रोमियों 3
3
पौरमेशवर कै न्याय का इंतजार
1जै कुणिए पूछौ, कै यहूदी लोगौ कै बैगानै यहूदी लोगौ शै का फायदा औसौ? औरौ खतना कौरणौ का, का फायदा औसौ? 2ऐक यहूदी हौणौ कै बैजाए फायदै औसौ। सौबदै खास बात ऐजी औसौ कै, पौरमेशवर कै वचन यहूदी लोगौ खै सौंपै राए।
3जै कुणिए यहूदी लोग पौरमेशवर आरी धोकैबाज निकल़ै तौ तिनकौ का हौंदौ? का तिनकै धोकैबाज हौणौ कै बावजूद बै पौरमेशवर तिनकै साथै आपणै वादै कै पूरा कौरणौ दा भरोसेमंद ना हौंदा। 4ना! बिल्कुल नी! यानी पौरमेशवर सौदा साचौ बौल़ौ औरौ हरेक आदमी झूठा ठौहरौ, जैशैकै पवित्र शास्त्र पौरमेशवर कै बारै मुंजी बौल़ौए,
“जिथलैई तू आपणी बातौ दा धरमी ठोहरदा
औरौ न्याय कौरदै सौमय तू जय पाला।”
5पौरौ जै अमारै दुष्ट काम पौरमेशवर कै र्धामिकता ठौहरौ, तौ आमै का बुलू? का ऐजौ कै पौरमेशवर का गुस्सा हौणा औरौ आमु सौजा दैणा गौलत औसौ? (ऐजौ तौ हांव आदमी कै तौर पांदी बुलू) 6ना! बिल्कुल नी! जै पौरमेशवर ठीक शै यहूदी लोगौ का न्याय नी कौरदा तौ ऐजै बात जाणै बौझेयौंदे औसौ कै सै ओकी लोगौ का न्याय बै सोही तरीकै शै ना कौरे सौकौ।
7किछै लोग बौल़ै सौकौ, “जै मैरै बैईमानी पौरमेशवर कै सौचाई कै बौतांव औरौ तैसी जादा महिमा भैटौ तौ सै कैशै मैरा न्याय कौरे सौकौ औरौ मुखै पापी औरौ दोषी ठोहराए सौकौ?” 8किछै लोगै ऐजौ बौलेयौ आमु पांदी आरोप लौआ कै आमुए बौल़ौ, “आव आमै बुरु कौरौ ताकि इथलैई अच्छाई निकल़ौ।” जैशैखै आमु पांदी ऐजा दोष लाया बै जांव, औरौ किछै बौल़ौए कै इनका ऐजाई बौलणा औसौ। पौरौ जू लोग मैरै बारै मुंजी ऐशणी बातौ बौल़ौ, सैजै सौजा पाणौ कै लायक औसौ।
सौबीए पाप कौरा
9आमै का बौल़ै सौकु? का आमै यहूदी लोग, गैर यहूदी लोगौ शै आछोड़ै औसौ? ना! बिल्कुल नी! जिथुकै आमै यहूदी लोगौ औरौ बैगानै यहूदी लोगौ दुईनै पांदी ऐजा दोष लाए राए कै सै सौब कै सौब पापौ की शौकतै कै हवाले औसौ। 10जैशैकै पवित्र शास्त्र बौल़ौ
“पौरमेशवर कै नज़र दै कुणिए बै धरमी ना आथी, ऐक बै ना आथी।
11ऐशणा ऐक बै आदमी ना आथी जू सौथी कै सौमझौए कै का सोही औसौ;
कुणिए बै पौरमेशवर कै ना जाणणा चांव।
12तिनुऐ पौरमेशवर कै छोड़े दिया, सौब कै सौब पौरमेशवर कारिए निकम्मे बौणै गौवै;
कुणिए भोलाए कौरणौवाल़ा ना आथी, ऐक बै ना आथी।
13तिनकै मुँह खोलैयौंदे क्रब शै आणौवाल़ी शोड़ाण कै जैशणै औसौ।
तिनकै जीभ झूठ लैई भोरेयोंदे औसौ।
तिनकै शब्द शोंगोऊं कै ज़हर कै जैशणै औसौ जू नुकसान कौरौ औरौ मौत कै बौजैह बौणौ।
14औरौ तिनकी बातौ शराप औरौ कड़वाहट लैई भोरेयौंदे औसौ।
15सै खून कौरणौ कै सोकने औसौ,
16सै जिथै बै जांव तिथै बुराई औरौ पीड़ो लांव।
17सै ओकी लोगौ कै साथै झोगड़े कै बिना रौए ना सौकौ।
18तिनुमुंजी पौरमेशवर का कुणजाई डौर ना आथी।”
19आमै जाणुए, कै मूसा कै कानून जू किछै बौल़ौए, सै तिनु लोगौ शै बौल़ौ, जू मूसा कै कानून कै अधीन औसौ। ताकि लोगौ कै भानै बाणणौ शै रौकै सौकौ, औरौ दुनिया कै सौब लोग पौरमेशवर कै सामणै दोषी ठैहराए जांव। 20मूसा कै कानून का पालन कौरेयौ लोग पौरमेशवर कै साथै सोही ना ठौहरै सौकौ, इथकारिए मूसा कै कानून कै दवारा आमु आछी तरह शै जाणु कै आमुए पाप कौरे राए।
बिशवाश लैई पौरमेशवर कै धार्मिकता
21पौरौ ऐबै मूसा कै कानून कै सौबी नियमौ का पालन बिना कौरे पौरमेशवर आमु आपणै साथै सोही साबित कौरौ। मूसा कै कानून दै औरौ पौरमेशवर कै बातौ बौताणौवाल़ै कै किताब दु लैखै राए कै कैशैकै आमु पौरमेशवर कै दवारा धरमी बाणै गौवै। 22यानी आमै पौरमेशवर कै सामणै धरमी तोबै बौणु जोबै आमै यीशु मसीह पांदी बिशवाश कौरु। जिथुकै पौरमेशवर सौबी कै साथै ऐक जैशणा बर्ताव कौरौ;
23इथकारिए सौबीए पाप कौरे राए औरौ पौरमेशवर कै तियौं महिमा शै दूर औसौ जू सै दैणै चांव, 24पौरौ पौरमेशवर कै अनुग्रह शै तैणै आमु यीशु मसीह कै दवारा पाप कै सौजा शै छुटकारा दिया जू कै यीशु मसीह दा औसौ, पौरमेशवरे आमु बिना किछै कौरे ही धरमी साबित कौरे राए।
25-26पौरमेशवरे मसीह कै बलिदान कै रुप दा भैजा, मसीहे आपणा लोऊ बौऊवा, इथकारिए मसीह पांदी बिशवाश कै दवारा आमै पौरमेशवर कै धोरे आए सौकु, औरौ पौरमेशवरे ऐजौ इथकारिए कौरौ ताकि सै ऐजौ दिखाए सौकौ कै पुराणै सौमय दौ तैणै सोही कौरौ जोबै तैणै पापी लोगौ कै माफ कौरणौ दा सब्र दिखोऊवा। औरौ ऐजी बातौ ऐजौ दिखांव कै पौरमेशवर सोही औसौ जोबै सै यीशु पांदी बिशवाश कौरणौवाल़ै खै अपनांव।
27तौ ऐबै आमै कियों बातौ पांदी घमण्ड कौरु? तिथका तौ कुणजाई मतलब ना आथी। कुणजै नियमौ की बौजैह शै? का अमारै मूसा कै कानून का पालन कौरणौ शै? ना, पौरौ यीशु मसीह पांदी बिशवाश कौरणौ की बौजैह शै।
28इथकारिए आमै जाणुए कै पौरमेशवरे आमु यीशु मसीह पांदी बिशवाश कौरणौ शै धरमी साबित कौरे राए, ना कै मूसा कै कानून कै मानणौ शै।
29पौरमेशवर सिरफ यहूदी लोगौ का पौरमेशवर ना आथी, पौरौ बैगानै यहूदी लोगौ का बै पौरमेशवर औसौ।
30जिथुकै ऐकैई पौरमेशवर औसौ, जू खतनावाल़ौ कै बिशवाश लैई औरौ बिना खतनावाल़ौ कै बै बिशवाश लैई धरमी साबित कौरौ। 31तौ का आमै मूसा कै कानून कै बिशवाश कै दवारा मिटाए दियु? ना! बिल्कुल नी! पौरौ आमुए तौ मूसा कै कानून कै तिथका सोही नतीजा दैय लौआ।
Currently Selected:
रोमियों 3: SRXNT
Highlight
Share
Compare
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
