Pianciilna 34
34
Dinah Buanin Khialpui
1Ni khat ni in Jacob le Leah te ii tanu Dinah sia Canaan numei pawlkhat kungah haw tu in pai hi. 2Tua ngam ukpi, Hiv te Hamor ii tapa Shechem in ama a mu ciang manin buanin khialpui hi. 3Ama in tua numei sia deihuai mama sa a, it ahikom tua nu ii a it natu in zongh hanciam hi. 4Ama in a pa tungah, “Hi numei ka zi tu in hong puisak ta'n,” ci hi.
5Jacob in a tanu Dinah ii minsiatna thu za ahihang a tapate duisung ah ngan cingin om ahikom amate hong cia mateng bangma vawt ngawl hi. 6Shechem ii pa Hamor sia Jacob taw thu son tu in a pai le, 7Jacob ii tapate duisung pan hong cia taw kisi hi. Amate in a thu teng a zaak ciangin Shechem ii hi bang tengin ngamta a, Jacob ii tanu a buanna taw in Israel mite a zawnsak manin thuak zo ngawl a, amate thin uuk ngawp uh hi. 8Hamor in Jacob tungah, “Ka tapa Shechem sia na tanu taw ki it zo hi; nong hesuakna in kiteangsak tawng. 9Ko mite le no mite kiteen natu in thukimna khat ih vawt tu hi. 10Tuasia ciang ko ngam hi sungah ko taw nong om thei tu uh a; na teen nopna mun po ah teangin, na uuk bangin sum vawtin, nei le lamh na heang thei tu uh hi,” ci hi.
11Tua zawkciang Shechem in Dinah ii pa le a suapuipate tungah, “Kei maipha hong pia tavun, na dei pawpo kong pia tu hi. 12Bang letsong teng dei nu ziam hong son tavun; mo man tu na deiza po hong ngen tavun; hong kiteangsak tu hi pole uhte nong nget zaza kong pia tu uh hi,” ci hi.
13Shechem in, a suapuinu uh Dinah min siasak zo ahikom Jacob ii tapate in Shechem le a pa Hamor kam a zona ah theambawl uh hi. 14Amate in Shechem tungah, “Vunteap at ngawl khat tungah ka suapuinu kong teangsak thei buatu uh hi; hong teangsak hi le ung ko atu in min siatna khat hi tu hi. 15Koma taw na kiban natu uh in, pa theampo vunteap na at uh ciang bekin thukim thei tu khu hi. 16Tua zawkciang tuabang a kiteen tu thukim tu khu hi. Note sungah kong teang tu uh a, ci khat sa khat ih suak tu hi. 17Ahizong ko ii ci teng hong saang ngawlin vunteap na at nuam bua uh le, ka suapuinu la in ka ciapui tu uh hi,” ci hi.
18Hamor le a tapa Shechem in hi thu teng pha tuak sa a, 19tangvalpa in hai ngawlin a ci bangin a vunteap at paih hi, banghang ziam cile Jacob ii tanu a dei hang ahi hi. Shechem sia amate innkuan sungah a thupibel ahi hi.
20Hamor le a tapa Shechem in taangpi kikhopna khuapi kongpi ah pai a, a khuapuite tungah thu a sonna panin: 21“Hi mite sia ih lawmte hi a, ih ngam sungah eima taw teang khawmin a ukna po ah paisak tawng. Ih ngam zongh lian a, amate atu taw in kicing lel hi. A tanute ih teenpui tu a, ei a te zongh ih pia tu hi. 22Ahihang hi mihingte ei sungah hong teen tu a thukim thei natu le eima taw ci khat sa khat a sua natu in amate vunteap a ki at bangin ei, pa a minpiang vunteap ih at kulsak hi. 23A nganno teng le a neisa dang theampo ei aa hi lel tu ngawl ziam? Tua ahiciang thukim in amate ei sungah teangsak tawng,” ci hi. 24Hamor le Shechem ii son thu teng a khuapuite theampo in lungkim pui a, pa theampo vunteap ki at siat hi.
25Ni thum zawkciang amate vunteap atna meima nat saanin a om laitak, Jacob tapa teng sung pan niite, Dinah ii suapuipate ahi Simeon le Levi te in a namsau tek la in, muanmawk khol ngawlin khuapi sungah tum a, pasal theampo thatlum siat uh hi, 26Hamor le a tapa Shechem zongh kihel hi. Tua zawkciang Shechem inn pan Dinah la in ciapui uh hi. 27Tuabang a thalup zawkciang Jacob tapa dangte in, a suapuinu a kiminsiatsak huvau in a phula tu in a khua phuul uh hi. 28Amate in a tuuhonte, a khuite, a laate, khua sung le lo sung a om na theampo laaksak siat uh hi. 29Amate in na manpha theampo la in, numei patang theampo man a, inn sung vanh theampo pua in ciapui uh hi.
30Jacob in Simeon le Levi tungah, “Kei thinngim haksatna sungah hong then zo nu hi; tu in Canaan te, Periz te le mi dang theampo in kei hong ngaimaw tu hi. Kei la mihing tam nei ngawl a; amate teng kikop in kei hong sim thong le ih innkuan bup in hong mon tu uh hi,” ci hi.
31Ahizong amate in, “Ka suapuinu uh sia pumpi kizuak khat bangin a kivawt tu sia suaksak thei mama ngawl khu hi,” ci in zo uh hi.
Currently Selected:
Pianciilna 34: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
