Pusuana 40
40
Topa ii Ompuina Puanbuk Lepna le Aapna
1 Topa in Moses tungah, 2“Tha masa, a ni khat ni in Topa ii ompuina Puanbuk sia lemh in. 3Thupiak Sawmte koina Thuciamna Thingkuang tua buk sungah koi in, a mai ah puankhai khai in. 4A sungah sabuai tumpui in a tungah vanhte koi in. Meikhuam zongh la in a, meivakte bul in. 5Thuciamna Thingkuang mai ah ngimnamtui hal natu in khamh biaknatau koi in a, Puanbuk kongbiang ah puankhai khai in. 6Puanbuk mai ah meihal biakpiak natu in biaknatau koi in. 7Puanbuk le biaknatau kilaklaw ah khut silna kuang koi in a, tui dim in. 8A doituam kiimkot puan taw uumin a kongbiang ah puankhai khai in.
9“Tuaciang Puanbuk le a vanhzak theampo a thiangtho sathau noina taw aap in, tua hile thiangtho tu hi. 10Tua zawkciang biaknatau le a vanhte theampo a thiangtho sathau noina taw aap in, tua hile thiangtho sinsen tu hi. 11Ta bangma in khut silna kuang le a ngakna zongh aap in.
12“Aaron le a tapate puanbuk kongbiang ah paipui in a, a zeksa kibualna neisak in. 13Aaron in keima na a seam thiampi a sep thei natu in thiampi puante silhsak in, sathau buakin, hi bangin ama aap in. 14A tapate paipui in, laktong silhsak in. 15Tuaciang thiampite bangin keima na hong sepsak thei natu in, a pa sathau na buak bangma, a tate zongh sathau buak in. Hi bang sathau buakna in amate maisang hun theampo ah thiampi suaksak tu hi,” ci hi.
16 Topa thupiak bangin Moses in na theampo seam hi. 17Egypt pan a pusua zawk a kum niina, a tha masa, a ni khat ni in, Topa ii ompuina Puanbuk kilemh hi. 18Moses in a tawdapte pha sukin, a kalpheakte thua a, zawlliang le tuukpite thungin, a khuamte phut hi. 19Ama in Topa thupiak bangin puanbuk tungah a sitna phalhin, a puasang tuipuan sia a tung pan khu hi. 20Tuaciang ama in suangpheakte nii la in Thuciamna Thingkuang sungah koi hi. Ama in a zawnna thingpumte a bilvang sungah thun in, Thuciamna Thingkuang sitna khak hi. 21Tua zawkciang ama in Puanbuk sungah Thuciamna Thingkuang koi a, puankhai khak hi. Topa thupiak bangin, Moses in Thuciamna Thingkuang hi bangin seal hi.
22Ama in Puanbuk sung saksang, puankhai pua sangah sabuai koi a, 23Topa thupiak bangin Topa a kipia anluumte, tua sabuai tungah lui hi, 24ama in Puanbuk sung thangsang king, sabuai taw kingalsai in meivak khuam koi hi. 25Topa thupiak bangin tualai Topa ii ompuina ah ama in mei de hi. 26Ama in Puanbuk sung puankhai mai ah khamh biaknatau koi a, 27Topa thupiak bangin ngimnamtui hal hi. 28Ama in Puanbuk kongbiang ah puankhai khak a, 29tua mun puankhai mai ah meihal biakpiak natu in biaknatau koi hi. Topa thupiak bangin tua biaknatau tungah ama in sangawna taw meihal biakpiakna le antang taw biakpiakna te seam hi. 30Ama in Puanbuk le biaknatau kilaklaw ah kisilna kuang koi in tui dim hi. 31Moses, Aaron, le a tapate in tualai ah 32Topa thupiak bangin, Puanbuk sung le biaknatau ah a pai simin a khut le a peangte sil uh hi. 33Moses in Puanbuk le biaknatau kiimkot teng uumin a doituam kongbiang ah puankhai khai hi. Tuabangin ama in nasep theampo man zo hi.
Topa ii Ompuina Puanbuk tungah Meei
(Mi Simna 9:15-23)
34Tuasia ciang meei in Puanbuk tuam a Topa ii ompuina khuavak taang velvol sia in tua puanbuk dim hi. #1 Kum 8:10-11; Is 6:4; Eze 43:4-5; Tpl 15:8 35Hi bang ahi hu in Puanbuk sungah Moses tum thei ngawl hi. 36Puanbuk pan meei a kilapto ciang bekin Israel te in a ngiaphual mun dangah khiin uh hi. 37Tualai ah meei a kaai laiteng a ngiaphual khiin ngawl uh hi. 38Duisung ah a vathap sung tawntungin amate in Topa ii ompuina ahi, Puanbuk tungah sunin meei le zanin meikuang mu thei uh hi.
Currently Selected:
Pusuana 40: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
