Isaiah 40
40
Lametna Kammalte
1Ih Pathian in, “Ka mite heeneam vun” ci hi.
“Amate heeneam vun!
2Jerusalem mite hanthawn vun.
Amate in ngei hialma thuak zo a,
tu in a mawna teng kimaisak zo hi ci in son vun.
A mawna theampo atu a kicingin amate daan ka pia zo hi,” ci hi.
3Aw khat in, “Ngam tawnghtol sungah Topa atu in lampi khat vawtkhol vun!
Ih Pathian atu in sennealngam sungah lam sial vun! #Mt 3:3; Mk 1:3; Jn 1:23
4Munkuam theampo dimh vun;
mualpi theampo maaitamsak vun.
Mualnote zaangtam suak tu a,
a hamna mun kinealsak tu hi.
5Tuaciang Topa minthanna kilangh tu a,
minam bup in mu tu uh hi.
Topa ama mama in hi thu kamciam zo hi,” ci hi. #Lk 3:4-6
6Aw khat hong ngingin,
“Thu khat thangsak in!”
hong ci hi.
“Bang thu thangsak tu khi ziam” ci in ka dongh hi.
“Mihing theampo sia lopa taw kibang a;
ngam sungah a om paakte sangin
khuangei nungta zaw tuan ngawl ahi sia thangsak in. #Jas 1:10-11; 1 Pe 1:24-25
7 Topa in tuate vui in
a seamsak ciang
lopate kongaw in
paakte vul hi.
Mihingte sia lopate sangin
thuak zo zaw tuan ngawl hi.
8Hi hi, lopate kongaw in paakte vul a,
ahihang ih Pathian ii kammal sia a tawntung kip hi,” ci hi.
9Jerusalem awng, mualsaang khat tungah kaato in lungdamna thupha thangsak in!
Zion awng, nging takin au keakin, lungdamna thupha taangko in!
Lau ngawlin son khe in.
A Pathian uh hong pai tu hi ci in Judah khuate tungah son vun!
10Vaanglianpipa Topa sia vaangletna taw uk tu in hong pai a,
ama ii a suatak sa mite hong tonpui tu hi. #Is 62:11; Tpl 22:12
11Tuucing pa khat taw kibangin
ama in a tuuhon keamcing tu hi;
ama in tuunote kaikhawmin a baan ah toai a,
tuate ii puite dam takin paipui tu hi. #Eze 34:15; Jn 10:11
Teengat thei ngawl, Israel ii Pathian
12Akua in khutkuak dim taw tuipi tee thei tu ziam,
ahibuale a khutte taw vantung tee thei tu ziam?
Akua in hai khat sungah leitung leitang heang thei tu ziam?
tua ahibuale akua in mualliante le mualnote toai tee thei tu ziam?
13Bang vawt tu ci sia Topa tungah akua in son thei tu ziam?
Akua in ama hil thei tu ahibuale ngaisutna pia thei tu ziam? #Rom 11:34; 1 Cor 2:16
14Nate bangbangin
vawt tuak hi ci a,
heak natu le tel natu in Pathian in akua dongh ziam?
15 Topa atu in minamte sia bangma hi ngawlin,
tuimal khat bang zongh hi ngawl hi;
a khuala na ah a om tuikulhte sia leivui bangin zaang hi.
16Lebanon ngam duisung ah a om nganhing theampo sia
ih Pathian biakpiak natu in kicing zo ngawl a,
a thingkungte zongh biakpiakna meihal natu in tawm lei hi.
17Minamte theampo sia
ama atu in bangma tham hi ngawl het hi.
18Pathian sia akua taw kitee ngat thei tu ziam?
Ama sia bang taw kibang hi ci in bangbang na son thei tu uh ziam?
19Ama sia thikseakte khutthiamte ii vawt,
ngunn huanna sungah a sun suk khamh taw a zut milim taw kibang ngawl hi. #Sawl 17:29
20Ngunn ahibuale khamh taw a vawt zo ngawl pa in
a muat ngawl tu thing teal hi.
A pukvawk ngawl tu milim khat vawt tu in
ama in khutthiamna neipa khat zong hi.
21He ngawl nu ziam?
Nidang pekin note tungah hong kison hi ngawl ka na ziam?
Leitung sia bangbangin kipan cisia za ngeingawl nu ziam?
22Tuasia in van kalh ah a om leitung ii tungsia
ama kumpi tokhum tungah a to pa ii vawt sa ahi hi;
a nuai ah om mite sia mitsa nocik bang ahi hi.
Puan dalna khat a kikhak bang le
a sungah teen natu in puanbuk khat a kiphal bangin
Ama in van a phalh hi.
23Ama in a thahat ngamukte
khiasukin bangma ngawl suaksak hi.
24Amate sia a kung moino,
a po tuung, a zung kho ngawl laite taw kibang hi.
Topa in vui a vaksak ciang
tuate kongaw in taangphaw bangin lenkeak hi.
25A thiangtho Pathian sia akua taw kitee ngat thei tu ziam?
Ama taw a kibang akua dang om ziam?
26Van ento in!
Na mu aksite akua in bitphua ziam?
Ngalkap honkhat lampui bangin,
aksite lam a puipa in aksite a phakza he a,
khat simin a min taw sam hi!
Ama vaanglian mama a —
amate khat zongh peuhe ngeingawl hi!
27Tua ahile Israel te awng, ngimna na thuak uhte Topa in hong heaksak ngawl hi
ahibuale thukhaikim om ngawlin na thuak uh ciang
Topa in hong awlmawk ngawl hi
ci in banghangin phun nu ziam
28He ngawl nu ziam? Za zo hi ngawl nu ziam?
Topa sia tawntung
Pathian ahi hi;
ama in leitung theampo
bitphua hi.
Ama sia toi ngeingawl a, ngim ngeingawl hi.
Ama ii ngaisutnate kuama in tel ngawl hi.
29Ama in a thazawmte le a toite thahatsak hi.
30Khangmoite ngawngawn a tha uh kiam hi;
tangvalte a tha uh bo in puk thei hi.
31Ahihang a hu tu in Topa a muangte in
a tha uh thathak a dim kik sia mu tu uh hi.
Amate muvanlaite bangin a tha uh taw leangto tu hi;
amate a tai hangin toi ngawl tu uh hi;
lam a pai uh hangin a thazawm ngawl tu uh hi.
Currently Selected:
Isaiah 40: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
