Pusuana 24
24
Thuciamna Kikipsak
1 Topa in Moses tungah, “Nangma le Aaron, Nadab, Abihu le Israel lampui sawmsalite ka kung mual tungah hong kaato tavun a; a khuala thithimna ah na om uh laitak kunin hong bia tavun. 2A dangte hi ngawl, nangma bek in ka kung nong pai tu hi, midangte kuama in hong neak ngawl tu hi. Mipite sia mualtung ngawngawn zong ah kaato ngawl tu hi,” ci hi.
3Moses pai in a mipite tungah Topa thupiak teng le zui tu thu teng son a, mihing theampo in, “Topa ci theampo ka vawt siat tu uh hi,” ci in zo uh hi. 4Topa thupiak theampo Moses in at siat hi. A zing ciang zing tuungin mualpeang ah Moses in biaknatau khat sa in, Israel minam sawm le niite atu in suangtum sawm le nii phut hi. 5Tua zawkciang ama in tangvalte sawl a. amate in meihal biakpiaknate le khui pawl khat ngoin kipawlkhop sangaw biakpiakna te Topa tungah vawt uh hi. 6Moses in nganhing te ii chisan a lang la in kuang sungah koi a; a lang sia biaknatau ah the hi. 7Tua zawkciang Moses in Topa thupiak teng a ki at, thuciamna laibu la in mipite tungah nging takin sim hi. Amate in, “Topa thu ka ni tu uh a, ama thupiak theampo ka vawt siat tu uh hi,” ci uh hi.
8Tuasia ciang Moses in kuangte sung pan chisan la in mipite the hi. Ama in, “Hi chisan sia Topa ii hi thu teng hong piak lai in, ama ii note taw a vawt thuciamna a kipsak chisan ahi hi,” ci hi.#Mt 26:28; Mk 14:24; Lk 22:20; 1 Cor 11:25; Heb 10:29; Heb 9:19-20
9Moses, Aaron, Nadab, Abihu le Israel lampui sawmsalite mual tungah kaato a, 10amate in Israel te ii Pathian mu uh hi. A peang nuai ah vancii bang ahi, sapphire suangpheak khat taw a kibang om hi. 11Pathian in Israel lampuite bangma law ngawl hi; amate in Pathian mu a, tua zawkciang amate an nekhawm tui dawnkhawm uh hi.
Moses Sinai Mual tungah
12 Topa in Moses tungah, “Keima kung mual tungah hong kaato ta'n a, hi lai ah na om sungin mihingte kihil natu in keima at sa thukham teng theampo a om suangpheak nii kong pia tu hi,” ci hi. 13Moses le ama a hupa Joshua kithoai a, mual thiangtho ah kaato tu in Moses kipan hi. 14Moses in lampuite tungah, “Kong heak kik uh mateng hi lai ngiaphual pan hong ngak tavun. Aaron le Hur, note taw hi lai ah om hi; tua ahikom thukhen tu buaina a nei pawpo in amate kungah pai thei tu nu hi,” ci hi.
15Sinai Mual ah Moses kaato in, meei in tua mual tuamcip hi. 16-17Topa ompuina khuavak taang velvol sia mual tungah hong theng suk hi. Tua khuavak taang sia Israel mite atu in mualdawn ah a taang meikuang khat taw kibang hi. Ni luk sung meei in mual tuamcip in, a ni sali ni in meei sung pan Topa in Moses sam hi. 18Mualtung meei sungah Moses kaato hi. Tua munah Moses sun sawmli le zan sawmli om hi. #Thkna 9:9
Currently Selected:
Pusuana 24: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
