Pianciilna 32

Esau taw Kimu tu in Jacob Kinging

1Jacob a papai laitak lampi ah vantunglalang pawlkhat in ama muak hi. 2Jacob in amate a mu ciang ama in, “Hi sia in Pathian ii ngiaphual hi,” ci hi; tua ahiciang tua mun sia ama in Mahanaim naa hi.

3Jacob in Edom ngam a om a suapuipa Esau kungah kamtaite paisak khol hi. 4Ama in kamtaite tungah: “Na thumaan naseam keima Jacob in, ka topa Esau tungah thu kong puakna panin, Laban kungah ka om a, tu in kong heak kik thei pheang hi. 5Keima in khuite, laate, tuute, kealte le silate ka nei hi. Topa awng nangma maipha ka nga tu lamen in hi bangin kam kong vaitha hi,” na ci vun, ci in sawl hi.

6Kamtaite Jacob kungah hong heak kik ciang amate in, “Na suapuipa Esau kungah ka pai uh a, nangma muak tu in ama hong pai zo hi. Ama in mihing zali nei hi,” ci hi. 7Jacob lau in, a thinngim hi. Ama in a mihingte ahizong, a tuute, a kealte, a khuite le a kalaohte ahizong pawl nii in khen hi. 8Ama in, “Esau hong pai in a masa pawl teng hong sim le zong, a dang teng suakta thei tu hi,” ci in ngaisun hi.

9Tuasia ciang Jacob thungen a, “Ka pu Abraham ii Pathian le ka pa Isaac ii Pathian awng hong ngai ta'n! Topa awng, nangma in kei tungah na ngam na lei le na beete kungah cia kik in, tua hile nang atu na theampo phasak in na ma kong vangsak tu hi, nong ci hi. 10Na naseampa keima sia nong laksa na cikna le na thumaanna taw ka kilawm bua hi. Bangma dang nei ngawlin, ciangkhut khat bek ma taw Jordan ngun ka kaantan a, tuni in hi pawl niite taw in ka cia kik zo hi. 11Ka suapuipa Esau khut sung pan nong hut natu in thu kong ngen hi. Kei lau khi hi — kote hong sim tu in ama hong pai laitak hi a, numei patang ngawngawn hong thalup siat tu ka lau hi. 12Nangma in na ma kong vangsak tu a, tuipivaal senneal za in a tam, kuama sim zawk ngawl za dongin suan le paal kong pia tu hi, ci in nong kamciamnate phawk kik in,” ci hi. #Pian 22:17

13-15Tua munah tua zan a ngia zawkciang Jacob in a suapuipa Esau letsong a piak tu in a ngannote sung pan hi bang teng teal hi: keal anu 200 le keal apa 20, tuu anu 200 le tuu apa 20, kalaoh noaisuuk 30 le a note teng, khui anu 40 le khui apa 10, laa anu 20 le apa 10 te ahi hi. 16Ama in nganno teng a pawl a pawlin khen a, hon khat sim a uk tu in a naseamte khat tek koi hi. Ama in amate tungah, “Ka mai ah paikhol tavun a, honkhat le honkhat kilaklaw kihalsak in a nung kizuisak tavun,” ci hi. 17Ama in a masabel naseampa tungah, “Ka suapuipa Esau taw na kisik ciang, ‘Na topa akua ziam? Koisung pai tu nu ziam? Na mai a ngannote akua neisa ziam?’ ci in hong dok ciang, 18‘Hite sia na naseampa Jacob neisa hi. Ama in hi teng a topa Esau letsong in hong puak hi. Jacob zongh ka nung ma ah om hi,’ ci in zo nanak tavun,” ci in thupia hi. 19Ama in tuabang ma in a niina, a thumna le nganno hon a uk dangte theampo tungah hi bangin thupia hi: “Esau taw na kimu uh ciang tu a bangin ci tu nu hi. 20‘Hi hi, na naseampa Jacob ka nung uh ma ah om hi’ na ci tu uh kisamh hi.” Jacob in, “Ka letsong piak teng taw a thin ka zosak tu a, ama taw ka kimu ciang hong maisak thei tha tu hi,” ci in ngaisun hi. 21Ama in a letsong teng mai ah paikholsak a, ama ahile tua zanin ngiabuk ah taam lai hi.

Peniel ah Jacob le khat Kibuan

22Tua zan Jacob tho in, a zite nii, a zinote nii le a tate sawm le khat taw Jabbok Ngun kaantan uh hi. 23Amate teng a paisak zawkciang, a neisa theampo zongh kaantansak a, 24ahizong ama nguak nung sangah taang hi.

Tuaciang mi khat hong pai in zingsang khuavak mahiat dong Jacob taw kibuan hi. #Hos 12:3-4

25Mipa in a zaw ngawlna thu a mu ciang Jacob khealbul suksak a, a khealngu kiloai hi. 26Tua pa in, “Hong tha ta'n; khua hong vak tu hi,” ci hi.

Jacob in, “Thupha nong pia buale kong tha buatu hi,” ci in zo hi.

27Tua pa in, “Na min akua ziam?” ci in dongh hi.

“Jacob” ci in ama in zo hi.

28Tua pa in, “Na min Jacob hi nawn ngawl tu hi. Nangma in Pathian le mihingte taw na kibuan a, nangma in zo ni hi; tua ahikom na min Israel hi tu hi,” ci hi. #Pian 35:10

29Jacob in, “Tua le na min hong son ta'n,” ci hi.

Ahizong ama in, “Banghangin ka min he nuam ni ziam?” ci in zo hi. Tua zawkciang ama in Jacob thupha pia hi. #Thkte 13:17-18

30Jacob in, “Maitang kisi in Pathian ka mu zo a, ahizong kei hong kihingkhoai lai hi,” ci ahikom ama in tua mun sia Peniel ci in min phuak hi. 31Jacob ii Peniel a nusiat laitakin ni suak a, ama a khealbai hi, banghang ziam cile ama a khealngu kiloai hi. 32Tuni dong ngawngawnin Israel ii suan le paalte in khealbul a, a om sakhaal ne ngawl uh hi, banghang ziam cile hi sakhaal sia Jacob khealbul a kisuksakna mun ahihang hi.

Currently Selected:

Pianciilna 32: SCB2

Highlight

Copy