Pusuana 39
39
Thiampite atu Puante Vawt
(Pusuana 28:1-14)
1A Thiangtho Mun ah thiampite na a sep ciang a silh tu in vancii, a sandup le samul san taw a tuanngen puansilhte vawt uh hi. Moses tungah a thupiak bangin amate in Aaron atu in thiampi puante vawt uh hi.
2Ephod sia puanneal; vancii, a sandup le a san samulpuan le khamh khauzam taw vawt uh hi. 3Amate in khamh dalte seakin, a paa in zen a, puanneal phate le vancii, a sandup le a san samulpuante taw khui khawm uh hi. 4Amate in a sawm natu liangkhai nii vawt a, ephod a kho thei natu in a pangh ah khii hi. 5Topa in Moses tungah a thupiak bangin a vanhzak kibang, pha takin a kitak kawngkhau sia ephod taw sakhat tu in, a tungah khii hi. 6Amate in carnelian suangsante taatin khamh dapphate tungah suang hi; tuate tungah Jacob tapa sawm le niite min teng suanglai khen thiamte in khensak hi. 7Topa in Moses tungah a thupiak bang tatakin Israel minam sawm le niite taang tu in, amate in tua suangsante ephod liangkhai puan tungah suang uh hi.
Awmdal Vawt
(Pusuana 28:15-30)
8Amate in thiamngelna le ephod vawtna in a kizangh vanhte taw ma in awmdal vawt uh hi. 9Tua in a kikim king li nei in thuap nii in kithep a, centimetre 22 sau, centimetre 22 zai hi. 10Amate in tua awmdal tungah suangmanpha ngual li in suang a, ngual khatna ah ruby, topaz le garnet; 11ngual niina ah emerald, sapphire le diamond; 12ngual thumna ah turquoise, agate, le amethyst; 13le ngual lina ah beryl, carnelian le jasper te ahi hi. Tua suangte khamh dapphate tungah suang uh hi. 14Israel minam sawm le niite taang tu in, suang sawm le niite tungah Jacob tapa sawm le niite khat tek ii min khen hi. 15Awmdal atu in khauhualte bangin a kipheak khamh ciitak khi nguite vawt hi. 16Amate in khamh dappha nii le khamh kual nii vawtin, khamh kual niite awmdal a tungsang king veve ah belh uh hi. 17Amate in khamh khau niite sia kual niite tungah khit a, 18a dappha niite tungah a mong niite khit hi, tuabangin ephod liangkhai puan mai sangah tuate belh uh hi. 19Amate in khamh kual nii vawtin, ephod zawkciang sungsang awmdal ii nuaisang mongte nii ah belh uh hi. 20Amate in khamh kual nii vawt thua in, ephod liangkhai puante nii ii nuai, a maisang a kipeena kungah pha takin a kitak kawngkhau tung san ah belh uh hi. 21Topa in Moses tungah a thupiak bang tatakin kawngkhau tungah awmdal sia a kawm ngawl natu in amate in awmdal kualte ephod kualte tungah vancii khau taw sawm uh hi.
A Dang Thiampi Puante Vawt
(Pusuana 28:31-43)
22Amate in ephod nuai ah a kisilh puantual sia vancii samul khau ngitnget taw tak uh hi. 23Lu thun natu in a vang sia a ek ngawl natu in puan kitak sa taw kikhui thua hi. 24-26Topa in Moses tungah a thupiak bang tatakin puantual mong nuai sang kiim tengah amate in puanneal pha taw a kivawt le vancii, a sandup le a san samul puan taw kivawt talee ngate, khamh ciitak taw a kivawt tengeng te taw kithatheak in koi hi.
27 Topa ii Moses tungah a thupiak bang tatakin amate in Aaron le a tapate atu in laktong, 28dial, lukhu, puanneal ngoaipuan tom le 29puanneal, vancii, a sandup le a san samul taw a kivawt thiamngel in a kizeam kawngkhau vawtsak hi. 30Amate in khamh ciitak taw Topa tungah ki aapna lim lakna thiangtho a hi, kizepna vawtin tua tungah, “Topa atu Kitavaw” ci in khen uh hi. 31Topa ii Moses tungah a thupiak bang tatakin amate in tua kizepna sia dial mai sangah vancii khau khat taw khii uh hi.
Nasep Zawna
(Pusuana 35:10-19)
32 Topa ompuina Puanbuk nasep theampo kizo siat zo hi. Topa ii Moses tungah a thupiak bang tatakin Israel mite in na theampo seam uh hi. 33Amate in Moses kungah Puanbuk le a vanh theampo, a vanh khaina koaite, a kalte, a zawlliang a tuukpite, a khuamte le a tawdapte; 34a sanin a kinimh tuuvun taw a kivawt a sitna; savun ciitak taw a kivawt a sitna; puankhai; 35suangpheakte a kikoina Thuciamna Thingkuang, a thingpumte le a sitna; 36sabuai le a vanhte theampo, Pathian a piak anluum; 37khamh ciitak meikhuam, a meiinnte, a vanhzak theampo le meidet sathau; 38khamh biaknatau; noi sathau; ngimnamtui; Puanbuk kongbiang puankhai; 39taau saaksai taw kithua biaknatau, a thingpumte, a vanhzak theampo; khut silna kuang le a ngakna; 40doituam atu puankhaite, a khuamte le a tawdapte; kongbiang puankhai le a khaute; Puanbuk khetphinte; puanbuk sungah a kizangh tu vanhzak theampo; 41tuaciang a Thiangtho Mun ah thiampite silh tu puansilh tuanngente — thiampi Aaron le a tapate atu in puan thiangthote hong paipui uh hi. 42Topa ii Moses tungah a thupiak bang tatakin Israel mite in nasep theampo seam siat uh hi. 43Moses in a nasepna teng sit siat a, Topa thupiak bangin a sep siatna thu mu hi. Tua ahiciang Moses in amate thupha pia hi.
Currently Selected:
Pusuana 39: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
