इब्रानियों 13
13
परमेश्वरा खुश कांनेरा तरीका
1योकिया केरी चिंता करियां करा, जिहीं प्रभु मनणारा कांनी चेहिंथी। 2मैहमाना केरा बि आदर सत्कार काना याद रखा, केईनी कि ऐठणीरै जरियै केहियै अंणजांणै मझ स्वर्गदूता केरा आदर सत्कार क्यौरा। 3केईदिया सिंउ ऐतिया बर्ताव करा, कि तैन्हांं ऐहीं मैहसूस भुईया, जिहीं तुवे बि तैन्हांं सिंउ केईदी अत्तै; जां जै दुख सैक्यै सहन कातै अत्तै, जै मैहणु सतायूंतै, तैन्हांं सेईतै ऐहीं रिय्हा जिहीं कि तुवे अपड़ै शरीरा मझ तेन्हैरै दर्द महसूस कातै अत्तै। 4ब्याहैरा सभनियांं आदर कांना चेहिंथा, जां हमेशा योकिया पन विश्वास बंणा रखा; केईनी कि व्यभिचारी मैहणुवां जां होरनियां केरी जनानियां सिंउ गलत सम्बंध रखणारा केरा परमेश्वरा फैसला कांना। 5अपड़ै जीवना मझ पेईंसा केरै तेईनी लालच मेईं करा। जै तुहां किनि आ, तेत्तै मझ खुश रिय्हा; केईनी कि परमेश्वरै ऐपुवै बोलोरू आ, कि “ना ता मूं तु कदि छडणा, ना कदि तिंडा त्याग कांना।” 6ऐठणीरै तेईनी असै बगैर डरै बोलतै, कि “प्रभु मिंडी मजत कांनारा, मूं ना डरीणु; केईनी कि मैहणु मूंनी किछ ना करि सकतै?”
7जै तुवाड़ै अगुवे थ्यै जां जैन्हैं तुहांनि परमेश्वरैरा वचन शुणाउरा थ्या, तैन्हांं याद रखा; कि तैन्हैं अपड़ा जीवन किहीं व्यतीत केया जां सैक्यै मरतै टैंमा तेईनी विश्वासा मझ बंणी रिय्है; ऐठणीरै तेईनी असु तैन्हांं केरै विश्वासा पिचोरै चलि करि परमेश्वरा पन तेतिया विश्वास लुहाना चेहिंथा, जेतिया तैन्हैं लुहाऔरा थ्या। 8यीशु मसीह पेहिलै बि अक जेतिया थ्या, आज जां युग-युग तेईनी अक जेतिया आ, सैक्या कदि ना बदलता। 9केईनी कि यीशु मसीह कदि ना बदलता, ऐठणीरै तेईनी असु ऐन्हां सभनियां नवीं जां अलग-अलग शिक्षाय पन ना चलणु चेहिंथु; ऐ तुहां गलत बत्तै लै गांहथी, केईनी कि तुवाड़ै मंना केरै तेईनी ऐ अच्छु आ, कि सैक्यै अनुग्रह ला मजबूत बंणिया, ना कि रोटी-पांणी सिंउ जुड़ौरै नियम मनणै ला मजबूत भुईया। 10असु किनि अक ऐतेयि वेदी आ, जैस मझां मिलापेरै तम्बुरै याजकानि खांणैरा कौ हक ना, जै तम्बु मझ सेवा कातै।
11केईनी कि पेहिलै वायदेरै मुताबिक, महायाजक हर साल जैन्हां पशुवा केरा खून इस्राएलि मैहणुवां केरै पापा केरी माफिरै तेईनी महा पवित्र जगाय लै गांहथा, जां बलि क्यौरै पशुरा शरीर तम्बु किना भेईर फुकि दिईंथ्यै। 12ऐठणीरै तेईनी यीशु बि मैहणुवंनी अपड़ै खूनै ला पवित्र बंणाणेरै तेईनी यरूशलेम शहरा किना भेईर दुख सहन केया जां मरि ग्या। 13ऐठणीरै तेईनी ऐईछा, असै यहूदी रीतिया छडि करि यीशु पन विश्वास कातै जां तम्बु भेईर गांहथै, जेठि मैहणु निवास कातै अतै जां तैस सेयि तुच्छ समझियो। 14केईनी कि इस धरती पन असु किनि कौ ऐतिया शहर ना, जैड़ि असै हमेशा तेईनी बेशि सकतै, ऐठणीरै तेईनी असै तैस शहरा तोपतै अत्तै, जै स्वर्गा मझ आ जां हमेशा तेईनी आ।
15ऐठणीरै तेईनी यीशुरै जरियै असै अपड़ु तेनी मुँहै ला, जेनि ला असै यीशु मनौरा, लगातार परमेश्वरेरी स्तुति कातै रिय्हा। ऐ तेसेरै तेईनी असैड़ा बलिदान आ। 16पण भलाई कातै रिय्हा जां जै किछ तुहां किनि आ, तैस तैन्हांंनि बंडि देया, जैन्हां जरूरत आ, केईनी कि ऐहै असली बलिदान आ, जैन्हैं ला परमेश्वर खुश भूंता।
प्रार्थना-विनती
17अपड़ा अगुवा केरी गल मना; जां तैन्हांं केरै आधीन बेशा, केईनी कि सैक्यै तुहां तकांतै रींहथै, ताकि तुवे भटकि ना गहिया; केईनी कि तैन्हांं परमेश्वरा किनि अपड़ि सेवकायरै बारै मझ हिसाब-किताब दींणा पूंणा। ऐठणीरै तेईनी सै बि अपड़ि सेवकाय खुश भौ-करि करिया, ना कि मजबूरी समझि करि करिया; केईनी कि उदास भौ-करि सेवकाय कांने ला कोई फायदा ना भूंणा। 18असेड़ै तेईनी प्रार्थना कातै रिय्हा, केईनी कि असु पक्का पता, कि असैड़ा अन्तरात्मा पवित्र आ जां असै जै बि कंम कातै, तैन्हैं कंमै ला परमेश्वरैरा आदर कांना चांहथै अत्तै। 19तुहां सिंउ मिंडी खास विंनति आ कि प्रार्थना करा कि आंउ तुहां सिंउ मिलणा जल्दी ऐईछी सकूँ।
आशीर्वाद
20-21जां अबै शांति दींणारै परमेश्वरै असैड़ा प्रभु यीशु मौरा मझां फिरी जींतैरी अंणा। तुहां तैन्हांं सभनियांं गला मझ सिद्ध बंणाईया, जैन्हां केरी तुहां तेसैरी ईच्छा पूरी कांनेरै तेईनी जरूरत आ। यीशु मसीहरी सामर्थी ला, परमेश्वर तुहां मझ सैकेई सारी चीजै पेईदा करिया, जेनि ला सैक्या खुश भूंता। अपड़ा बलिदान कांने ला यीशु भ्रैडा केरा महान पुव्हाल बंणी ग्या, जैन्हां भ्रैडा केरै झुंडा पन तेसेरै खूनै ला हमेशा तेईनी वायदेरी स्थापनायरी मौहर लईयूंती आ। तेसैरी महिमा सदा सर्वदा भूंती रिय्हा। आमीन।
22हे मिंडै विश्वासी भाईयो, आंउ तुहां सिंउ विनती काता, ऐस चिट्ठिरै सन्देशेरी गलै ध्यान सिंउ शुणि ल्या, जै मीं तुहांनि होंसला दींणैरै तेईनी लिखोरी अत्ति। मीं तुहांनि ऐस चिट्ठी मझ बड़ी जादी गलै नत्ती लिखोरी। 23तुवे ऐ जांणि ल्या कि तीमुथियुस असैड़ा विश्वासी भाई जैल्ही किना छुटि गियौरा। जां अगर सैक्या जल्दी चलि या, ता मूं तैस सेईतै तुहां सिंउ मिलणु। 24अपड़ा सभनियां अगुवानि जां सभनियांं पवित्र मैहणुवंनी नमस्कार बोला। इटली प्रदेशेरै विश्वासी भाई तुहांनि नमस्कार बोलतै अत्तै।
25आंउ प्रार्थना काता कि, परमेश्वरैरा अनुग्रह तुहां सभनियांं पनि भूंता रिय्हा। आमीन।
Currently Selected:
इब्रानियों 13: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
