फिलिप्पियों 2
2
मसीहरी दीनता जां महानता
1अगर तुवे मसीह मझ भूंणैरी वजहि सिंउ खुश भुईया, या तेसेरै प्रेमा किना आराम पाउरा भुईया, या पवित्र आत्माय सिंउ संगती भुईया, जां अगर मसीह तुवाड़ै तेईनी करूणामय जां दयालु आ। 2ता मूं पूरी तराहि सिंउ हकीकति मझ खुश करा, जां अक मंन रिय्हा जां अक्कै प्रेम, अक्कै चित्त, जां अक्कै मंनसा रखा। 3स्वार्थ जां झूठै घमण्डा किना किछ बि मेईं करा, पण नम्र बंणा जां ज्योता आदर तुवे ऐपुनि दींतै, तेड़ां किना जादा आदर होरनियांनि दिया। 4तुहां मझां सारै सिर्फ अपड़ियै भलाईरा ना पण होरनियां केरी भलाईरी बि चिंता करिया। 5तुवाड़ा स्वभाव बि तेतिया भूंणा चेहिंथा, जेतिया यीशु मसीहरा स्वभाव थ्या। 6बेशक मसीहरा स्वभाव परमेश्वरा समान थ्या, फिरी बि तेनी परमेश्वरा बराबर भूंणैरा जौर ना दित्ता। 7बल्कि तेनी अपड़ि मर्जी सिंउ अपड़ु सभ-किछ छडि दित्तु जां एकि सेवकैरा रूप धारण केया। जेख्णी सै अक मैहणु बंणी ग्या। 8जां तेनी मैहणुरै रूपा मझ अव्तार लै करि, अपांणा नम्र केया जां परमेश्वरेरी आज्ञा मनि करि मरनेरै तेईनी बि तियार थ्या जां एकि अपराधी सैयि क्रूसा पनि मरि ग्या। 9ऐनि वजहि ला परमेश्वरै तेसनी सभनियां किना बडा औधा दित्ता। 10ताकि सभ प्रांणी यीशुरा आदर कांनेरै तेईनी जैंणु टंकिया। 11जां पिता परमेश्वरेरी महिमाईरै तेईनी सभ मैहणु मनि लिया कि यीशु मसीह ऐ प्रभु आ।
संसारा मझ प्रगड़ु सैयि चमका
12ऐठणीरै तेईनी मिंडै मित्रो, जेख्णी आंउ तुहां सेईतै थ्या तेख्णी तुहैं हमेशा परमेश्वरेरी आज्ञायरा पालन क्यौरा। अबै जेख्णी आंउ दुरी गियौरा, ता तुहां होरी बि गल मंनणी चेहिंथी। तुहां मझियां हर मैहणु डर मनि करि जां कंपि करि सैक्यै कम कांने चेहिंथै जै तैन्हांं मैहणुवां केरै तेईनी सही अत्तै, जै परमेश्वरै बचा लियौरै अत्तै। 13केईनी कि परमेश्वर तुहां मझ कम काता, तुहांनि सै कम कांनेरी ईच्छा जां शक्ति प्रदान काता, जै तैस खुश काता। 14सारै कंम बगैर शिकायति जां लड़ाई-झगड़ै कांने बगैर कातै रिय्हा। 15जेनि ला तुवे निर्दोष जां पवित्र बंणी रिय्हा जां ऐन्हां ढींठ जां अड़ियल मैहणुवां मझ परमेश्वरेरै निष्कलंक बच्चै बणि गहिया। ऐस संसारेरै मैहणुवां केरै बिच तुहां असमांणेरै तारै सैयि चमकणु चेहिंथु, जबकि तुवे जीवनेरै वचन मजबूती सिंउ पकड़ी करि रींहथै। 16कि जेख्णी मसीह दुबारे फिरी वापस ऐईंणु ता मिन्डै घमण्ड कांनेरी वजह ऐ भूंणी कि मिन्डी मैहनत जां कोशिश बेकार ना भुई। 17प्रभु मझ तुवाड़ा विश्वास जां तेसेरै तेईनी तुवाड़ी सेवा परमेश्वरानि चाढ़ौरै बलिदाना सैयि अत्तै। अगर सै मूं मारी बि छडतै तां बि आंउ खुश आ, जां तुहां सभनियां सिंउ आनन्द काता। 18ऐहींयै तुवे बि खुश बेशा जां मूं सेईतै आनंद मना।
तीमुथियुस जां इपफ्रुदीतुस
19मूं प्रभु यीशु मझ आशा, कि मूं तीमुथियुस तुहां किनि जल्दी भेईजणा, ताकि जेख्णी सै वापस ऐईंता, तुहां मैहणुवां केरै बारै मझ समाचार शुणि करि मूंनी तस्सली भूंणी। 20केईनी कि मूं किनि तीमुथियुसा जेतिया हौरा कौ बि मैहणु ना, जै सच्चै मंन सिंउ तुवाड़ी चिंता करिया। 21यीशु मसीह कितु चांहथा ऐठणीरै बारै मझ सोचणेरी वजाय हर मैहणु सिर्फ ऐहै सौचता कि सै ऐपु कितु चांहथा। 22पण तुहां पता कि तीमुथियुसै किहीं लुहाउ कि सै वफादार आ। मूं सेईतै खुशखबरिरै प्रचारा मझ तेनी तिहियें सेवा की जिहीं अक पुत्र अपड़ै बाबे सेईतै काता। 23आंउ आशा काता कि जिहींये मूं पता लगणा कि मूं सेईतै कितु भूंणै बाउ आ, मूं तीमुथियुस तुरन्त तुहां किनि भेईजणा। 24फिरी बि मूं प्रभु पनि विश्वास आ कि मूं बि ऐपु तुहां किनि झट ऐईंणु।
25आंउ ऐ जरूरी समझता कि इपफ्रुदीतुसा तुहां किनि भेईजूं जै मिंडा विश्वासी भाई जां मूं सेईतै कम काता। सै तैन्हांं मैहणुवां केरै खिलाफ मूं सेईतै एकि सैनिका सैयि खड़ा भुआ जै खुशखबरिरा विरोध कातै। सैक्या तुहैं मिंडी जरूरतिया केरा ख्याल रखणेरै तेईनी मूं किनि भेईजौरा थ्या। 26सै तुहां सभनियांं तकांणा चांहथा थ्या, ऐठणीरी वजहि ला सै परेशान थ्या, केईनी कि तुहैं शुणौरू थियु कि सै बिमार थ्या। 27हकीकति मझ सै यौउता बिमार थ्या कि सै मरि बि सकींथ्या; पण परमेश्वरै तैस पनि दया करि-करि सै ठीक करि दित्ता; जां तेसै पनि ना, पण मूं पनि बि दया की ताकि आंउ पेहिलै किना जादा दुखी ना भुईया। 28ऐठणीरै तेईनी मूं तैस तुहां किनि भेईजणैरी बड़ी जल्दी लगौरी आ, कि जेख्णी तुवे तैस तकाईया, ता अक बारी फिरी तुवे खुश भौ गहिया जां मिंडु चिंतैण घटि गहिया। 29ऐठणीरै तेईनी तुवे प्रभु मझ तेसैरा बड़ी खुशी सिंउ स्वागत करा जां ऐतिया मैहणुवां केरा आदर कांना चेहिंथा, 30तेनी मसीहरै कंमेरै तेईनी मोउतिरा सांमना केया जां अपड़ि जान खतरै मझ सुटि, ताकि सै तैन्हैं तरीकै ला मिन्डी मजत करि सकिया, जै तुहांनि ना मेईंती, केईनी कि तुवे बड़ै दूर अत्तै।
Currently Selected:
फिलिप्पियों 2: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
