फिलिप्पियों 3
3
सच्ची धार्मिकता
1ऐठणीरै तेईनी मिंडै विश्वासी भाईयो, प्रभु मझ आनन्दित बेशा। तुहांनि फिरी दुबारे बार-बार सैकेई गलै लिखणै ला आंउ परेशान ना भूंता, केईनी कि ऐ सैहै गलै अत्ति जै तुहां झूठी शिक्षा दींणै बाऐ किना बचा करि रखती।
2तैन्हांं बुरा मैहणुवां किना सावधान बेशा, जै कुत्ता सैयि अत्तै, जां तैन्हांं मैहणुवां किना बि सावधान बेशा, जै बोलतै कि तुवाड़ै उद्धारेरै तेईनी खतना करवांणा जरूरी आ। 3केईनी कि परमेश्वरेरै सच्चै मैहणु ता असै अत्तै जै परमेश्वरेरी अराधना तेसेरी आत्मायरी अगुवाय मझ कातै जां अपड़ै जीवना मझ यीशु मसीह सेईतै एकताय मझ खुश भूंतै जां ऐपु क्यौरी मैहनती पनि भरौसा ना रखतै। 4हलाँकि आंउ ता अपड़ि मैहनती पन बि भरौसा करि सकता। अगर कोई अपड़ि मैहनती पन भरौसा कांनेरै तेईनी सोचिया, ता आंउ तैस किना बि जादा बधि करि भरौसा रखि सकता। 5मूं जमणां किना अठवीं धियाड़ी बाद मिंडा खतना परमेश्वैरेरी आज्ञायरै अनुसार भुईथ्या। आंउ जन्मा किना इस्राएलि आ, जां बिन्यामीनेरै गौत्रैरा आ; मिन्डै माँ-बब इब्रानी थ्यै, ऐठणीरै तेईनी आंउ बि अक इब्रानी मैहणु आ। मूसेरी व्यवस्थायरा ध्यान सिंउ पालन कांना मझ आंउ अक फरीसी आ। 6आंउ यौउता उतावला थ्या कि मीं मसीहरै चैलानि बड़ा नुकसान पुजा; जां आंउ यहूदी व्यवस्थायरा पालन कांना मझ अक धर्मी मैहणु थ्या, केईनी कि मीं तैन्हांं सभनियांं केरा पालन केया।
7पण जै गलै मिन्डै फायदेरी थी, जां यीशु मसीह जै कियु, तेठणिरै कारण मीं सैकेई नुकसानै बाई समझि। 8आंउ मसीह यीशु मिंडै प्रभु जांणना चांहथा, जै होरनियां सारिया चीजा किना जादा कीमति आ, जेठणीरै कारण मीं सै सारी चीजै छडि दित्ती जां मिंडै तेईनी सै कचरा आ, ताकि आंउ मसीह जांणि सकूँ। 9जां आंउ तैस सिंउ तेसैरी संगती मझ रेय्ही सकूँ; मूं अपड़ि धार्मिकतायरा ना, जै व्यवस्थायरा पालन कांने ला मेईंती, पण ऐ सै वचन आ जै धार्मिकता आ, जैस सिर्फ मसीह मझ मिन्डै विश्वासै ला परमेश्वर मूंनी दींता, 10आंउ ऐ चांहथा कि मसीहि जांणि लियुं। जां तैस सामर्थी मैहसूस कांना चांहथा कि जेनि मसीह मौरा मझां जींतैरा, तेनी जै दुख सहन केया, तेतिया दुख सहन करि-करि तेसैरा सहभागी भूंणा चांहथा, जां जिहीं सै मरा, तिहियें आंउ बि मरना चांहथा। 11ताकि आंउ बि दुबारे मौरा मझां जींता करियो।
मूं पिचोरै चला
12आंउ ऐ दावा ना काता कि मीं ऐ सभ पेहिलै पा लियौरू आ, या आंउ पूरा सिद्ध बणि गियौरा। पण आंउ यीशु मसीह सैयि बंणनेरै तेईनी बड़ी कोशिश काता, जेठणीरै तेईनी तेनी आंउ चुणौरा। 13मिन्डै विश्वासी भाईयो, आंउ ऐ साबित ना काता कि आंउ तैस मकसदा हासिल करि बेठौरा; पण ऐ अक कम काता कि जै पेहिलै भौ गियौरू आ, आंउ तैस बिसरी करि आघै अपड़ै मकसदेरै तेईनी तकड़ी मैहनत जारी रखता, 14आंउ ईनाम जितणेरै तेईनी सिधा अपड़ै मकसदा धेरै दाउड़ता। ऐठणीरा ईनाम ऐआ कि परमेश्वर मूं स्वर्गा मझ शदांता, केईनी कि यीशु मसीह मिन्डै तेईनी मरा।
15असै सारै जै मजबूती सिंउ मसीह मझ भरौसा कातै, तेन्हैरी ऐ सौच भूंणी चेहिंथी, जां अगर तुहां मझां कोई बि ऐहीं सौचता ता परमेश्वर तैस समझणां मझ तुवाड़ी मजत करैला। 16ऐठणीरै तेईनी असु तैस सच्चाईरै अनुसार जींणु चेहिंथु, जै परमेश्वरै पेहिलै किना असु पन प्रकट क्यौरी आ।
स्वर्गा मझ असेड़ी नागरिकता
17मिंडै विश्वासी भाईयो, तुवे सभ मिलि करि मूं जेतिया जीवन जिआ। जां तैन्हांं मैहणुवां पन बि ध्यान दिया जै मूं जेतिया व्यवहार कातै तेतियाऐ व्यवहार करै जेतियै तुहैं असै लधौरै अत्तै, जेख्णी असै तुहां सेईतै थ्यै। 18केईनी कि बड़ै सारै मैहणु ऐतेई चाल चलतै, जैन्हेरी चर्चा मीं तुहां सेईतै बार-बार क्यौरी आ, जां अबै बि लैरी दी-दी करि बोलता कि तेन्हैरा व्यवहार ऐ लुहाता कि सै क्रूसा पन मसीहरी मोउतिरै समाचारा सिंउ नफरत कातै। 19अंत मझ परमेश्वरा तैन्हांं मैहणुवां केरा नाश कांना, जै मैहणु अपड़ै शरीरेरी ईच्छाय पूरी कांनेरै तेईनी जींतै। सै ऐतेई गला पन घमण्ड कातै, जैन्हां पन तैन्हांं शर्म कांनि चेहिंथी। सै मैहणु सिर्फ सैहै कांनेरै बारै मझ सौचतै जै इस संसारेरै मैहणु कातै। 20पण असै स्वर्गेरै नागरिक अत्तै जां तेठां किना असै अपड़ै उद्धार कांने बाऐ प्रभु यीशु मसीहरै वापस ऐईंणैरा बेसब्री सिंउ इन्तजार कातै अत्तै। 21सै अपड़ि तेनिऐ सामर्थी ला जेनि ला सै सभनियां चीजा अपड़ै वंशा मझ करि लींता। तेनी ला तैस असैड़ा कमजौर संसारिक शरीर बदली दींणा जां सैक्या अपड़ै महिमा बाऐ शरीरा सैयि बंणा दींणा।
Currently Selected:
फिलिप्पियों 3: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
