Pusuana 36
36
1“Bezalel, Oholiab, le Puanbuk thianthosak natu a kisamh theampo vawt tu zia a he te, Topa ii thiamna le heaktheina a piak khutthiam dangte theampo in Topa thupiak bang linlianin na theampo seam tu uh hi,” ci hi.
Mipite in Letsong Tam mama hong Paipui
2Moses in Bazalel, Oholiab le Topa ii hi theina a piak khutthiamna a nei midangte le nasep a hu nuamte sam a, nasep kipan tu in sawl hi. 3Amate in Israel te ii Puanbuk thianthosak natu in a paipui piakkhiatna theampo Moses tung pan nga siat hi. Ahihang Israel mite in a piaksate zing simin Moses tungah pia tawntung lai hi. 4Tua zawkciang khutthiamna nei tua nasep a seam mite pai in, 5Moses tungah, “Topa ii hong thupiak nasepna atu in a kisamh za sang a tamzaw vanh, mihingte in hong paipui uh hi,” ci in zasak uh hi.
6Tua ahiciang, Moses in ngiaphual tengah Puanbuk thiangtho atu in kuama ii a piak thua ngawl natu thupia hi; tuasia ciang, mihingte in pia nawn ngawl hi. 7Hong paipui sa teng, nasep theampo zaw natu in kicing vaal liang hi.
Topa ii Ompuina Puanbuk Vawt
(Pusuana 26:1-37)
8Naseamte sung pan khutthiambel teng in Topa ii ompuina Puanbuk vawt uh hi. Amate in tua puanbuk sia vancii, a sandup, le a san samul taw a kitak cherub limte taw thiamngel puanneal bek 10 taw vawt uh hi. 9Tua puante a letna kibangin, metre 12 sau in, metre 2 beak hi. 10Amate in puandal nga teng khuikhawmin, a dang nga teng zongh a kibangin khuikhawm uh hi. 11Amate in tua puante nii puasang mong tengah vanci puan taw bilvangte vawt uh hi. 12Puan khat tungah bilvang sawmnga vawtin, a khat sia tung zongh ah sawmnga ma vawt uh hi. 13Amate in tua puante nii a pe natu in khamh kual sawmnga vawt uh hi.
14Tuaciang amate in Puanbuk sitna tu in kealmul taw kivawt puan sawm le khat vawt uh hi. 15Tua puante kikimsak siatin, metre 13 sau in, metre 2 beak hi. 16Amate in tua puante nga ciang khatin khuikhawmin, a dang luk teng khatin khuikhawm uh hi. 17Amate in tua puante a khakbel sia mong ah bilvang sawmnga vawt uh a, a dang khat sia tungah bilvang sawmnga ma vawt uh hi. 18A sitna sa khat a suak tu in tua puante nii a pe natu in amate in taaukual sawmnga vawt uh hi. 19Puanbuk sitna tu in amate in a san taw a kinimh tuutal ii vun taw a kivawt khat le savun neal taw a kivawt a puasang sitna khat, a sitna nii vawt thua uh hi.
20Amate in Puanbuk a kalpheak tu in acacia thing zangh uh hi. 21A mungte metre li saangin, centimetre 66 beak hi, 22a kalte khat le khat a kipee natu in a meang nii neisak hi. A kalpheakte tuabangin kivawt siat hi. 23Amate in thang sang atu a kalpheak kul, 24a meangte khat le khat a kipee natu in khat ii nuai ah ngunn tawdap nii veu, ngunn tawdap sawmli vawt uh hi. 25Puanbuk saksang atu a kalpheak kul, 26a mung khat ii nuai ah ngunn tawdap nii veu, ngunn tawdap 40 vawt uh hi. 27Puanbuk nitumna nungsang atu in a kalpheak luk 28a kingte ah a kalpheak nii vawt uh hi. 29A king ah a kalpheakte a bul pan pee in a dawn dongin kizomsak hi. Tua king nii a piangsak a kalpheakte nii sia tuabang ma in kivawt hi. 30Tuabangin a kalpheak liat om in, mung khat ciang tawdap nii tek ngunn tawdap sawm le luk om hi.
31Amate in acacia thingzawl sawm le nga, puanbuk a kalpheakte atu in pangh khat ah zawl nga veu, 32a langkhat ah a kalpheak nga le a nungsang nitumna sangah a kalpheak nga vawt uh hi. 33A kalpheakte ii lang khenna san pan a kithung zawlsau sia puanbuk mong khat pan mong khat dong a tuantung hi. 34Amate in a kalpheakte khamh taw tuamin, khamh taw ma a kituam a zawlte a len tu in khamh kualte thua uh hi.
35Amate in vancii, a sandup le samul san taw a kitak cherubim lim taw thiamngel puanneal puankhai khat vawt uh hi. 36Amate in puankhai khat khak natu in khamh taw a kizut, khamh koai taw a kithua acacia thing khuam li vawt uh hi. Tuaciang khuamte a len tu in ngunn tawdap li vawt uh hi. 37Amate in Puanbuk tumna kongbiang tu in vancii puan neal, a sandup le a san samul taw a kitak, thiamngel taw a zep puankhai khat vawt uh hi. 38Tua puankhai atu amate in a koaite taw a kithua, a dawn teng le a ciangte khamh taw a kituam khuam nga vawtin, tua khuamte atu in taau tawdap nga vawt uh hi.
Currently Selected:
Pusuana 36: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
