इब्रानियों 12
12
परमेश्वर असैड़ा पिता
1असेड़ै आस-पास ऐतियै मैहणु अत्तै, जैन्हां केरा जीवन तका करि असु पता लगता, कि विश्वासैरा कितु मतलब आ। ऐठणीरै तेईनी ऐईछा असै हर-अक रूकावट जां पाप दूर करि-करि तैस बत्तै पन, जैस पन आघै असु चलणु आ, तेस पन चलतै। 2असुवां यीशु धेरै तकांतै रींहणु चेहिंथु, जै असुवां विश्वासा मझ आघै बधियांणता जां असैड़ा विश्वास पूरा काता। तेनी लज्जैरी कोई चिंता ना की जां क्रूसैरा दुख सेहन करि ल्या जां मरि ग्या; केईनी कि सै जांणीथ्या कि बाद मझ तेसनी खुशी भूंणी कि तेनी ऐहीं कियु। अबै सै परमेश्वरेरै सिंघासनेरै देहिणै पासै बेठौरा।
3यीशुरै उदाहरणेरै बारै मझ सौचा, कि तैन्हैं पापियै तेसनी क्यौता दुख दित्ता, जै तैस सिंउ नफरत करींथ्यै, तेनी ऐठणीरै तेईनी दुख सहन केया, ताकि तुवे निराश भौ करि हिम्मत ना छडि दिया। 4जेख्णी तुवे बुराईरी ताकतिरै खिलाफ लड़ाई कातै, ता तैन्हांं सिंउ तुवे ऐतिये ना लड़ै, कि तुवाड़ा खून भौ गिया। 5जां तुवे तैन्हांं जोश बाई गला भुलि गियोरै अत्तै, जै परमेश्वरै तुहां सिंउ तुवे अपड़ै बच्चै समझि करि बोलथी;
“हे मिंडै पुत्र, जेख्णी प्रभु तुहांनि ऐक्या ऐहसास करवांता कि
तुहैं गलत क्यौरू आ, ता तेत पन पूरा ध्यान देया।
जां जेख्णी सै तुहांनि झिड़खै दिया, ता हिम्मत मेईं हारतै।”
6केईनी कि प्रभु जैस सिंउ प्रेम काता, तेसनी झिड़खै बि दींता;
जां जैस परमेश्वर अपड़ा पुत्र मनता, तेसनी सजा बि दींता।
7जै दुख तुवे सहन कातै अत्तै, तैन्हांं एकि पिताऐरी सजा समझि करि सहन करि ल्या; परमेश्वर तुहां पुत्र समझि करि तुहां सिंउ बर्ताव काता; सैक्या केणु त्या पुत्र आ जैसनि पिता झिड़खै ना दींता।? 8अगर परमेश्वर तुहां ना सुधारिया, ता तुवे हकीकत मझ परमेश्वरेरै बच्चै नत्तै। 9फिरी जब कि असैड़ा संसारिक पिता बि असु सुधारनेरै तेईनी सजा दींता, तांबि असै तेसैरा आदर कातै, ता असु तेसैरा ता हौरा बि जादा आदर कांना चेहिंथा, जै असैड़ा स्वर्गीय पिता आ; जां जेख्णी सैक्या असु सुधारिया, ता तेसैरी मना, जां हमेशा जीवित रिय्हा। 10असैड़ा संसारिक पिता ता अपड़ि सौचिरै अनुसार जिहीं तैस अच्छु लगतु, असु थोड़े टैंमेरै तेईनी झिड़खांता; पण परमेश्वर असु असेड़ि भलाईरै तेईनी झिड़खांता, ताकि असै बि तैस सैयि पवित्र बंणी गहिया। 11जैस टैंमा झिड़खै मेईंती, तैस टैंमा झिड़खै अच्छी ना लगती, पण बुरी लगती। पण बाद मझ असु ऐत किना समझ ऐईंती, तेख्णी असुनि तसल्ली मेईंती; केईनी कि तेख्णी असै सही तरीकै ला जींणु शुरू करि दींतै।
उपदेश जां चेतावनी
12अपड़ै खिजोरै हत्थ खड़ै करा, जां अपड़ै जेणु, जैन्हांनि कंपणी लगौरी आ, तैन्हांं मजबूत करा। 13जां इदि-ओदि तकांणैरी वजाय, तुवे तैस सिधि बत्तै पन गहा, जै यीशु मसीह किनि पुजांती; ताकि असु मझ जै मैहणु आत्मिक तौर पन कमजौर अत्तै, सैक्यै भटकि ना गहिया, पण तैन्हांं केरा विश्वास मजबूत भौ गहिया।
14सभनियां सिंउ मिलि-जुलि करि बेशा जां अक पवित्र जीवन जींणैरी कोशिश करा, जेनि बगैर कोई बि प्रभु ना तका सकता। 15सावधान रिय्हा, कि कोई बि परमेश्वरेरै अनुग्रह किना छुटि ना गहिया या तुहां मझ कोई परेशानि खड़ि कांना लगिया। ऐतिया मैहणु तुहां मझां बड़ा बर्बाद करि सकता। सैक्यै परमेश्वरेरी सच्ची बत्तै किना भटकि करि दूर चलि गांहथै जां होरनियां मैहणुवां बि भटका दींतै। 16तुहां मझ कोई बि मैहणु व्यभिचारी ना भुईया जां ना अब्राहमेरै पौत्रै एसावा सैयि अधर्मी भुईया; केईनी कि सैक्या मौटा पुत्र थ्या, ऐठणीरै तेईनी तैस किनि खास उत्तर-अधिकारी भूंणैरा अधिकार थ्या, पण तेनी तैस अधिकारैरा आदर ना केया जां ऐठणीरै तेईनी अपड़ै हल्कै भाई याकूबनी एकि टैंमेरी रोटिरै तेईनी, ऐ अधिकार बैचि दित्ता। 17तुहां पता ता आ, कि जेख्णी बाद मझ तेनी अपड़ै बाबै इसहाका किना आशीष लींणी चाहि ता, तेसनी नमां करि दित्ता जां तेनी लैरी दी-दी करि आशीष मगि; पण जै पेहिलै भौ गियौरू थियु, तैस बदलणैरै तेईनी तेसेरै बोलै किछ ना भूं।
18तुवे सीनै पहाड़ जेतेई जगाय पन नत्तै यौउरै, जैस तका जां छू सकतै। ऐड़ि कोई जअति आग या काऐ बदअ या तूफान ना; जां मैहणु ऐतेई जगाय पन थ्यै, जेख्णी परमेश्वरै तैन्हांंनि अपड़ि व्यवस्था दित्ती। 19तुवे काहिरी आवाज जां बौलणारेरी ऐतेई आवाजि किनि ना यै, जैस शुणनै बाऐ विनती की, कि अबै असु सिंउ होरी गलै मेईं करा। 20तैन्हैं ऐहीं ऐठणीरै तेईनी बौलु, केईनी कि तैन्हांं केरै बोलै ऐ आज्ञा सहन ना भुई। परमेश्वरै तैन्हांं सिंउ बौलु, “अगर कोई पशु बि पहाड़ा छुईया ता, तैस पन घौड़तिया बजा।” 21जां सैक्या दर्शन ऐतिया डरियूंणा थ्या, कि मूसै बौलु, “मूंनी डरै ला शिल्हणी-कंपणी लगी।”
22पण तुवे सिय्योन पहाड़ा किनि यौउरै अत्तै, जैड़ि स्वर्ग बाउ यरूशलेम नगर आ, जै जींतै परमेश्वरेरू नगर आ जां जेठि लाखों स्वर्गदूत आनन्द जां त्यौव्हार मनांतै। 23तुवे परमेश्वरेरै मोटै पुत्रा केरी सभाय जां कलीसियै मझ यौउरै अत्तै, जैन्हां केरै नाँ स्वर्गा मझ लिखियोरै अत्तै। तुवे ऐपु परमेश्वरा किनि यौउरै अत्तै, जै सारिया चीजा पनि सभनियांं मैहणुवां पन न्याय काता। तुवे स्वर्गा मझ धर्मी मैहणुवां केरी आत्माईया किनि अईछी गियोरै अत्तै जै अबै सिद्ध बंणा दितोरी अत्ति। 24तुवे यीशु किनि यौउरै अत्तै, जेसैरा छिड़कौरा खून हाबिलेरै खूना किना जादा कीमती आ; यीशुरा खून इन्साफ ना मगता, पण माफ कांनेरी गल काता।
25सावधान रिय्हा जां तैस परमेश्वरेरी गलै मना, जै तुहां सिंउ गलै काता; केईनी कि जेख्णी इस्राएलेरै मैहणुवंनी मूसै चेतावनी दित्थी, ता तैन्हैं मूसेरी गल ना मनि। ऐठणीरै तेईनी अगर असै परमेश्वरेरी गल ना मनतै, जै असुनि स्वर्गा किना चेतावनी दींता, ता असेड़ै तेईनी ता होरू बि जादु बुरू भूंणु। 26जेख्णी परमेश्वरै सीनै पहाड़ा पन बौलु, ता तेसैरी आवाजि धरती हिलाय दित्ती, पण अबै तेनी ऐ प्रतिज्ञा क्यौरी आ, कि “अक बारी फिरी परमेश्वरा धरती-ऐ ना, पण असमांण बि हिलाय दींणु।” 27जां अक बारी फिरी ऐन्हैं गलै ला, ऐ पता लगता कि “सारी बंणाउरी चीजै हिलि गांहणी जां हठाई गांहणी, ताकि जै चीजै हिलायूंती ना, सैकेई अडिक बंणोरी रिय्हा।” 28ऐहै वजह आ, कि जै राज्य असुनि मेऔरा, सैक्या हिलाई ना सकता। ऐठणीरै तेईनी असु परमेश्वरैरा धन्यवाद कातै रींहणु चेहिंथु, ताकि जेनि ला असै भक्ति, जां डरै सिंउ परमेश्वरेरी अराधना करि सकतै, जेनि ला सै खुश भूंता। 29केईनी कि जिहीं आग नाश काति, तिहियें असेड़ै परमेश्वरा बि अपड़ै दुशमणा केरा नाश कांना।
Currently Selected:
इब्रानियों 12: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
