Pusuana 25
25
Puanbuk Thiangtho atu Sumpite
(Pusuana 35:4-9)
1 Topa in Moses tungah, 2“Kei tungah sumpi hong piak natu in Israel te son in. A pia nuam khat pawpo ii sumpite saang in. 3Hi sumpite sia: khamh, ngunn le taau; 4puanneal, vancii, a sandup le a san samulpuan; kealmul taw kivawt puan; 5a san a kinimh tuuvun, savun neal, acacia thing; 6meidet sathau, noi sathau le ngimnamtui atu hel namtuite; 7Thiampi Lianbel ii ephod tung le awmdal te tungah bul tu suangsante le suangmanpha dangte ahi hi. 8Amate sungah ka teen thei natu in, kei atu in mite in puanbuk thiangtho khat vawt tahen. 9Tuasia le a sung nazak tu te theampo kong lak tu ngealna bangin vawt tahen.
Thuciamna Thingkuang
(Pusuana 37:1-9)
10“Acacia thing taw thingkuang a sau centimetre 110, a zai centimetre 66, a saang centimetre 66 khat vawt in. 11A sung a pua khamh ciitak taw tuam in a, a mong kiimkot khamh taw zial in. 12A zawn natu khamh kual li vawt in a, a pangh lang le lang ah nii veve, a peang lite tungah bul in. 13A zawn natu in acacia thingpum sui in a, khamh taw tuamin, 14thingkuang pangh veve ah a kibul khamh kualte sungah thun in. 15Tua thingpumte khamh kualte sungah kinusia tu a, kila nawn ngawl het tu hi. 16Tuaciang nang kong piak tu thupiak teng a ki at suangpheak niite thingkuang sungah koi in.
17“A sitna khamh ciitak taw vawt in, a sau centimetre 110, a zai centimetre 66 hi tu hi. #Heb 9:5 18A kiseakpeak khamh taw cherub nii ii lim vawt in a, 19a sitna mong veve ah koi in. A sitna taw kipee, a sakhat tu in vawt in. 20Cherub niite ii lim sia a sitna tungah khat le khat kimaingat tu a, a tha kiphalte in tuasia liap tu hi. 21Suangpheakte nii thingkuang sungah koi in a tungah a sitna koi in. 22Tualai ah kong kisikpui tu a, cherub te ii a thate nii kilaklaw, a sitna tung panin Israel mite atu, ka thukhamte theampo nang kong pia tu hi.
Pathian A Kipia Anluum lui natu Sabuai
(Pusuana 37:10-16)
23“Acacia thing taw a sau centimetre 88, a zai centimetre 44, a saang centimetre 66 sabuai khat vawt in. 24khamh ciitak taw tuamin, a mong kiimkot khamh taw zial in. 25A kiil kiimkot millimetre 75 zaisakin, khamh taw tuam in. 26Khamkual li vawt in a, a peang omna king li ah bul in. 27Tua khamh kualte sabuai zawn natu thingpumte thun natu hi a, sabuai kiil ah bul tu ahi hi. 28A thingpumte acacia thing taw vawt in a, khamh taw tuam in. 29Sapittui biakpiakna ah a kizangh tu pakante, haite, haitungte le kuangte vawt in. Hi teng khamh ciitak taw kivawt tu hi. 30Sabuai sia Thuciamna Thingkuang mai ah kikoi tu a, kei hong kipia anluum thiangtho sia tua sabuai tungah kilui tawntung tu hi. #Thiam 24:5-8
Meivakna Khuam
(Pusuana 37:17-24)
31“Khamh ciitak taw meivakna khuam vawt in. A tawdap le a khuamte a kiseakpeak khamh taw vawt in; a zepna paakte, a momte le paakpalhte zongh meikhuam taw sakhat hi tu hi. 32A khuam panghte pan baak luk kaasak tu a, a lang le lang ah baak thum veve om tu hi. 33A baak luk te khat simin almond paak bangin a mom le a palh taw a kithua paak nam thum nei tu hi. 34A meikhuam sia almond paak bangin a mom le a paakpalh taw a kithua kizepna paak pha nam li nei tu hi. 35Kop thum a pha a baakte sim ii nuai ah a mom khat tek om tu hi. 36A momte, a baakte le meikhuam sia a kiseakpeak khamh ciitak bek khat taw a kivawt hi tu hi. 37A mai sang a taan thei natu in tua meivak khuam tungah meivak sali de in. 38Taiteete le kuangdalte khamh ciitak taw vawt in. 39Hi meikhuam le a nadang teng vawt natu in khamh ciitak kilogramme 35 zangh in. 40Mual tungah kong lak ngealna sia bang tatak in, tua nate pha takin vawt in. #Sawl 7:44; Heb 8:5
Currently Selected:
Pusuana 25: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
