रोमियों 4
4
अब्राहम बिशवाश लैई धरमी बौणा
1ऐबै आमै यहूदी हौणौ कै नातै आपणै पुराणिया अब्राहम कै बारै मुंजी का बुलू? तैसी कियों बौजैह शै धरमी गिणा गौआ? 2जिथुकै जै अब्राहम आछै कामौ लैई धरमी ठोहराया जांदा, तौ तैसीकै घमण्ड कौरणौ कै बौजैह हौंदै, पौरौ सै आपणै आछै कामौ की बौजैह शै पौरमेशवर कै सामणै घमण्ड ना कौरे सौकौ। 3पवित्र शास्त्र का बौल़ौ? ऐजौ कै, “अब्राहमै पौरमेशवर कै वादै पांदी बिशवाश कौरा, औरौ पौरमेशवरे तैसी धरमी साबित कौरा।” 4काम कौरणौवाल़ै कै धियाड़ी दैणै दान ना आथी, पौरौ हक सौमझा जांव।
5पौरौ जू आदमी पौरमेशवर का पक्ष पाणौ कारिए काम ना कौरौ पौरौ जू पापी लोगौ खै धरमी ठोहराणो वाल़ै पौरमेशवर पांदी बिशवाश कौरौ, तैसका बिशवाश तैसी कारिए धार्मिकता गिणा जांव। 6ऐशैखैई, राजा दाऊदे लैखै राए, कै जैसी आदमी कै पौरमेशवर कामौ कै बिना धरमी गिणौ, तैसी आशीष बै दैंव:
7“धन्य औसौ सैजै जिनकै अधरम माफ हौए,
औरौ जिनकै पाप तैणै माफ कौरे दियै।
8धन्य औसौ सैजा आदमी जैसकै पापौ का लैखा पौरमेशवर ना लोन्दा।”
9तौ ऐजै धन्य वचन, का खतनावाल़ै ही कारिए औसौ, या बिना खतनावाल़ै कारिए बै औसौए? आमुए सैजौई लो बौल़ै जू पवित्र शास्त्र बौल़ौ, “अब्राहमै पौरमेशवर कै वादै पांदी बिशवाश कौरा, औरौ पौरमेशवरे तैसी धरमी साबित कौरा।” 10तौ अब्राहम कोलो धरमी गिणा गौआ? का जौल़ौ तैसका खतना हौआ थिया या जौल़ौ तैसका खतना ना हौए रैई थी? खतने कै हालत दा नी पौरौ बिना खतने कै हालत दा ही पौरमेशवरे तैसी धरमी गिणा।
11पौरमेशवरे तैसी खतना हौणौ दै आगैई धरमी साबित कौरे राए थिया, खतने का निशान ऐजौ दिखांव कै पौरमेशवर तैसी धरमी सौमझौ। पौरमेशवर बिशवाश कौरणौवाल़ौ का आत्मिक पिता औसौ पौरौ जिनका खतना ना हौए रैई। तोबै बै सैजै लोग आपणै बिशवाश कै जरिए ही धरमी गिणै जालै। 12औरौ अब्राहम खतना कौरेयौंदे का पुराणिया औसौ, जू ना सिरफ खतना पांदी आश राखदै बैई औसौ, पौरौ जिनुकैईं तैशणा बिशवाश औसौ, जैशणा अमारै पुराणिया अब्राहम का थिया, जू तैणै खतना कौरणौ दै आगै कौरे राए थिया।
13पौरमेशवरे अब्राहम औरौ तैसकी आणौवाल़ी पीढ़ी शै वादा कौरा कै सै तिनु इयौं दुनिया कै वारिस बाणदा। ऐजा वादा इथकारिए ना कौरे रैई थी जिथुकै अब्राहमै मूसा कै कानून का पालन कौरे राए थिया, पौरौ पौरमेशवर दा तैसकै बिशवाश की बौजैह शै तैसी धरमी साबित कौरा। 14जिथुकै जै दुनिया पांदी औधिकार राखणौ का वादा पौरमेशवरे तिनु लोगौ कै दैय राखा, जू मूसा कै कानून का पालन कौरौ, तौ बिशवाश बैकार औरौ प्रतिज्ञा ऐई गौए। 15मूसा कै कानून ना मानणोवाल़ौ पांदी पौरमेशवर गुस्सा हौंव, औरौ जिथै मूसा कै कानून ना आथी तौ तिथै तिथकै टाल़मटाल़ी बै ना आथी।
16इथकारिए लोगै बिशवाश कै दवारा अनुग्रह ही शै पौरमेशवर का वादा पौऊवा। इयौं बौजैह शै अब्राहम कै सौबी संतानो कै ऐजा वादा भैटी सौकौ। जू सिरफ मूसा कै कानून मानणोवाल़ै कै ना आथी, पौरौ ऐजा सौबी आदमी कै औसौ जू अमारै पुराणिया अब्राहम कै जैशणा बिशवाश शै जीवन जियौं। 17पवित्र शास्त्र बौल़ौ, “मोऐं ताखै बौहुती जाति का पुराणिया ठोहराए राखा” पौरमेशवर कै नोज़रो दा अब्राहम अमारा पिता औसौ। तैणै तैसी पौरमेशवर पांदी बिशवाश कौरा, जू मौरेयौंदे कै जियुंदी कौरौ औरौ तिनु चीज़ौ कै बै वजूद दी लांव जिथका वजूद ना आथी।
18-19पौरमेशवरे अब्राहम कै बौल़ौ कै तैसकै भौरिशै संतान हौंदै, पौरौ अब्राहमै दैखौ कै संतान पौयदा कौरणौ कारिए सै बूढ़ा औसौ, जिथुकै सै लमसम शौई सालो का हौए गौआ थिया। तैसकै घोरवाल़ी सारा बै ऐबै संतान पौयदा ना कौरे सौकौ थै। ऐबै जोबै कै तैसकै पिता बौणणौ कै उमीद ना दैखै रैई थी, तोबै बै तैसका बिशवाश कमजोर ना होई। सै बिशवाश औरौ आशा कै साथै मोजबूत रौआ।
20औरौ ना ही अबिशवाशी हौयौ पौरमेशवर कै प्रतिज्ञा पांदी शक की, पौरौ बिशवाश दा मोजबूत हौयौ पौरमेशवर कै महिमा कौरे, 21औरौ निशोंक हौयौ जाणौ कै जियौं बातौ कै पौरमेशवरे प्रतिज्ञा कौरे राए, सै तियौं पूरा कौरणौ दा शौकतीशाली औसौ। 22अब्राहम कै बिशवाश की बौजैह शै, पौरमेशवरे तैसीकै धरमी साबित कौरा।
23औरौ ऐजा वचन कि, “अब्राहम कै पौरमेशवर पांदी बिशवाश कौरणौ कै दवारा धरमी साबित कौरा,” ना सिरफ तैसी कारिए लैखै रैई, 24पौरौ आमु कारिए बै पौरमेशवर धरमी साबित कौरौ, जै आमु पौरमेशवर पांदी बिशवाश कौरु, जैणै अमारै प्रभु यीशु कै मौरेयौंदे मुंजीदा जियुंदी कौरा, तौ आमु बै बिशवाश की बौजैह शै धार्मिक मानै जांदै। 25यीशु अमारै पापौ कारिए मौरे गौआ, औरौ पौरमेशवर आमु धरमी बाणणौ कारिए तैसी औटेयौ जियुंदी कौरा।
Currently Selected:
रोमियों 4: SRXNT
Highlight
Share
Compare
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
