Pianciilna 35

Pathian in Bethel ah Jacob Thupha Pia

1Pathian in Jacob tungah, “Bethel ah pai paih ta'n a, tua munah teang ta'n. Na suapuipa Esau kung pan na tai lai in, nang tungah hong kilangh Pathian, keima atu in tua munah biaknatau khat sa in,” ci hi. #Pian 28:11-17

2Tua ahiciang Jacob in a innkuan puite le a ompui teng tungah, “Ngamdang pathian milim na nei te vawk vun a; noma le noma kithiansua in, puanthiang silh vun. 3Hi mun nusia in Bethel ah ih pai tu hi, tua munah ngim ka nga hunin hong hu a, ka paina sa theampo ah hong ompui Pathian atu in biaknatau khat ka sa tu hi,” ci hi. 4Tua ahiciang amate in a ngamdang pathian milim a nei theampo le a baa lai bilbaate zongh Jacob tungah pia uh hi. Jacob in Shechem khuahui oak thingkung sia nuai ah tua teng phum hi.

5Jacob le a tapate vaiding tu a kipat lai in, khua naina tengah a teang mite tungah launa lian tung ahikom khua mite in amate del ngawl uh hi. 6Jacob sia a mihingte theampo taw Canaan ngam sung, tu in Bethel a kici Luz khua theng uh hi. 7Ama in tua munah biaknatau khat sa hi, a suapuipa kung pan a tai lai in ama kungah Pathian a kilangh na mun ahikom tua mun sia Bethel ii Pathian min tapsakin Bethel ci hi. 8Rebecca a omh nu Deborah thi a, Bethel ii thangsang oak thingkung nuai ah kiphum hi. Tua ahikom, “Kaana Oak Thingkung” ci in min kiphuak hi.

9Mesopotamia pan Jacob hong heak kik ciang ama tungah Pathian kilangh kik a, thupha pia hi. 10Pathian in ama tungah, “Na min Jacob hi, ahizong tu pan kipan Israel hi tu hi,” ci hi. Tuabangin, Pathian in ama min Israel phuak hi. #Pian 32:28 11Tuaciang Pathian in ama tungah, “Keima in Vaanglianbelpa Pathian ka hi hi. Ta tam mama nei ta'n. Minamte nang sung pan hong piangsuk tu a, kumpite taanghpupi na hi tu hi. #Pian 17:4-8 12Abraham le Isaac ka piak ngam le lei sia nangma kong pia tu a, nang nung pan na suan na paalte tung zongh ah ka pia tu hi,” ci hi. 13Tua zawkciang Pathian in ama nusia hi. 14Pathian ii ama a paupuina tua munah Jacob in khansuang khat phut a, tua khansuang sia sapittui le olive thau buakna taw in aapna vawt hi. #Pian 28:18-19 15Ama in tua mun sia Bethel ci hi.

Rachel Thina

16Jacob le a innkuanpuite Bethel pan ding uh a, Ephrath khua a thet ma hiatin Rachel a nau nei tu hun tung a, nautun zo in ngim mama hi. 17Ama nautut a haksatbel hun ciang nausuaksak syanu in ama tungah, “Rachel awng, lau om nawn bo; tapa dang khat nei ni hi,” ci hi. 18Ahizong a nu thi dektak zo hi, a thi ma a hui a tat tu ciang a tapa min Benoni ci in phuak hi, ahizong a pa in a min Benjamin phuak hi.

19Rachel a thi ciang Eprath paina lampi hui, tu in Bethlehem a kici na munah kiphum hi. 20Jacob in tua munah khansuang khat phut a, tuasia tuni dongin Rachel thaanmual tepteena ahi hi. 21Jacob kikhiin kik a, Eder tausaang langkhat ah a ngiaphual saat hi.

Jacob ii Tapate

(1 Khangtaanghthu 2:1-2)

22Tua ngam ah Jacob a teen laitakin, Reuben in a pa zinote khat ahi Bilhah taw omkhawm hi; Jacob in tua thu za a, thin uuk mama hi. #Pian 49:4

Jacob in tapa sawm le nii nei hi. 23Leah ii tapate sia Reuben (Jacob ii tapa lianbel), Simeon, Levi, Judah, Issachar le Zebulun ahi hi. 24Rachel ii a tapate sia Joseph le Benjamin ahi hi. 25Rachel sila Bilhah ii a tapate sia Dan le Naphtali ahi hi. 26Leah sila Zilpah ii tapate sia Gad le Asher ahi hi; hi tapate teng sia Mesopotamia ah suak hi.

Isaac ii Thina

27Abraham le Isaac teenna ahi Hebron khua nai Mamre khua ah a om a pa Isaac kungah Jacob pai hi. #Pian 13:18 28Isaac kum za le sawmliat nungta in, 29a huai tatakin thi hi; ama sia a tate Esau le Jacob in vui hi.

Currently Selected:

Pianciilna 35: SCB2

Highlight

Copy