Pianciilna 33

Jacob sia Esau taw Kimu

1Jacob in, Esau le a mi zali hong pai a mu ciang ama in a tate teng sia Leah, Rachel le a zinote nii kawmah khenin koi hi. 2Ama in a zinote le a tate teng masasak a, tua zawkciang Leah le a tate, a khakbel in Rachel le Joseph tonsak hi. 3Jacob sia amate mai ah pai a, a suapuipa kung a thet tu ciang salivei lei ah kun hi. 4Ahizong Esau sia ama muak tu in hong tai a, ama koai in namh hi. Amate kap khawm hi. 5Esau in a kiim a paam a et ciang numeite le patangte mu a, “Nang taw a om hi mihingte a kuate ziam?” ci in dongh hi.

Jacob in, “Hite sia Pathian ii a phatna hangin keima hong piak ka tate hi topa awng,” ci in zo hi. 6Tua zawkciang a zinote le a tate teng pai in kun hi; 7tua zawkciang Leah le a tate teng pai in kun a, a khakbel in Joseph le Rachel pai in kun uh hi.

8Esau in, “Ka kisik puisa pawldang sia bangbangziam? Bang cinopna ahi ziam?” ci in dongh hi.

Jacob in, “Tuate sia na mai kong etna hi,” ci in zo hi.

9Ahizong Esau in, “A kicing nei ing, suapui awng, na nei teng keam po ta'n,” ci hi.

10Jacob in, “Hi ngawl hi, hesuakna taw, na maipha a nga ka hile ka letsong hong saang ta'n. Tu in kei hong pawlvawt mama zo na hikom na maitang kong mu sia, Pathian maitang mu bang ka hi hi. 11Nang atu kong ken hi letsong sia hesuakna taw hong saang ta'n; Pathian in kei tungah hong thuthiam a, ka taangsap theampo hong pia hi,” ci hi. A saan mateng Jacob in sonpui top hi.

12Esau in, “Kithoai vun a, pai tek tawng. Na mai ah kei pai tu khi hi,” ci hi.

13Jacob in, “Patangte thazawm a, tuute, ngannote le a note atu ka ngaisut a kul sia na he hi. Amate hawlngawp thong leng ni khat sung ngawngawn zong thi siat tu hi. 14Hesuakna taw paikhol ta'n, ngannote le patangte pai zawk babangin Edom ah kong phak dong dadam in kong zui tu uh hi,” ci in zo hi.

15Esau in, “Tua ahile ka mite pawlkhat nang taw ton tu in hong nusiat tong,” ci hi.

Ahizong Jacob in, “Tuabang kisamh bo, na maipha ka nga tu uuk bek khi hi,” ci in zo hi. 16Tua ahiciang Esau sia, Edom ah cia kik tu in tua ni in kipan hi. 17Ahizong Jacob in Sukkoth ah pai a, tua munah ama atu inn khat le ngannote atu thaampheangte sa hi. Tua ahikom tua mun sia Sukkoth kici hi.

18Jacob sia Mesopotamia pan hong heak kik ciang Canaan ngam Shechem khuapi ciidam takin hong theng a, tua khuapi hui lo khat sungah ngiaphual saat hi. 19Ama in Shechem ii pa Hamor suan le paalte tung pan tua lo ii khen khat sia ngunntang zakhat taw lei hi. #Jos 24:32; Jn 4:5 20Ama in tua munah biaknatau khat ciang in, a min El, Israel ii Pathian, ci in phuak hi.

Currently Selected:

Pianciilna 33: SCB2

Highlight

Copy