गलातियों 2
2
पौलुसेरी तरफ सिंउ नमस्कार
1ऐत किना आंउ चोउधै सालै बाद बरनबास भाई सिंउ फिरी यरूशलेम शहरानि ग्या। मीं तीतुस बि ऐपु सिंउ लै नियां। 2जां आंउ तैठि ग्या, केईनी कि परमेश्वरै मूंनी लुहाओरू थियु, कि मूं तैठि गांहणु चेहिंथु जां जेख्णी आंउ तैठि ग्या, ता आंउ कलीसियेरै अगुवो सिंउ निराऐ मिला जां तैन्हांंनि सैकेई खुशखबरी शुणाय; जै आंउ होरनियां जातिया केरै मैहणुवां मझ प्रचार काता थ्या, ताकि ऐहीं ना भुईया कि जै आंउ काता थ्या या जै काता, तेठणीरा कोई नतीजा ना भुईया। 3मिंडा साउगी तीतुस जै अक यूनानी मैहणु आ, तेसैरा खतना कदि ना करियौरा; पण तांबि यरूशलेम शहरेरी कलीसियेरै जै अगुवे थ्यै, तैन्हैं सैक्या ग्रहण केया। तैन्हैं तेसैरा खतना कांनेरै तेईनी तैस पन कोई दबाव ना दित्ता। 4तीतुसेरा खतना ना भूंणैरा मामला किछ झूठै भाईयानि अक मुद्दा बणि ग्या, जै असेड़ै गुटा मझ छपि करि यै, जां तैस आजादी नष्ट कांनेरी कोशिश कातै थ्यै, जै असेड़ै उद्धार कांने बाऐ यीशु मसीह मझ असुनि मेऔरी आ, ताकि सैक्यै फिरी दुबारे असु यहूदी रीति-रिवाजा केरा गुलाम बंणा सकिया। 5पण असै तैन्हांं मैहणुवां सिंउ एकि मिंटेरै तेईनी बि सहमत ना भुवै, ताकि तुवे सच्ची खुशखबरी पन विश्वास कातै रिय्हा, जै असै तुहांनि शिख्राउरी थी।
6यरूशलेम शहरेरी कलीसियेरै तैन्हैं अगुवे, जै आंउ संदेश शिख्रांता थ्या, तैस बदलणैरै तेईनी आंउ मजबूर ना केया। मूंनी ऐनि गलै ला कोई बि फर्क ना पूंता, कि सैक्यै अगुवे केणु अत्तै, केईनी कि परमेश्वर असैड़ा भेईरियां रूप तका करि न्याय ना काता। 7ऐठणीरै अलावा तैन्हैं अगुवे तकाउ कि जिहीं परमेश्वरै खतना क्यौरै मैहणुवंनी खुशखबरी प्रचार कांनेरा कंम पतरसनि दितौरा थ्या, तिहियें परमेश्वरै होरनियां जातियनि खुशखबरी शुणाणैरा कंम मूंनी दितौरा। 8केईनी कि जेनि परमेश्वरै पतरस खतना वा केरा खास चैला बंणा करि, तेनी ला सेवायरा कंम केया, तेनिऐ परमेश्वरै आंउ बि होरनियां जातिया केरा खास चैला बंणा करि मिंडै द्वारा सेवायरा कंम करवा। 9जै मैहणु कलीसियेरै अगुवे थ्यै मतलब याकूब, कैफा पतरस जां यूहन्ना- तैन्हैं कृपा वा सैक्या वरदान परियांणा जै मूंनी मेऔरा। तैन्हैं आंउ जां बरनबास अपड़ै साउगी समझि करि अपड़ि सहमती दी करि असु सिंउ हत्थ मैआ जां सैक्यै इस गलैरै तेईनी राजी भौ ग्यै कि असै खुशखबरी प्रचार कांनेरै तेईनी होरनियां जातिया किनि गहिया जां सैक्यै खतना क्यौरा मैहणुवां किनि गहिया। 10तैन्हैं असु सिंउ सिर्फ ऐहै विनती की, कि असै यरूशलेम शहरा मझ बेशणारै गरीब विश्वासिया केरी मजत करिया जां ऐ सैहै थियु, जैस कांना मझ आंउ बड़ा खुश थ्या।
पौलुसेरै द्वारा पतरसैरा विरोध
11जेख्णी अक धियाड़ी कैफा पतरस अन्ताकिया शहरा मझ या ता मूं सैक्या होरनियां जातिया केरै मैहणुवां केरै सांमणै झिड़खांणा पेया; केईनी कि सैक्या जै काता थ्या सै गलत थियु। 12सैक्या पेहिलै होरनियां जातिरै मैहणुवां सिंउ बेशि करि रोटी खांईथिया; पण जेख्णी याकूबेरै नगरा किना किछ मैहणु यै, ता पतरस खतना कांनेरी प्रथा मनणै बाऐ यहूदी विश्वासी भाईया केरै डरै ला होरनियां जातिया किना किनारा कांना लगा जां तैन्हांं किना अलग रींहणा लगा। 13जां तैस सिंउ अन्ताकिया शहरा मझ किछ यहूदी विश्वासी मैहणुवें बि कवट केया, जां यौ-तेईनी कि बरनबास बि डरींता थ्या जां होरनियां जातिया केरै मैहणुवां सिंउ मिलणु-जुलणु बन्द करि दित्तु। 14पण जेख्णी मीं तकाउ कि असल मझ सैक्यै तैस सच्ची खुशखबरिरा पालन ना थ्यै कातै जै खुशखबरी मीं सभनियां केरै सांमणै कैफा पतरसा सिंउ बोलथी, कि “जबकि कि तु अक यहूदी भौ-करि बि होरनियां जातिया केरै मैहणुवां केरै रीति रिवाजा केरा पालन काता, ता यहूदिया केरै रीति-रिवाजा केरा पालन किना काता। अगर तीं जै अक यहूदी भौ-करि ऐहीं कियु, ता फिरी तु होरनियां जातिया केरै मैहणुवंनी यहूदिया केरै रीति-रिवाजा केरा पालन कांनेरै तेईनी दबाव केईनी बाता?”
विश्वास जां कंम
15असै जै जन्मेरै यहूदी अत्तै, जां सैक्यै नत्तै जैन्हांनि यहूदी होरनियां जातियनि पापी बोलतै। 16तांबि असुवां यहूदी विश्वासिया पता कि मूसेरी व्यवस्थायरा पालन करि-करि कोई बि मैहणु परमेश्वरेरी नजरी मझ धर्मी घोषित ना भूंता; ऐठणीरै तेईनी असुवें ऐपु बि यीशु मसीह पन विश्वास केया, कि असै मूसेरी व्यवस्थायरा पालन कांने ला ना, पण यीशु मसीह पन विश्वास कांने ला धर्मी घोषित भोरै अत्तै। केईनी कि मूसेरी व्यवस्थायरा पालन कांने ला कोई बि मैहणु धर्मी घोषित ना भौ सकता। 17किछ यहूदी मैहणु सौचतै कि असै पाप क्यौरा; केईनी कि असै धर्मी घोषित भूंणेरै तेईनी मूसेरी व्यवस्थायरा पालन कांनेरी वजाय यीशु मसीह पन विश्वास कातै। ता क्या ऐठणीरा मतलब ऐ ना कि मसीह असु पापी बंणाता? ना! ऐहीं बिल्कुल ना! 18केईनी कि मीं जैन्हां रीति-रिवाजा केरा पालन कांना छडि दितौरा थ्या, अगर फिरी दुबारा तैन्हांं रीति-रिवाजा केरा पालन कांना शुरू करि दींता, ता आंउ सचमुच अक पापी आ। 19जेख्णी मीं व्यवस्थायरा पालन कांनेरी कोशिश की, ता व्यवस्थाय आंउ दोषी ठहराय दिता। ऐठणीरै तेईनी मना कि आंउ व्यवस्थायरै तेईनी मरि ग्या, ताकि आंउ परमेश्वरेरै जां मसीहरै तेईनी जी सकूँ।
20ऐठणीरा मतलब ऐ आ कि जेख्णी मसीह क्रूसा पन मरि ग्या, ता आंउ बि मरि ग्या। अबै आंउ जींता ना रिय्हा, पण मसीह मूं मझ जींता। जां आंउ शरीरा मझ अबै जै जींता, ता सिर्फ परमेश्वरेरै पुत्रा पन विश्वास कांने ला जींता, जेनि मूं सिंउ प्रेम केया जां मिंडै तेईनी अपांणा दी दिता। 21आंउ ऐस गलै किना नमां ना करि सकता कि परमेश्वर अपड़ै अनुग्रह ला असु बचांता। केईनी कि अगर मूसेरी व्यवस्थायरा पालन कांने ला मैहणु धर्मी घोषित भूंता भुईं ता फिरी मसीह मरनेरी कोई जरूरत ना थी।
Currently Selected:
गलातियों 2: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
