Pusuana 38
38
Meihal Biakpiak natu Biaknatau Vawt
(Pusuana 27:1-8)
1Ama in meihal biakpiak natu in acacia thing taw biaknatau khat vawt hi. Tua in a dung a vai a kikim hi a, a sauna metre 2.2 le a zaina metre 2.2 le a saanna metre 1.3 ahi hi. 2Biaknatau taw sakhat a suak tu in ama in a king li te dawn doksak hi. Ama in tua a dokte taau taw tuam hi. 3Biaknatau ah vanh zak tu in bealte, keaute, kuangte, a koaite le vut luana kuangte zongh vawt hi. Hi vanh teng theampo taau taw vawt hi. 4Ama in taau saaksai khat vawtin biaknatau saanna a lang bansuk in biaknatau ii ngong nuai ah koi hi. 5Ama in zawn natu kual li vawtin a kingte li ah koi hi. 6Ama in acacia thing taw zawnna thingpumte vawtin, taau taw tuam a, 7biaknatau lang le lang ah a om kualte sungah thun hi. Biaknatau sia thingpheak taw vawtin a sung hawmsak hi.
Taaukuang Vawt
(Pusuana 30:18)
8Ama in Topa ii ompuina Puanbuk tumna kongbiang ah naseam numeite neisa limlanghte taw taau kuang le taau tawdap vawt hi. #Pu 30:18; 38:25-26; Pu 30:11-16
Topa ii Ompuina Puanbuk Doituam
(Pusuana 27:9-19)
9Ama in puanneal puankhaite taw Topa ompuina puanbuk atu doituam vawt hi. A thangsang pangh doina puankhaite sia metre 44 sau a, 10tua puankhaite sia ngunn taw kivawt puankhaina koaite le a ciangte taw taau tawdap kul a nei taau khuam kul tungah kikhak hi. 11A saksang pangh doina zongh tuabang ma ahi hi. 12Nitumna sang a pangh doina puankhaite sia metre 22 sau in, ngunn taw a kivawt puankhaina koaite le a ciangte taw ngunn tawdap sawm a nei khuam sawm tungah kikhak hi. 13A kongbiang omna nisuana sang teng doina sia metre 22 ma zai hi. 14-15Kongbiang langkhat veve puankhaite metre 6.6 veu zai a, tawdap thum a nei khuam thum tungah kikhak hi. 16Doituam kiimkot puankhai theampo puanneal phate taw kivawt hi. 17Khuam tawdapte taau taw kivawtin, vanh khaina koaite, ciangzawlte le khuam tung sitnate ngunn taw kivawt hi. Doituam kiimkot khuam theampo ngunn ciangzawlte taw kizom siat hi. 18Doituam tumna kongbiang puankhai sia vancii, a sandup le a san samul taw a kitak, thiamngel in a kizeam puanneal puan pha taw kivawt hi. Tua puankhai sia doituam ii puankhaite bangma in metre 9 sau a, metre 2 saang hi. 19Tua puankhai sia taau tawdap li a nei khuam lite tungah kikhak hi. Puan khaina koaite, a dawn tuamnate le a ciangzawlte ngunn taw kivawt hi. 20Puanbuk le doituam kiimkot letna khetphin theampo taau taw kivawt hi.
Topa ii Ompuina Puanbuk sung Na zakte
21Thupiak sawmte a ki atna suangpheak niite koina ahi, Topa ii ompuina Puanbuk sungah na zakte a nuai a bang ahi hi. Tua tepteena lai vawt tu Moses in sawl a, thiampi Aaron ii tapa Ithamar khutnuai a naseam Levi mite in vawt hi.
22Judah minam sung pan Hur ii tupa, Uri ii tapa Bezalel in Topa ii thupiak bangin seam siat hi. 23Ama a hupa Dan minam sung pan Ahisamach ii tapa Oholiab sia suang tung laikhen thiam, a ngeal thiam, le vancii, a sandup, a san samul puan le puanneal pha a tak thiam khat ahi hi.
24A thiangtho puanbuk atu Topa tungah a ki aap khamh teng a kizangh ngei khaikhin taw a kitee ciang kilogramme tul khat ngit hi. 25Misimna bangin a kipia ngunn teng a kizangh ngei khaikhin taw a kitee ciang kilogramme 3,430 ngit hi.#Pu 30:11-16; Mt 17:24 26Hite sia mihing kisim lai in mi sim ii 22 a piak teng kingawm in biakinn khaikhin taw a kitee ahi hi. Kum kul pan a tungsia teng a kisim ciang a vekpi mi 603,550 pha hi. 27Tua ngunnte sung pan kilogramme 3,400 teng a thiangtho Puanbuk le puankhai atu tawdap zakhat te vawt natu in kizangh a, tawdap khat ciang kilogramme 34 veu kizangh hi. 28Bezalel in, a taanglai ngunn kilogramme 30 taw a ciangzawlte, a khuamte tungah vanh khaina koaite le a dawn tuamnate vawt hi. 29Topa tungah a ki aap taau theampo kilogramme 2,425 ngit hi. 30Ama in tua taaute taw Topa ompuina Puanbuk tumna kongbiang tawdapte, taau saaksai a nei biaknatau, biaknatau atu vanh theampo vawt hi. 31Doituam kiim le a tumna kongbiang tawdapte le Puanbuk le doituam kiimkot letna in a kizangh khetphin theampo ama in taau taw vawt hi.
Currently Selected:
Pusuana 38: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
