18-21
5Pathian in vantungte bitphua in, phalhkeak hi;
ama in leitung le leitung ah a teangte theampo vawt hi;
leitung mite theampo tungah
nuntakna le husanna pia hi.
Tuaciang tu in, Topa Pathian in a naseampa tungah, #Sawl 17:24-25
6“Topa, keima in, leitung ah
thukhaikimin a kiseam ziam ci thu
en tu in, nangma kong sam a, vaangletna kong pia zo hi.
Nangma tungtawnin mite theampo taw thuciamna khat ka vawt tu hi;
nangma tungtawnin minamte tungah khuavak ka pia tu hi. #Is 49:6; Lk 2:32; Sawl 13:47; 26:23
7Nangma in mittawte ii mitte na hong tu a,
thongzing sungah a tote na suatak tu hi.
8“Keima bekma Topa na Pathian ka hi hi.
Pathian dang khat tungah ka vaangletna kihawm ngawl tu hi;
kei hong kipoknate sia milimte ka hawm buatu hi.
9Tu in ka sonkhol thute taangtung tu hi.
Tu in a piang ngawl lai thu thakte
hong pian ma ngawngawn in, kong son tu hi.” ci hi.
Pokna la khat
10 Topa tungah la thak khat sa vun;
leitung theampo awng, ama pokna lasa vun!
Tuipi tung khualhawte awng, ama pok vun;
Tuipi sungah nganhingte theampo awng, ama pok vun!
ngam khuala nate le tua munah a teangte theampo awng, lasa vun!
11Sennealngam le a khuapite in Pathian pok hen;
Kedar mite in ama pok hen!
Sela khuapi sungah a teangte in
mualdawnte pan lungdamin au hen!
12Ngam khuala na sungah a teangte in
Topa tungah pokna le minthanna pia hen!
13 Topa sia ngalhang pa bangin ngalsim tu in kuan hi;
Ama sia ngal do tu lawpin kinging hi.
Ama in ngal phawngin au a, hanla sam hi;
Ama in a ngalte tungah a vaangletna lak hi.
Pathian In A mite Hu tu in Kamciam
14Pathian in,
“Khuangei hial poma ka thim dide hi; ka mite ka paupui bua hi.
Ahitazong tu in ka dian tu hun hong theng zo hi;
numei nausuak tun tu bangin ka au hi.
15Mualnote le mualliante ka siasak tu a
lopa le thingkungte ka kongawsak tu hi.
Ngundungte sennealngam suaksakin,
tuilite ka kangsak tu hi.
16“Mittaw ka mite sia
amate tot ngeingawl lampite ah lam ka pui tu hi.
Amate khuazing sia khuavak suaksakin
a hamna mun sia amate mai ah ka nealsak tu hi.
Hite sia ka kamciamte hi a, peal ngawlin ka taangtungsak tu hi.
17Milimte a muangte theampo,
milimte a pathian hi a cite theampo kimaizumsakin,
kimaimawlsak tu hi.” ci hi.
Israel te ii Thuheak Laakna
18 Topa in, “Ngai vun,
no nangong mite awng!
A nai in en vun,
no mittawte awng!
19Ka naseampa sang khuamu ngawl zaw khat po,
kamtai in ka sawlpa sangin
nangong zaw khat po a om ziam?
20Israel awng, nang in tam mama na mu zo hi,
ahihang nang atu in bang khiakna nei ziam?
Na khuazaak natu in
bil na nei hi,
ahihang bang tatak
na za ziam?” ci hi.
21 Topa sia hong ngup tu a ngakla Pathian hi a,
tua ahikom a thukhamte le a hilnate thupisak hi,
tuaciang ama in tuate a mite ii zatak tu dei hi.
22Ahihang tu in
a mite kisuttol zo hi;
leinuai thong ah kikalhcipin
thong sungah kiseal hi.
Amate ii vanhte kiphuulin kisuttol a,
amate suatak tu in kuama hong pai ngawl hi.
23Note sung pan akua in hi thu ngai tu nu ziam?
Tu pan kipan pha takin, na ngai tu uh ziam?
24A suttolte tungah Israel te a pia sia akua ziam?
Eite ii a tungah ih maw, Topa ma ahi hi!
Ama ii dei le oai bangin ih nungta bua a,
ama ii hong hilnate bang ih mang bua hi.
25Tua ahiciang ama ii thin uuk tut nate
eite hong thuaksakin, ngal ii daan hong thuaksak hi.
Ama ii thin uukna sia mei bangin
Israel mite theampo sungah kuang hi,
ahihang bang thu piang ziam
cisia eite in ih he ngei bua hi;
tua ih thuakna panin eite in
heakna bangma ih nei peuma bua hi.
Currently Selected:
Isaiah 42: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
