फिलिप्पियों 4
4
1ऐठणीरै तेईनी मिंडै विश्वासी भाईयो, आंउ तुहां सिंउ प्रेम काता जां तुहां सिंउ मिलणनी इन्तजार काता; तुवे मिन्डै आनन्द जां कंमा केरा ईनाम अत्तै, ऐठणीरै तेईनी प्रिय विश्वासी भाईयो मजबूती सिंउ विश्वास कातै रिय्हा।
बर्ताव केतिया भुईया
2आंउ यूओदिया किना जां सुन्तुखे दोईयो भीणियां सिंउ विनती काता कि सै प्रभु मझ अकजुट भौ करि रिय्हा। 3केईनी कि ऐन्हैं दोईयो भींणियें क्लेमेंस जां मिंडै होरनियां साउगिया समैत खुशखबरी फैलांणा मझ मूं सेईतै तकड़ी मैहनत क्यौरी आ। तेन्हैरै नाँईयें अबै जीवनेरी किताबि मझ लिखियोरै अत्तै।
सदा आनन्दित रिय्हा
4तुवे मैहणु प्रभु मझ हर टैंम आनन्दित बेशा; आंउ दुबारे फिरी बोलता कि आनन्दित बेशा। 5तुवाड़ी सहनशीलता सभनियां मैहणुवां पन प्रकट भुईया। प्रभु छुईं ऐ ऐईंता। 6कोस बि गलेरी चिंता मेईं करा, पण हर हालाता मझ तुवाड़ा निवेदन, प्रार्थनाय जां विनती सिंउ धन्यवाद करि-करि परमेश्वरा सांमणै रखियो। 7तां फिरी परमेश्वरा तुहांनि शांति दींणी, जैस तुवाड़ै मंन जां तुवाड़ै विचार यीशु मसीह मझ सुरक्षित रखणै।
8ऐठणीरै तेईनी मिन्डै विश्वासी भाईयो, जै-जै गलै सच्ची अत्ति जां जै गलै आदरै बाई अत्ति, जां जै धर्मी अत्ति जां जै गलै पवित्र अत्ति, जां जै गलै छै अत्ति जां जै गलै मंन-खुश कांने बाई जां जै बि अच्छै संस्कारै बाई जां तारीफि बाई अत्ति, ऐन्हां सभनियां गला मंना मझ सोचियां करा। 9जै गलै तुहैं मूं किना शिख्री जां ग्रहण की जां शुणि जां मूं मझ तकाई तैन्हांं मनियां करा तेख्णी शांति दींणै वा परमेश्वर तुहां सेईतै भूंणा।
दांनेरै तेईनी धन्यवाद
10तुवे पक्का मिंडी भलाईरै बारै मझ सौचतै थ्यै, पण तुहां मिंडी मजत कांनेरै तेईनी मौका ना मेईथ्या। अबै आखिरकार तुहां मिंडै बारै मझ दुबारे फिरी चिंता भूंती आ, ऐनि ला आंउ प्रभु मझ बड़ा खुश भुआ। 11आंउ ऐ ऐठणीरै तेईनी ना बोलता कि जै मूं चेहिंथु तेठणिरी मूं किछ कंमि थी, केईनी कि मीं हर हालाता मझ संतुष्टी कांनी शिख्री लियौरी आ। 12आंउ बड़ु घट मझ बि जींणु जांणता जां जरूरती किना जादु मझ बि रींहणु जांणता, हरेक गलैरै बारै मझ जां सारा हालाता मझ तृप्त भूंणु जां जेख्णी मूं किनि खांणुनि बड़ु किछ भूंतु जां मूं किनि खांणुनि बड़ु घट भूंतु दोईयो हालाता मझ रींहणु शिख्री लियौरू आ। 13मसीह मूंनी सामर्थ दींता, तेसैरी मजति ला आंउ सभ-किछ करि सकता। 14फिरी बि तुहैं मैहणुवें मिंडी मुसीबतिरै टैंमा मझ मूंनी पेईंसा केरी मजत दी-करि अच्छु कियु। 15जेख्णी मीं खुशखबरी प्रचार कांनेरी शुरुवातिरी धियाड़िया मझ मकिदुनिया प्रदेशा किना अपड़ि यात्रा शुरू करि करि जेख्णी चलि ग्या, तां तुहां छडि करि होरी कुनि बि कलीसियै मिन्डी मजत ना केईथी। 16ऐहीं-चारै जेख्णी आंउ थिस्सलुनीके नगरा मझ थ्या; ता तुहां मैहणुवां मिंडी जरूरत पूरी कांनेरै तेईनी अक बारी ना, पण दो बारी मिंडी मजत की। 17आंउ ऐ ऐठणीरै तेईनी ना बोलता कि आंउ ईनाम लींणैरा इच्छुक आ, पण तुवाड़ी मजतिरी वजहि ला आंउ तुहां परमेश्वरेरी आशीष मेईंती तकांणा चांहथा। 18अबै मूंनी तुवाड़ु भेईजौरू सभ-किछ मेयि गियौरू आ जां ऐ बड़ु जादा आ, केईनी कि ऐ सभ-किछ इपफ्रुदीतुसै अणु जां मीं सै लै लियु, सै सुख दींणै बाई खुशबू जां ग्रहण कांने योग्य बलिदाना सैयि आ, जेनि ला परमेश्वर खुश भूंता। 19जां असेड़ै पिता परमेश्वरा अपड़ै आपार धंनेरै जरियै यीशु मसीह मझ तुवाड़ी हर जरूरत पूरी कांनी। 20असेड़ै परमेश्वर जां पिताऐरी महिमा युगानुयुग भूंती रिय्हा। आमीन।
लाष्ट नमस्कार
21यीशु मसीह मझ सभनियांं पवित्र मैहणुवंनी मिंडा नमस्कार बोला। जै विश्वासी भाई मूं सेईतै अत्तै, सै तुहांनि नमस्कार बोलतै अत्तै 22सारै पवित्र मैहणु, खास करि सम्राटेरै घरानेरै अत्तै, ताउनि नमस्कार बोलतै अत्तै। 23प्रभु यीशु मसीहरा अनुग्रह तुहां सभनियां सिंउ बंणौरा रिय्हा।
Currently Selected:
फिलिप्पियों 4: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
