Pusuana 35
35
Sabbath Ngeinate
1Moses in Israel taangpi taangta bup kaikhawm in amate tungah, “Hi thu sia na ngamtat natu uh Topa thupiak ahi hi: 2ni luk sung noma na, na seam tu uh a, ahizong ni sali ni sia ni thiangtho hi tu a, keima, na Topa atu a kikoituam, a ciliaphuai tawlngak ni hi tu hi. Tua ni in na a seam peuma kithatlum tu hi.#Pu 20:8-11; 23:12; 31:15; 34:21; Thiam 23:3; Thkna 5:12-14 3Sabbath ni in na inn uh ah mei ngawngawn thut ngawl tu nu hi,” ci hi.
Puanbuk Thiangtho atu Biakpiaknate
(Pusuana 25:1-9)
4Moses in Israel mite theampo tungah, “Hisia Topa thupiak ahi hi: 5Topa tungah piakkhiat khat nei vun. A pia nuam peuma in, khamh, ngunn, taau; 6puan neal; vancii, a sandup le a san samul puan; kealmul taw a kivawt puan; 7a san kinimh tuutal vun; savun neal; acacia thing; 8meidet sathau; noi sathau atu le ngimnamtui atu hel namtuite; 9ephod le Thiampi Lianbel ii awmdal ah bul tu suangmanpha san le a dang suangmanphate paipui tu nu hi.
Topa ii Ompuina Puanbuk atu Vanhzakte
(Pusuana 39:32-43)
10“Note sung pan thiamna nei naseam mi theampo hong pai in Topa thupiak theampo vawt hen: 11Puanbuk, a sitna le a puasang sitna, a vanh khaina koaite le a kalte, a zawlte, a khuamte le a tawdapte; 12Thuciamna Thingkuang, a puakna thingpumte, a sitna le a dalna puankhai; 13sabuai, a puakna thingpumte le a vanh theampo; Pathian a piak anluum; 14meidet natu meikhuam le a vanhte, meiinnte le meidet sathau, 15ngimnamtui halna tu biaknatau le a puakna thingpumte; noi sathau; ngimnamtui; Puanbuk kongbiang puankhai; 16meihal biakpiak natu biaknatau le a saaksai, a zawnna thingpumte le a vanh teng; kisilna kuang le a ngakna; 17a doituam atu puankhaite, a khuamte le a tawdapte; a doituam tumna kongbiang puankhai; 18Puanbuk le doituam atu khetphinte le khaute; 19Tuaciang Thiangtho Mun ah thiampite in na a sep ciang a silh tu a tuanngen, a et hoi puante — thiampi Aaron le a tapate atu puan thiangthote a vawt tu ahi hi.
Mipite in Amate Biakpiaknate Hong Paipui
20Israel mite theampo cia siat a, 21tuaciang Topa ii ompuina Puanbuk a vawt nuam peuma in Topa tungah piakkhiatna khat keng tek hi. Amate in biakna tu in a kisamh le thiampi puante vawt natu in a kisamh vanhte theampo hong paipui uh hi. 22Piak nopna thin a nei numei le pasal te in kizepna phinte, bilbaate, khutzungbute, khite le khamh suang manpha namcinte paipui in, Topa tungah aap uh hi. 23Puan neal; vancii, a sandup, a san samul puan; kealmul puan; a san a kinimh tuutal ii vun; ahibuale savun neal paipui uh hi. 24Ngunn ahizong, taau ahizong a pia theite in Topa atu in pia tek a, nasep natu khat pawpo ah a kizangh thei tu acacia thing a nei peuma in hong paipui tek uh hi. 25Thiamneal vawt thei numei theampo in amate vawtsa puan neal, khau le samul khau vancii, a sandup le a sante hong paipui uh hi. 26Amate in kealmul taw khauzam zongh vawt uh hi. 27A lampuite in ephod le awmdal ah a bul tu in suangmanpha san le a dang suangmanpha te, 28tuaciang meidet sathau, noi sathau le a ngimnamtuite atu in hel namtuite le sathau hong paipui uh hi. 29Topa in Moses tungah nasep tu a thupiak bangin, a pia nuam Israel mite theampo in Topa tungah a piakkhiatna tek hong paipui uh hi.
Topa ii Ompuina Puanbuk atu Khutthiam mite
(Pusuana 31:1-11)
30Moses in Israel te tungah, “Judah minam sung pan Hur ii tupa ahi, Uri ii tapa Bezalel Topa in teal zo hi. 31Topa in Bezalel sia ama ii vaangletna taw kidimsakin, khutthiamna, hi theina, le thiamneal nasep tuatuamte heaktheina, 32pungsaan ngeal thiamna tuatuamte le tua teng khamh, ngunn, le taaute taw vawt theina; 33kizepna suangmanpha tat thiamna; thingngel thiamna le thiamneal nasep tuatuamte pia hi. 34Topa in ama, Bezalel le Dan minam sung pan Ahisamach ii tapa Oholiab tungah midangte khutthiamna a hil tu in pilna pia zo hi. 35Topa in amate tungah khutthiamte, a ngeal thiamte, le thiamtak thiamte, vancii, a dup au le a san tuumul le a dang puante theampo sep thiamna pia zo hi. Amate in nasep namkim seam thei in, a ngeal thiamte ahi uh hi.
Currently Selected:
Pusuana 35: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
