Pusuana 34
34
A Nii Veina Suangpheakte
(Thuhil kikna 10:1-5)
1 Topa in Moses tungah, “A masate taw kibangin suangpheak nii vawt in a, na tapsak suangpheak masate tungah kammal teng tuate nii tungah ka at tu hi. 2Kithoai in a, Sinai Mualdawn ah kei taw kimu tu in zingsang ciang hong paito ta'n. 3Khat zongh kaato pui heak in a; mual tung koima ah kuama omsak heak in; tuu ahizong, khui ahizong, mualpeang ah tha heak in,” ci hi. 4Tuaciang Moses in suangpheak nii vawt a, Topa thupiak bang tatakin a zing ciang zingtuung in Sinai Mual tungah puato hi.
5Meeilom khat sungah Topa hong tuaksuk a, tualai ah ama taw ding khawmin, Topa ci in a min thiangtho thangsak hi. 6Topa in Moses mai kaantan a, tuaciang ama samin, “Keima in mulkimna le hesuakna taw a kidim Topa Pathian khat ka hi hi, ka thin uuk hakin, itna lian le thumaanna a lakpa ka hi hi. #Pu 20:5-6; Mi 14:18; Thkna 5:9-10; 7:9-10 7Ka kamciamte khang tul tam mama te tungah ka len a, siatna le mawna ka maisak hi; ahizong a pate a nute mawnate hangin tate le tute tungah, khang thum khang li dongin daan ka pia tu hi,” ci in pualaak hi.
8Moses in lei ah manlang tak kunsuk in bia hi. 9Ama in, “Topa awng, kei tungah nong lungkim takpi ahile kote taw hong paikhawm ta'n. Hi mihingte thinpui hi, ahizong kote siatna le mawna hong maisak ta'n a, nangma aituam mihing in hong saang ta'n,” ci hi.
Thuciamna Kithaksua
(Pusuana 23:14-19, Thuhil kikna 7:1-5,16:1-17)
10 Topa in Moses tungah, “Tu in Israel mite taw thuciamna khat ka vawt hi. Hi leitung minamte sungah a kivawt ngeingawl na thupite amate mai ah ka vawt tu hi. Keima, Topa ii na thupi ka vawt theinate mihing theampo in hong mu tu uh hi, banghang ziam cile note atu in nalamdang khat ka vawt tu hi. 11Tuni in kong piak thukhamte zui vun. Note maisang na manaw uh ciangin Amor te, Canaan te, Hit te, Periz te, Hiv te le Jebus te ka notkeak tu hi. 12Na thetna ngam ah a teang mihingte taw thukimna khote vawt heak vun, banghang ziam cile tuasia in note atu in thi theina thaang suak tu hi. 13Tua luangin a biaknataute baltham in, a khuam thiangthote lalcipsakin numeipathian Asherah milimte saattan vun. #Thkna 16:21
14“Pathian dang bia heak vun, banghang ziam cile Keima, Topa in kidempui dang ka dei bua hi. 15Tua ngammite taw thukimna khote bangma vawt heak vun, banghang ziam cile doai biate ii pathiante tungah sangaw biakpiakna a nei ciang, pathian biakpiakna an ne tu in hong sam tu a, note hong ze et tu hi. 16Na tapate in tua ngamdang numeite teenpui tha tu a, amate in kei tungah a thumaan ngawl natu le a doai pathiante a biak natu in na tapate lam khialpui tha tu hi.
17“Thik taw kivawt pathiante vawtin bia heak vun. #Pu 20:4; Thiam 19:4; Thkna 5:8; 27:15
18Tol saw ngawl Anluum Poaipi vawt suak vun. Kong thupiak bangin, Abib tha ni sali sung tol saw ngawl anluum ne vun, banghang ziam cile tua tha in Egypt pan pusuak nu hi. #Pu 12:14-20; Thiam 23:6-8; Mi 28:16-25
19Tapa suakciil le inn nganhing no suakciil a pa theampo keima aa ahi hi. #Pu 13:2 20Ahizong laa a suakciil pawpo sia a taangin tuu khat pia in lei kik tu nu hi. Na lei kik bua uh ahile a ngawng thiaktan vun. Tapaciil peuma lei kik vun.
Biakpiakna khat a keng ngawl peuma ka mai ah hong kilaak heak hen. #Pu 13:13
21Ni luk sung noma na sep tu hun na nei uh a, ahizong lothaw hun le anlaak hun ngawngawn in ni sali ni in naseam heak vun. #Pu 20:9-10; 23:12; 31:15; 35:2; Thiam 23:3; Thkna 5:13-14
22Na mangtaang anpal na laak kipat ciang Anlaak Poaipi khaamin, tangngam sung thingnga na kaikhop ciang Buk Poaipi khaam vun.#Thiam 23:15-21; Mi 28:26-31; Thiam 23:39-43
23Kum khatin thumvei, Keima Topa Israel te ii Pathian bia tu in na mi, pasal a minpiang nong pai tu uh hi. 24Note mai ah minamte notkeak in, na ngam kong keaksak zawkciang, poai khaam thumvei hun sung teng kuama in na ngam hong zaw tu hanciam ngawl tu hi.
25Nganhing taw biakpiakna nong nei uh ciang tol saw anluum hong pia heak vun. Paisan Poaipi hunsung na ngaw uh nganhing sa peuma a zingsang ciang dong koi heak vun. #Pu 12:10
26Kum simin na laak anpal sia Topa inn sungah hong paipui tavun.
Tuuno ahizong kealno ahizong a pui noaitui sungah huan heak vun. #Thkna 26:2; Thkna 14:21
27 Topa in Moses tungah, “Hi kammalte at in, banghang ziam cile nangma le Israel mite tungah thuciamna ka vawt sia, hi kammalte kibulphu hi,” ci hi. 28Tualai ah Moses an le tui ne ngawlin, sun sawmli le zan sawmli sung Topa taw omkhawm hi. Moses in Thupiak Sawmte ahi- thuciamna kammalte suangpheak tungah at hi.
Sinai Mual pan Moses Tuaksuk
29Moses in Thupiak Sawmte toai in, Sinai Mual pan hong tuaksuk ciang Topa taw kipaupui ahikom a maitang taang hi; ahihang ama in a taan hunlam he ngawl hi. #2 Cor 3:7-16 30Aaron le mihingte theampo in Moses maitang taang a mu ciang lau in neak ngam ngawl uh hi. 31Ahizong Moses in amate sam a, Aaron le taangpi lampuite theampo ama kungah pai in Moses in paupui hi. 32Tua zawkciang Israel mite theampo ama kungah kikhawm in, Topa ii Sinai Mual ah a piak thukham theampo Moses in amate tungah pia hi. 33Moses in thuson a man zawkciang dial khat taw a mai seal hi. 34Topa paupui tu in Topa ompuina Puanbuk sungah Moses a pai simin, a dial hawk hi. Hong pusua ciang son tu in, a thupiak theampo Israel mite tungah son a, 35amate in a maitang taang sia mu uh hi. Tuaciang Topa paupui tu in a pai kik dong dial taw a mai seal hi.
Currently Selected:
Pusuana 34: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
