प्रेरितो कै काम 18
18
कुरिन्थुस शहर दा पौलुस
1इथकै बाद पौलुस एथेंस शहर कै छोड़ेयौ कुरिन्थुस शहर दा ओऊवा। 2औरौ तिथै अक्विला नांव का ऐक यहूदी आदमी भैटा जैसका जन्म पुन्तुस प्रदेश दा हौए रौआ थिया; औरौ आपणै घोरवाल़ी प्रिस्किल्ला कै साथी इटली देश दा कुछैक सौमय औगौड़ियौ आए रौआ थिया, जिथुकै महाराजा क्लौदियुस सौबै यहूदी लोगौ खै रोम देश शै आगु जाणौ कै आज्ञा दैय राए थी, तैसी आदैश कै बौजैह शै सै कुरिन्थुस शहर दै ओऊवे। 3पौलुस औरौ अक्विला का ऐकैई बेवसाय थिया; इथकारिए पौलुस तिनुआरी भैटिंदा हौटा, जिथुकै सै ऐक जैशणै ही तोम्बू बाणणौ का काम कौरौ थिए औरौ तैणै तिनकै साथै रौयौ काम कौरा।
4औरौ पौलुस हर विशांव कै दूसै यहूदी सभा-घोरो दा बैहस-बाजी कौरेयौ यहूदी औरौ यूनान देश कै लोगौ खै यीशु मसीह पांदी बिशवाश कौरणौ कारिए सौमझांव थिया। 5जोबै सीलास औरौ तीमुथियुस मकिदुनिया प्रदेश दै ओऊवे, तौ पौलुसे तोम्बू बाणणौ कै काम बंद कौरे दियै औरौ पौलुस वचन शुणाणौ कै धुनो दा लागैयो यहूदी लोगौ खै गवाही दैंव थिया कै यीशु ही मसीह औसौ। 6पौरौ जोबै यहूदी लोग पौलुस कै खिलाफ हौयौ निन्दा कौरदै लागै, तौ तैणै आपणै खोटणो कै धूल झाड़ेयौ तिनु बौल़ौ, पौरमेशवर कै सौंदेश कै ना मानणौ कै बौजैह शै तुऐं आपी ही तियौं सौजा कै दोषी औसौ, जू तुऔं पौरमेशवर कै ढौबौशै भैटदै, हांव बैकसूर औसौ। ऐलो दा ऊबा हांव बैगानै यहूदी लोगौ कै धोरे जांदा औरौ पौरमेशवर कै सौंदेश का प्रचार कौरदा। 7औरौ सै यहूदी सभा-घोरो दा हांडेयो तीतुस यूस्तुस नांव कै पौरमेशवर कै ऐकी बैगानै यहूदी भोक्तो कै घोरे शिखांदा ओऊवा, जैसकौ घोर सभा-घोर कै धोरे थियु।
8तोबै यहूदी सभा-घोरो का ठोगड़ा क्रिस्पुसे आपणै सौबै कुड़बे समैंत प्रभु पांदी बिशवाश कौरा औरौ बौहितै कुरिन्थुस शहर कै रौणौवाल़ै लोगै वचन शोणेयो बिशवाश कौरा औरौ बपतिस्मा लौआ। 9औरौ प्रभुए ऐकी राती दर्शन दैयौ पौलुस कै बौल़ौ, “डौरेया नी, पौरौ बौलदै जाव औरौ चुपी नी रौया; 10जिथुकै हांव तांव साथी औसौ, औरौ कुणिए तांव पांदी चौढ़ाए कौरेयौ तैरा नुकसान ना कौरदा; जिथुकै ऐसी शहरो दै मैरै बौहितै लोग औसौ, जू मुं पांदी भोरोशा कौरदै। 11औरौ पौलुस लोगौ खै पौरमेशवर का वचन शिखांदै बैई तिथै डेढ सालो तौड़ी रौआ।
12जोबै गल्लियो अखाया प्रदेश का राज्यपाल थिया तौ यहूदी लोग ऐक हौयौ पौलुस कै खिलाफ हौए गौवै, औरौ तैसी न्याय आसन कै सामणै लायौ बौलदै लागै, 13ऐजा लोगौ खै सौमझांव, कै पौरमेशवर कै आराधना ऐशै कौरी, जू मूसा कै कानून को उलटु औसौ।” 14जोबै पौलुस बौलणौ वाल़ा ही थिया, तौ गल्लिये यहूदी लोगौ खै बौल़ौ, “ओए रै यहूदी लोगौ, जै किछै अन्याय या दुष्टता कै बात हौंदै तौ ठीक थियु कै हांव तुंआरी शुणदा। 15पौरौ जै ऐजै बात बैहस-बाजी शब्दो, औरौ नामो, औरौ तुंआरै इथै कै मूसा कै कानून कै बारै मुंजी औसौ, तौ तुऐं ही जाणौ; जिथुकै हांव इनु बातौ का न्यायी ना बोणणा चोऊं।”
16औरौ गल्लिये आदैश दिया कै तिनु न्याय आसन कै सामणै दै निकाल़ै दैंव। 17तोबै सौबी लोगै यहूदी सभा-घोरो का ठोगड़ा सोस्थिनेस खै थाम्बैयौ न्याय आसन कै सामणै मारा। पौरौ गल्लिये इनु बातौ की किछै बै फिकर ना कौरी।
अन्ताकिया शहर कै पाछु आणौ
18औरौ पौलुस बौहितै दूसौ तौड़ी कुरिन्थुस शहर दा रौआ, तोबै बिशवाशी भाईयों मुंजीदा आगु जायौ सै किंख्रिया नोगर दा हौटा। तैसी नोगरो दै पौलुसे आपणै मुंडो कै खुल़मुंडी बाणै, जिथुकै तैणै ऐक हिच कौरे राए थी, औरौ बाद मै समुन्द्रो कै बाटो बाटी सीरिया प्रदेश खै हौटै गौआ औरौ तैसकै साथी प्रिस्किल्ला औरौ अक्विला थिए। 19तैणै इफिसुस शहर दै पौंचेयौ प्रिस्किल्ला औरौ अक्विला खै तिथै छोड़े औरौ आपी यहूदी सभा-घोरो दा जायौ यहूदी लोगौआरी बैहस कौरदा लागा।
20जोबै तिनु लोगै तैसी कैईंदै बिन्ती कौरे, “अमारै साथी किछै दूसौ तौड़ी हौजौ रो।” तौ सै भाजै गौआ; 21पौरौ ऐजौ बौलेयौ तिनु कैईंदा आगु हौटा, “जै पौरमेशवरे चोऊ तौ हांव तोंवारै धोरे हौजौ आन्दा।” तोबै सै इफिसुस शहर शै जहाज खोल़ेयो चाल पौड़ा; 22औरौ कैसरिया शहर दा ओतरेयो यरूशलेम शहर खै हौटा औरौ तिथै कलीसिया कै लोगौआरी भैटियो अन्ताकिया शहर दा ओऊवा।
पौलुस कै तिजै प्रचार-यात्रा कै शुरुआत
23तोबै किछै दूसौ तौड़ी रौयौ अन्ताकिया शहर पौरैशा आगु हौटा, औरौ हर तरफ शै गलातिया औरौ फ्रूगिया प्रदेश दा सौबी चैलो खै मोजबूत कौरेयौ फिरदा रौआ।
अपुल्लोस नांव का विद्वान मर्द
24अपुल्लोस नांव का ऐक यहूदी आदमी जैसका जन्म सिकन्दरिया शहर दा हौए रौआ थिया, जू विद्वान आदमी थिया औरौ पवित्र शास्त्र कै आछी तरह शै जाणौ थिया इफिसुस शहर दा ओऊवा। 25तैणै प्रभु कै बाटो कै शिक्षा पाए राए थी, औरौ मन लायौ यीशु कै बारै मुंजी ठीक-ठीक शुणांव औरौ शिखांव थिया, पौरौ सै खाली यूहन्ना कै बपतिस्मा कै बात जाणौ थिया। 26सै यहूदी सभा-घोरो दा निडर हौयौ बौलदा लागा, पौरौ प्रिस्किल्ला औरौ अक्विला तैसकी बातौ शोणेयो, तैसी आपणै घोरे निया औरौ पौरमेशवर कै बारै मुंजी तैसी हौजौ बै आछ कौरेयौ बौतौऊ।
27औरौ जोबै तैणै ठाणी पोऊँ कै पार ओतरेयो अखाया प्रदेश कै जोऊं तौ बिशवाशी भाईए तैसी जाणौ कारिए हौंसला दैयौ चैलै खै ऐक चिट्ठी लैखै कै सै तैसीआरी आछै शै भैटियो, औरौ अपुल्लोसे तिथै पौंचेयौ तिनु लोगौ कै बौड़ै मौदद कौरे जिनुवै अनुग्रह कै बौजैह शै बिशवाश कौरे राए थिया। 28अपुल्लोसे आपणी शौकतै औरौ गुणो कै साथै यहूदी लोगौ कै सरेआम तिनका सामणा कौरा, औरौ पवित्र शास्त्र शै सबूत दैय-दैयौ साबित कौरौ कै यीशु ही मसीह औसौ।
Currently Selected:
प्रेरितो कै काम 18: SRXNT
Highlight
Share
Compare
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
