Isaiah 43
43
Pathian in A mite Suatak tu Kamciam
1Israel awng, nang hong bitphua Topa in,
“Lau heak in — kong ngum tu hi.
Na min taw kong sam zo hi — nang sia Keima mi na hi hi.
2Tui thukte na kaantan ciang, nang taw kong omkhawm tu hi;
ngim na thuaknate in hong zo zo ngawl tu hi.
Meikuang na kaantan ciang, na kaangh buatu hi;
na thuak haksatnate in nang hong nasak ngawl tu hi.
3Banghang ziam cile keima in Topa na Pathian,
Israel te ii a thiangtho Pathian, nangma hong ngumpa ka hi hi.
Nangma kong suataksak natu in Egypt ka suplaw tu a;
Ethiopia le Seba ka suplaw tu hi.
4Na nuntakna ngum tu in minamte theampo ka suplaw tu hi,
banghang ziam cile nang sia kei atu in na manpha a,
nang kong it a kong upat hi.
5Lau heakin — nangma hong ompui khi hi!
“Ni suana a khualana pan le nitumna sang a khuala belna panin,
na mite inn ah kong ciapui tu hi.
6Saksangte tungah amate paisak vun ka ci tu a;
thangsang te tungah amate khaktan heak vun ka ci tu hi.
Ngam khuala na pan le leitung mun theampo panin ka mite heak kik tahen.
7Amate sia keima mite hi a,
keima hong minthangsak tu in ka bitphua ahi hi,” ci hi.
Israel sia Topa ii Tetti
8Pathian in, “Ka mite zum ah sam vun.
Amate in mittang nei hi napi, a mit uh taw hi;
amate in bil nei hi napi, a nangong uh hi!
9Thu kisitna munah hong pai natu in minamte sam vun.
Amate ii pathiante sung pan
akua in maisang thu sonkhol thei ziam?
Amate sung pan akua in tu a a piang thu sia sonkhol ziam?
Hi pathiante in a sonkhol thute maanin,
amate kammalte maan hi, ci in a kilangh natu in, a tetti te hong paipui tahen.
10“Israel mite awng, note in ka tetti te na hi uh hi;
kei hong he in nong up natu le,
keima bekma Pathian ka hi sia na tel natu uh in ka naseam tu in no kong teal hi.
Keima simngawl pathian dang om ngawl hi;
om ngeingawlin, maisang zongh ah om ngeingawl tu hi.
11“No hong ngum thei tu sia Topa ahi,
keima khat bekma ka hi hi.
12Bang hong piang tu cisia ka sonkhol zo a,
tuaciang no hong hu tu in kong pai hi.
Ngamdang pathian in hi bang vawt ngeingawl hi;
note in ka tetti te na hi uh hi.
13Keima in Pathian ka hi a, a tawntungin ka hi tu hi.
Kuama in ka vaangletna panin suakta thei ngawl tu hi;
ka septe kuama in kheal zo ngawl tu hi,” ci hi.
Babylon pan Suatakna
14Israel te ii a thiangtho Pathian, note hong ngum Topa in,
“Note hong ngum tu in, Babylon a sim tu ngalkap honkhat kong puak tu hi;
khuapi kongpite ka siasak tu a,
a mite auna awte in kaana aw suak tu hi.
15Keima in Topa a thiangtho na Pathian ka hi hi.
Israel awng, no kong bitphua a, keima in note kumpi ka hi hi,” ci hi.
16Nidang lai pekin Topa in tuipi
kaantan in lampi khat vawt a,
a tuipeite kaantanin
lamzin khat vawt hi.
17Ama in siphu ngalleangte le siphute a kihel,
a thahat ngalkap hon khat suksiatna ah lampui hi.
Amate pukin
tho kik nawn ngawl a,
meivak kuang muutmit bang
ahi hi!
18Ahizong Topa in,
“Nungsang thute len heak vun a,
taanghlai a piang thute thupi in ngaisun heak vun.
19A thak na khat ka vawt tu sia en vun.
Tuasia hong piang zo hi — tu in mu thei nu hi!
Ngam tawnghtol sungah lampi khat ka vawt tu a,
tualai ah note atu in tui ka luangsak tu hi.
20Ngamsate ngawngawn in kei hong zakta tu hi;
ka tealsa mite tui pia tu in sennealngam sungah
nguntui ka luansak ciang, ngiate le kalaoh vacimte in kei hong pok tu uh hi.
21Amate sia keima atu in ka vawt mite hi a,
amate in keima hong pokna lasa tu uh hi!” ci hi.
Israel ii Mawna
22 Topa in,
“Israel awng, ahihang kei nong cimtak zo hi;
nang in kei nong bia bua hi.
23Nangma in tuu taw na meihal biakpiaknate kei kungah nong paipui bua hi;
na biakpiakna taw kei nong zatak vawt bua hi.
Biakpiaknate ngenin vanhngit kong suan bua a,
ngimnamtui ngenin, thinngim kong pia bua hi.
24Kei atu in ngimnamtui
na lei bua a,
na nganhingte ii thau taw
nong lungkimsak bua hi.
Ahihang na mawnate taw kei tungah vanhngit nong suan zaw pumsai a;
khialna na vawtnate taw in ka thin nong ngimsak hi.
25Ahitazong, na mawna hong
maisak sia Pathian keima hi a,
keima ka hikom hi bangin ka vawt hi.
Na khialnate lenin maw kong suan buatu hi.
26“Zum ah pai tawng; nang hong kimawsakna thu hong paipui ta'n!
Nangma in a maan na hina
thu lak tu in na thu sung in!
27Na taanghpupi masa belpa uh maw hi;
na lampuite ka tungah hong khial hi,
28no hong ukte in ka inn thiangtho sia ninsak uh hi.
Tua ahikom Israel tungah siatna kong thengsak hi;
ka mite selnona ka thuaksak hi,” ci hi.
Currently Selected:
Isaiah 43: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
