प्रेरितो कै काम 20
20
मकिदुनिया, यूनान औरौ त्रोआस दा पौलुस
1जोबै रोल़ा बोन्द हौए गौआ तौ पौलुसे चैलै खै बौएदैयौ हिम्मत दै, औरौ तिनकै धोरे दा आगु जायौ कै मकिदुनिया प्रदेश कै ढौबौ हौटा। 2तैसी सारै प्रदेश दा हौयौ औरौ चैलो खै बैजाए हिम्मत दैयौ कै सै यूनान प्रदेश जिथु अखाया प्रदेश बै बौल़ौ तिथै ओऊवा। 3जोबै तीन मीनै रौयौ कै तिथैदा जहाजो पांदी सीरिया प्रदेश कै ढौबौ जांदा लागै रौआ थिया, पौरौ तैणै शुणौ कै किछै यहूदी नेता तैसी बाटो पुंडा मारणौ कै ताको दै थिए औरौ इथकारिए तैणै मकिदुनिया प्रदेश शै हौयौ सीरिया प्रदेश खै जाणौ का फोयसला कौरा।
4इयौं यात्रा दै बिरीया नोगर कै पुरूर्स का बैटा सोपत्रुस औरौ थिस्सलुनीके शहर मुंजीदै अरिस्तर्खुस औरौ सिकुन्दूस, औरौ दिरबे नोगर का गयुस, औरौ लुस्त्रा नोगर शा तीमुथियुस, औरौ एशिया प्रदेश का तुखिकुस औरौ त्रुफिमुस आसिया तौड़ी अमारै साथी यात्री थिए। 5ऐजै साथी यात्री आमु दै औगौड़ियौ जायौ कै त्रोआस शहर दै पोंचैयो आमु सै ठोल़दै लागै। 6पौरौ आमु दुए बाटी बाट हौयौ फिलिप्पी शहर कै यात्रा कौरे औरौ अखमीरी रोटी कै तैयारो कै बाद फिलिप्पी शहर शै पाणी कै जहाज पांदी बौठेयो पाँची दूसौ दै त्रोआस शहर दै तिनकै धोरे पौऊंचै, औरौ साती दूसौ तौड़ी तिथी रौवै।
यूतुखुस को जियुंदी हौणौ
7हफते कै आगलै दूसै जोबै आमुए प्रभु भोज की रोटी तौड़णौ खै कौठै हुवे, तौ पौलुसे जू दूजै दूसै आगु जांदा लागै रौआ थिया, तिनुआरी बातौ कौरी, औरौ आधी राती तौड़ी उपदैश कौरदा रौआ। 8जैसी उपले कोमरै दै आमु कौठै थिए, तिथै बौहितै दिवे बौल़ै रौवै थिए।
9औरौ यूतुखुस नांव का ऐक जवान खिड़की पांदी बौठेयो खै गैहरी नींदो दा झौकै रौआ थिया, औरौ जोबै पौलुस बीसती तौड़ी बातौ कौरदा लागा तौ सै नींदो कै झौकै लैई तिजै मंजिल शा उदा रिड़ा, औरौ सै मौरे गौआ। 10पौरौ पौलुस उदा हौटा औरौ तैसकै धोरे जायौ हौंगटै दा कौरेयौ गल़े लायौ खै बौल़ौ, “घबराये नी; जिथुकै ऐजा इबी बै जियुंदी औसौ।” 11औरौ तैणै औटेयौ ऊबै जायौ खै रोटी तौड़ी तोबै प्रभु भोज लौआ औरौ होटेयो कै संगति कौरे। औरौ इशैक देर तौड़ी तिनुआरी बातौ कौरदा रौआ कै झीश हौए गौए; औरौ तिथकै बाद सै आगु हौटा।
12औरौ सै तैसी जवानो खै जियुंदा लायौ खै बौहितै खुशी हुवे।
त्रोआस शै मीलेतुस की यात्रा
13पौलुसे फोयसला लौआ कै सै अस्सुस नगर कारिए हांडेयो यात्रा कौरेयौ जांदा। बाकी आमै सौबै जोणे जहाजो पांदी समुन्द्री बाटो बाटी तैसदै औगौड़ियौ हौटै गौवै, औरौ आमै तिथैदै तैसीकै आपणै साथै जहाजो पांदी निणो कै बारै मुंजी सोंचै लो थियु। 14जोबै सै अस्सुस नगर दा आमु कै भैटा तौ आमुए तैसी जहाजो पांदी बोठाल़ेयो खै मितुलेने नगर दै ओऊवे।
15ओकी दूसै तिथैदै यात्रा कौरेयौ आमै खियुस नगर कै धोरे शै होटेयो सामुस नगर दै पौऊंचै औरौ तिथकै आगलै दूसै मीलेतुस नगर दै ओऊवे। 16पौरौ पौलुसे इफिसुस शहर दा ना रुकणौ का फोयसला कौरा जिथुकै सै एशिया प्रदेश दा हौजौ जादा सौमय नी बीतणा चांव थिया। जिथुकै सै काल़े रौआ थिया, कै जै हौए सौकौ, तौ सै पिन्तेकुस्त तैयारो कै दूसै यरूशलेम शहर दा रौंव।
इफिसुस शहर कै बुड़ेईको खै उपदैश
17औरौ जोबै आमै मीलेतुस शहर दै उतरे, तोबै पौलुसे इफिसुस शहर कै कलीसिया कै अगुवो खै सौंदेश भैजा। 18जोबै सै तैसकै धोरे ओऊवे, तौ तिनुखै बौल़ौ, “तुऐं जाणौए, कै आगलै ही दूसै जोबै हांव एशिया प्रदेश दा पोऊंचा, हांव ऐलो तौड़ी हर सौमय तोंवारै साथै कैशैखै रौआ। 19औरौ बौड़ी दीनता शै औरौ आशु बोवाय-बोवायो, औरौ तिनु परीक्षाओं मुंजी जू यहूदी नेता कै चालबाजी कै बौजैह शै मुं पांदी आए गोई; हांव प्रभु कै सेवा कौरदा ही रौआ। 20औरौ जू-जू बातौ तोंवारै फायदै की थी, तिनुखै बौताणौ औरौ लोगौ कै सामणै औरौ घोरे-घोरे हिम्मत कै साथै शिखांदा रौआ। 21औरौ यहूदी लोग औरौ यूनान देश कै लोगौ कै सामणै गवाही दैंदा रौआ कै पाप कौरणा छोड़ दैव औरौ पौरमेशवर कै ढौबौ मन लाव, औरौ अमारै प्रभु यीशु मसीह पांदी बिशवाश कौरौ।
22औरौ ऐबै, हांव पवित्र आत्मा कै आज्ञा का पालन कौरेयौ यरूशलेम शहर खै जोऊं, औरौ ना जाणु, कै तिथै मुंआरी का-का बीतल़ो, 23सिरफ ऐजौ कै पवित्र आत्मा हर नगर दै चैतावणी दैय-दैयौ मुंकैई बौल़ौ कै कैद औरौ कौल़ेश तांव कारिए तैयार औसौ। 24पौरौ हांव आपणै प्राणो खै किछै ना सौमझु कै आपी आरी प्यार कौरु, पौरौ ऐजौ कै हांव आपणै दौड़ खै, औरौ तियौं सेवा खै पूरी कौरु, जू मोऐं पौरमेशवर कै अनुग्रह कै सुसमाचार पांदी गवाही दैणौ कारिए प्रभु यीशु कैईंदै पाए राए।
25औरौ ऐबै हांव जाणुए, कै तुऐं सौबै जिनुमुंजी मोऐं पौरमेशवर कै राज्य का प्रचार कौरा, तुऐं मुखै हौजौ ना दैखदै। 26इथकारिए हांव ऐलो कै दूसै तुऔं खै गवाही दैयौ बुलू, कै जै तुऔं मुंजीदै कुणिए बै यीशु पांदी बिशवाश कौरे बिना मौरे जांव, तौ ऐजी मैरी जुमैवारी ना आथी। 27जिथुकै मोऐं तुऔं कै सैजौ सौबै ठुँ बौताए राए जू पौरमेशवर चांव कै तुऐं जाणौ औरौ मोऐं तुंवादौ किछै ना छुपैई।
28इथकारिए आपणै औरौ पूरै झुंड की दैख-रैख कौरौ; जिथमुंजी पवित्र आत्माए तुऔं ठोगड़े बाणै राए कै तुऐं पौरमेशवर कै कलीसिया कै रोखवाल़ै कौरौ, जिथुकै पौरमेशवरे आपणै लोगौ खै आपणै लोऊ लैई खरीदै राए। 29हांव जाणुए, कै मैरै जाणौ कै बाद तोंवारै बीच मुंजी झूठै गुरु आन्दै औरौ बिशवाशियौं खै भोरमांदै। सै तिनु फाड़णौवाल़ै भेड़िए कै जैशणै हौंदै जू भेड़ो खै मारै दैंव। 30इथै तौड़ी कै तोंवारै आपणै बिशवाशियौं कै झुंड मुंजीदै, ऐशणै-ऐशणै लोग आन्दै, जू चैलै खै आपणै पौछौड़ियौ खिंचणो कारिए उलटी सीधी बातौ बौलदै।
31इथकारिए बिजैयौंदे रौया, औरौ याद कौरेया कै मोऐं ती सालो तौड़ी रात दूस आशु बोवाय-बोवायो, सौबी खै सौमझाणौ नी छुड़ी। 32औरौ ऐबै हांव तुऔं पौरमेशवर कै, औरौ तैसकै अनुग्रह कै वचन खै सौंपै दियु, जू तुऔं बिशवाश दै मोजबूत कौरे सौकौ, औरौ पौरमेशवर तुऔं सैजै विरासत दैंदा जियौं दैणौ का वायदा तैणै तिनु सौबी लोगौ शै कौरे राए जू तैसकै जरिए पवित्र हौए रौवै।
33मोऐं कोसी कै चांदी, सूनु या खोटणो का लालच नी कौरी। 34तुऐं आपी बै जाणौए कै इनु हाथै मैरी औरौ मैरै साथियो की जौरुरत पूरी कौरी। 35मोऐं तुऔं सौबै ठुँ कौरेयौ दिखाए राए, कै ऐशैखैई मैहनत कौरेयौ कमजोर लोगौ खै सोम्भाल़ो, औरौ प्रभु यीशु कै वचनो खै याद राखणै जौरुरी औसौ, तैणै आपी ही बौल़ै राए: लोणो शै दैणौ बढ़िया औसौ।”
36ऐजौ बौलेयौ तैणै घुंडू नियुड़ायो औरौ तिनु सौबी कै साथी प्रार्थना कौरे। 37तोबै सै सौबै बौहितै रुए औरौ पौलुस कै गल़े लायौ तैसी खोपटियांदै लागै। 38तिनुऐ खास कौरेयौ इयौं बातौ का दुख कौरे लौआ थिया, जू तैणै बौल़ै राए थी, कै तुऐं मुखै हौजौ ना दैखदै। औरौ तिनुऐ तैसी जहाजो तौड़ी छोड़ा।
Currently Selected:
प्रेरितो कै काम 20: SRXNT
Highlight
Share
Compare
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
