प्रेरितो कै काम 19
19
इफिसुस शहर दा पौलुस
1जोबै अपुल्लोस कुरिन्थुस शहर दा थिया, तोबै पौलुस दूरदराज प्रदेशो शा हौयौ कै इफिसुस शहर दा ओऊवा, औरौ तिथै किछै चैलै आरी भैटिया। 2तैणै बौल़ौ, “का तुऐं बिशवाश कौरदै बैई पवित्र आत्मा पाए राए?” तिनुऐ तैसीखै बौल़ौ, “आमुए तौ पवित्र आत्मा की चौर्चा बै शौणै ना रैई।”
3पौलुसे तिनुखै बौल़ौ, “तोबै तुऐं कैशणा बपतिस्मा लोए राए, तौ इथका का मतलब थिया?” तिनुऐ बौल़ौ, “आमुए सैजा बपतिस्मा लोए राए जू यूहन्ना दैंव थिया।” 4पौलुसे बौल़ौ, “यूहन्नाए तिनु लोगौ खै बपतिस्मा दिया जिनुवै पाप कौरणै छोड़े राए, औरौ पौरमेशवर कै ढौबौ फिरै गौवै। पौरौ तैणै इस्राएल कै लोगौ खै बौल़ौ कै सै यीशु पांदी बिशवाश कौरौ जू तैसकै बाद आन्दा, जू कै मसीह औसौ।” 5ऐजौ शोणेयो तिनुऐ प्रभु यीशु कै नांव शै बपतिस्मा लौआ। 6औरौ जोबै पौलुसे तिनु पांदी हाथ राखै, तौ तिनु पांदी पवित्र आत्मा ओऊवा, औरौ सै सांत-भांत कै भाषा बौलदै औरौ पौरमेशवर की बातौ बौतांदै लागै। 7ऐजै सौबै लमसम बारौ मर्द थिए।
8तोबै पौलुस यहूदी सभा-घोरो दा जायौ ती मीनै तौड़ी निडर हौयौ बौलदा रौआ, औरौ पौरमेशवर कै राज्य कै बारै मुंजी बैहस कौरदा औरौ सौमझांदा रौआ। 9पौरौ जोबै किछै लोगै कठोर हौयौ तैसकी बातौ का बिशवाश नी कौरी पौरौ लोगौ कै सामणै ऐसी मसीह गुट कै बुरु बौलदै लागै, तोबै तैणै तिनुखै छोड़े दियै औरौ चैलै कै जौई कौरे दियै, औरौ रौज तुरत्रुस इसकूलौ दै शिक्षा दैया कौरौ थिया। 10दो सालो तौड़ी ऐशैखैई हौंदौ रो, इथै तौड़ी कै एशिया प्रदेश कै रौणौवाल़ै यहूदी लोगै औरौ यूनान देश कै रौणौवाल़ै सौबी लोगै प्रभु का वचन शौणै पोऊवा।
इफिसुस शहर दै सामर्थ कै अनौखै काम
11पौरमेशवर पौलुस लैई अनौखै औरौ चौमत्कार कै काम दिखांव थिया। 12इथै तौड़ी कि रुमाल औरौ खोटणो तैसकै शोरीरो पांदी छुवायो कै बीमारों पांदी पांव थिए, औरौ तिनकी बीमारी ठीक हौए जांव थी; औरौ दुष्टआत्माएं तिनु मुंजी दी आगु जांव थी।
13पौरौ किछै यहूदी लोग जू झाड़ फूंक कौरेयौ दुष्टआत्माओं खै बायरै घाड़ो थिए, ऐजौ कौरदै लागै कै जिनुदी दुष्टआत्मा हौंव तिनु पांदी यीशु कु नांव लोयो झाड़ फूंक कौरेयौ बौलदै लागै, “जैसी यीशु का प्रचार पौलुस कौरौ, हांव तुऔं बायरै आणौ कै आज्ञा दियु।” 14औरौ सिक्कवा नांव कै ऐकी मुख्य यहूदी पुरोहित कै सात बैटै थिए, जू ऐशणौ सांडो थिए।
15पौरौ दुष्टआत्माएं जवाब दिया, “यीशु खै हांव जाणुए, औरौ पौलुस खै बै पौछेयाणुए; पौरौ तुऐं कुण औसौ?” 16औरौ तैसी आदमीए जैसदै दुष्टआत्मा थै; तियैं तिनु पांदी पिल़चैयो, तिनु सौबी खै आपणै काबू दै कौरे दियै, औरौ तिनुखै ऐशै मारै, कै सै नांगै औरौ घायल हौयौ तैसी घोरो पौरैशै आगु दोऊड़ै। 17ऐजै बात इफिसुस शहर कै रौणौवाल़ै सौबै यहूदी औरौ यूनान देश कै लोग बै जाणै गौवै, औरौ तिनु सौबी कै डौर लागै गौआ; औरौ प्रभु यीशु कै नांव कै बौड़ाए हौए।
18औरौ जिनुवै बिशवाश कौर राए थिया, तिनुमुंजी दै बौहितै लोगै आयौ आपणै-आपणै बुरै कामौ खै खुलैआम मानै पाए। 19औरौ जादू टोना कौरणौवाल़ै मुंजीदै बौहितै आपणी-आपणी पोथियां कौठी कौरेयौ सौबी कै सामणै जोल़ाए दी; औरौ जोबै तिनकै कीमत जोड़े, तौ पचाश हजार चांदी कै सिक्को कै बराबर निकल़ी। 20ऐशैखैई प्रभु का वचन शौकतै कै साथै फौयल़दा गौआ औरौ हावी हौंदा रौआ।
21जोबै ऐजी बातौ हौए गोई तोबै पौलुसे फोयसला कौरा कै मकिदुनिया औरौ अखाया प्रदेशो कै बिशवाशियौं आरी भैटिणौ कै बाद यरूशलेम शहर कै जोऊंबा, औरौ बौल़ौ, “यरूशलेम शहर जाणौ कै बाद मैरै राजधानी रोम शहर खै बै दैखणौ जौरुरी औसौ। 22इथकारिए आपणी सेवा कौरणौवाल़ै मुंजीदै तीमुथियुस औरौ इरास्तुस खै मकिदुनिया प्रदेश दै तिनुखै आपी दै औगौड़ियौ भैजै दियै, औरौ आपी किछै दूसौ तौड़ी एशिया प्रदेश कै इफिसुस शहर दा रौआ।”
इफिसुस शहर दा रोल़ा
23तोलो कै सौमय मसीह कै गुट कै बारै मुंजी बौड़ा रोल़ा हौआ। 24जिथुकै दिमेत्रियुस नांव का ऐक सुनार यूनान कै देवी अरतिमिस देवी कै मन्दिर की चांदी कै मूर्ति बाणौ थिया, औरौ सै कारीगरो कै तिथु बाणणौ कारिए बौहिता पोयसा दैंव थिया। 25दिमेत्रियुसे आपणै कारीगरो खै बोईदै औरौ ऐशणी चीज़ौ कै कारीगरो खै बै कौठै कौरेयौ बौल़ौ, “ओए रै भाईयों तुऐं जाणौ कै ऐसी कामौ लैई आमु किशैक धन भैटौ। 26औरौ तुऐं दैखौ औरौ शुणौए कै सिरफ इफिसुस शहर ही नी, पौरौ एशिया प्रदेश कै सौबै गांव दै बौल बौलेयौ ऐसी पौलुसे बौहितै लोगौ खै सौमझाए औरौ भरमाए बै राए, कै जू हाथौ की कारीगरी औसौ, सै ईशवर ना आथी। 27औरौ ऐबै सिरफ ऐसी ऐकी बातौ का ही डौर नी आथी कै अमारै ऐसी धान्धे की इज्जत जांदी रोंदी, पौरौ ऐजौ कै महान देवी अरतिमिस देवी का मन्दिर बैकार सौमझा जांदा औरौ जैसी पूरै एशिया प्रदेश औरौ दुनिया भर दा पूजौए इथकै खासियत बै जांदी रोए।”
28सौबै कारीगर ऐजौ शोणेयो कै गुस्से शै भोरै गौवै औरौ लैरौ मारैयौ बौलदै लागै, “इफिसुस शहर की अरतिमिस देवी, महान औसौ!” 29औरौ सारै नोगरो दा बोईता रोल़ा मोचाए दिया औरौ लोगै मकिदुनिया प्रदेश कै रौणौवाल़ै गयुस औरौ अरिस्तर्खुस, खै जू पौलुस कै साथी यात्री थिए, पाकड़ै दियै, औरौ ऐक साथै रंगशाला दै दौड़ै गौवै।
30जोबै पौलुस बै रंगशाला दा भीतरै जायौ लोगौआरी बात कौरणा चांव थिया तौ चैलै तैसी जाणौ ना दी। 31आसिया प्रदेश कै राज्यपालो मुंजीदै बै तैसकै कैई दोस्ते तैसीया बैवरा भैजा औरौ बिन्ती कौरे, कै रंगशाला दै जायौ आपणै जान खै खतरै दै नी पाया। 32रंगशाला कै भीतरै, सौबी लोगै लैरौ मारी लोई थी, कुणिए किछै लैरौ मारी लोई थी तौ कुणिए किछै ओकी; औरौ सौब ठुँ गड़बड़ थियु। औरौ बौहितै लोग तौ ऐजौ जाणौ बै नी थिए कै किथु कौठै हौए रौवै।
33तोबै भीड़ौ मुंजीदै किछै यहूदी लोगै सिकन्दर खै भीड़ कै सामणै ढोकयोऊंवा, औरौ औगौड़ियौ कौरा औरौ सिकन्दरे मेसो रौयौ हाथौ लैई इशारा कौरेयौ लोगौ खै सौमझाणौ कै कौचिश कौरे लोए थै। 34पौरौ जोबै तिनुऐ जाणै पोऊँ कै सै यहूदी औसौ औरौ यहूदी लोग, मसीही लोगौ साए मूर्तिपूजा ना कौरौ, तौ सौब कै सौब ऐकी भाषा दै दो घांटे तौड़ी लैरौ मारदै रौवै, “इफिसुस शहर की देवी अरतिमिस देवी, महान औसौ।” 35तोबै नोगरो कै मन्त्रीए लोगौ कै चुपी कौरायो बौल़ौ, “ओए रै इफिसुस शहर कै लोगौ, सौबवे जाणौए, कै इफिसियों का नोगर महान देवी अरतिमिस कै मन्दिर की दैखभाल कौरे लोए, औरौ तियौंकै पवित्र मूर्ती गौयणी पौरैशी उदी छुटी रोए। 36औरौ जोबै कै इनु बातौ का खातमा ना हौए सौकौ, तौ ठीक औसौ, कै तुऐं चुपी रौंव; औरौ बिना सोंचै-सौमझै किछै नी कौरेया। 37जिथुकै तुऐं इनु आदमी खै लाए राए, जू ना मन्दिर कै लूटणौवाल़ै आथी, औरौ ना अमारी देवी कै नेंदैया कौरणौवाल़ै आथी।
38जै दिमेत्रियुस औरौ तैसकै साथी कारीगरो खै कोसीआरी बै शिकायत हौंव तौ सै अदालत दै जाए सौकौ, औरौ तिनकै झोगड़े का न्याय कौरणौ कारिए तिथै राज्यपाल बै औसौ; तिथैशै लोग ऐकी दूजै पांदी इलजाम लाए सौकौ। 39पौरौ जै तुऐं कोसी ओकी बातौ कै बारै मुंजी किछै पूछणु चांव, तौ शहर कै सभा दा फोयसला कौरा जांदा। 40जिथुकै मुखै डौर औसौ कै आमै रोम देश कै सरकार दवारा रोल़ा शुरु कौरणौ कै इलजाम लाए जाणौ कै खतरै दै औसौ। इथकारिए कै इथकै किछै बौजैह नी आथी, औरौ आमु इयौं भीड़ कै कौठै हौणौ का किछै जोवाब ना दैय सौकु।” 41औरौ ऐजौ बौलेयौ तैणै सभा कै आगु छाड़ै।
Currently Selected:
प्रेरितो कै काम 19: SRXNT
Highlight
Share
Compare
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
