गलातियों 3
3
व्यावस्था या विश्वास
1हे नासमझ, गलातियो शहरेरै विश्वासियो, मीं ता तुवे जुगतीं समझाउरै थ्यै, कि यीशु मसीह तुवाड़ै तेईनी क्रूसा पन केईनी मुआ। ता फिरी तुवे तैस किना दूर केईनी चलि ग्यै? तुवे कुनि भटका दितोरै अत्तै? 2आंउ तुहां किना बस योउतु तियु जांणना चांहथा, कि तुहांनि पवित्र आत्मा किहीं मैआ? क्या मूसेरी व्यवस्थायरा पालन करि-करि तुहांनि पवित्र आत्मा मैआ? ना! तुहांनि पवित्र आत्मा ऐठणीरै तेईनी मैआ, केईनी कि तुहैं यीशु मसीहरै बारै मझ खुशखबरी शुणि जां तेत पन विश्वास केया। 3क्या तुवे मैहणु योउतै नासमझ अत्तै? तुहैं जै कम पवित्र आत्मायरै जरियै मसीह सेईतै अपड़ा नवाँ जीवन शुरू केया, क्या तैस अबै मैहणुरै कंमेरै जरियै मुकांणा चांहथै अत्तै? 4विश्वासी बंणना किना बाद तुहैं बड़ा दुख सहन केया। आंउ सच मझ आशा काता, कि ऐक्या दुख बेकार ना थ्या। 5परमेश्वर जै तुहांनि पवित्र आत्मा दींता जां तुहां मझ चमत्कारेरै कंम काता, क्या ऐठणीरी वजह ऐ आ कि तुहैं मूसेरी व्यवस्थायरा पालन केया? या ऐठणीरी वजह ऐ आ कि तुहैं मसीहरी खुशखबरी शुणि जां तेत पन विश्वास केया?
6“अबै अब्राहमेरै बारै मझ सौचा, जेनि परमेश्वरा पन विश्वास केया जां तेसेरै विश्वासेरी वजहि ला परमेश्वरै सैक्या धर्मी मैहणुरै रूपा मझ ग्रहण केया।” 7तुहां ऐ समझणु चेहिंथु, कि जै मैहणु अब्राहमा सैयि परमेश्वरा पन विश्वास कातै, सैक्यै ऐ अब्राहमेरै वंशज अत्तै। 8जां पवित्र शास्त्रा मझ बड़ै टैंम पेहिलै ऐ लिखियोरू थियु कि परमेश्वरा होरी जातिरै मैहणु विश्वास कांने ला धर्मी घोषित कांने। ऐहै वजह आ कि पवित्र शास्त्रा मझ परमेश्वरै पेहिलै अब्राहमनि खुशखबरी शुणाउरी थी ता तेनी तैस सिंउ बौलु, कि तिंडै कारण मूं ऐस पूरै संसारेरै सभनियांं मैहणुवंनी आशीष दींणी। 9परमेश्वरै अब्राहमनि तेसेरै विश्वासै ला आशीष दित्ती। तिहियें चारै जै कोई बि यीशु मसीह पन विश्वास काता, तेसनी हकीकत मझ अब्राहमा सेईतै परमेश्वरेरी आशीष मेईंणी।
10ऐठणीरै तेईनी जेत्थरै बि मैहणु मूसेरी व्यवस्थायरै कंमा पन भरौसा रखतै, सैक्यै परमेश्वरेरै श्रापेरै आधीन अत्तै; केईनी कि पवित्र शास्त्रा मझ लिखोरू आ, कि जै मूसेरी व्यवस्थायरी किताबि मझ लिखोरी गलै ना मनता, सैक्या परमेश्वरेरै श्रापेरै आधीन आ। 11पण ऐ गल सच आ कि मूसेरी व्यवस्थाय ला परमेश्वरेरै सांमणै कोई बि धर्मी घोषित ना भूंता; केईनी कि पवित्र शास्त्रा मझ लिखोरू आ, कि धर्मी मैहणुनी सिर्फ विश्वास कांने ला जीवन मेईंणा। 12पण मूसेरै नियमा केरा पालन कांने ला जींणु जां परमेश्वरा पनि भरौसा करि-करि जींणु अक समान ना। जिहीं कि पवित्र शास्त्रा मझ लिखोरू आ, “जै व्यवस्थायरी सारिया गला केरा पालन करैला, तेसनी व्यवस्थायरै जरियै जीवन प्राप्त भूंणा।” 13मसीह जै असेड़ै तेईनी श्रापित बंणा, तेनी असै खरीदी करि मूसेरी व्यवस्थायरै श्रापा किना बचाय, केईनी कि पवित्र शास्त्रा मझ लिखोरू आ, कि “जै कोई क्रूसा पन चाढ़ी करि मारियूंता सैक्या श्रापित आ।” 14मसीह ऐ ऐठणीरै तेईनी कियु, ताकि यीशु मसीहरै जरियै अब्राहमेरी आशीष होरनियां जातियानि बि हासिल भुईया। जां मसीह पन विश्वास कांनेरी वजहि ला असै पवित्र आत्मा हासिल करिया, जेसैरा तेनी असुनि दींणैरा वायदा क्यौरा थ्या।
व्यवस्था जां वायदा
15हे विश्वासी भाईयो, अबै आंउ तुहां मैहणुवंनी साधारण जीवनैरा उदाहरण दींता, जेख्णी दो मैहणु योकिया मझ वायदा कातै, ता ना कोई तैस रद्द करि सकता जां ना ऐ किछ तैस मझ जोड़ी सकता। 16ऐहींयै चारै परमेश्वरै अपड़ै वायदै अब्राहम जां तेसेरै वंशा सिंउ क्यौरै अत्तै; पवित्र शास्त्र ऐ ना बोलता, कि तिंडै वंशजनी, जिहीं बड़ा मैहणुवां केरै बारै मझ बोलता, पण जेख्णी पवित्र शास्त्र बोलता, कि “तिंन्डै वंशानि” ऐ एकि मैहणुरै बारै मझ बोलता, जै मसीह आ। 17आंउ जै तुहांनि समझांणा चांहथा, सै ऐ आ कि परमेश्वरै अब्राहमा सिंउ अक वायदा क्यौरा थ्या जां तैस पूरै कांनेरी कसम बि क्यौरी थी। वायदा कांना किना चोउर शाउ तीह साल बाद दितोरी मूसेरी व्यवस्था ना ता परमेश्वरेरै वायदै मिटा सकती जां ना ऐ परमेश्वरेरी कसमि बेकार बंणा सकती। 18परमेश्वरै असुनि आशीष ऐठणीरै तेईनी ना दित्ती कि असै मूसेरी व्यवस्थायरा पालन केईथ्या, पण सै ऐठणीरै तेईनी दींता, केईनी कि तेनी दींणैरा वायदा क्यौरा थ्या। तेनी तराहि, परमेश्वरै ऐ अनुग्रह अब्राहमनि दींणैरा वायदा क्यौरा थ्या। 19ता फिरी भला व्यवस्था केईनी दित्ती? मूसेरी व्यवस्था ऐ लुहानेरै तेईनी दित्ती कि मैहणु कियोतै पापी अत्तै, पण व्यवस्था तैस वंशजा ऐईंणा तेईनी बंणी रिय्हा, जैस सिंउ वायदा क्यौरा थ्या। परमेश्वरै अपड़ि व्यवस्था स्वर्गदूता केरै जरियै मूसेनी दित्ती; मूसा ऐ परमेश्वरेरै जां मैहणुवां केरै बिच मेल-मिलाप करांणार थ्या। 20जेख्णी दुवां मैहणुवां केरै बिच समझौता भूंता, तेख्णी बिचोलियेरी जरूरत भूंती। पण जेख्णी परमेश्वरै अब्राहमा सिंउ वायदा केया ता तेन्हैरै बिच कोई मेल-मिलाप करांणार ना थ्या, केईनी कि परमेश्वर अकै आ
व्यवस्थायरा मकसद
21क्या ऐठणीरा मतलब ऐ आ, कि व्यवस्था परमेश्वरेरै वायदै केरै खिलाफ आ? बिल्कुल ना! केईनी कि अगर कोई ऐतेई व्यवस्था दितोरी भूंती भुईं, जै जीवन दी सकींथी, ता व्यवस्था मनणै ला मैहणु धर्मी घोषित भूंणा थ्या। 22पण पवित्र शास्त्र असुनि बोलता, कि पूरा संसार पापेरी शक्तिरै आधीन आ, ऐठणीरै तेईनी जै कोई यीशु मसीह पन विश्वास कातै, परमेश्वरैरा क्यौरा वायदा तैन्हांं मैहणुवंनी ऐ मेईंणा।
23पण मसीहरै ऐईंणा जां तैस पन विश्वास कांना किना पेहिलै असै यहूदी मैहणु मूसेरी व्यवस्थायरै आधीन थ्यै, जां मूसेरी व्यवस्था असेड़ि रखवाली करींथी, जां ज्यो-तेईनी परमेश्वरै असु पन मसीह प्रकट ना केया, त्यो-तेईनी मूसेरी व्यवस्थाय असै केईदिया सैयि रखौरै थ्यै। 24ऐठणीरै तेईनी मसीह ऐईंणा तेईनी मूसेरी व्यवस्था असुनि असेड़ि बत्त लुहानेरै तेईनी जां असेड़ि देख-भाल कांनेरै तेईनी दितोरी थी; ताकि असै यीशु मसीह पन विश्वास कांने ला परमेश्वरेरै सांमणै धर्मी घोषित करियो। 25पण अबै जबकि असै मसीह पन अपड़ा विश्वास रखौरा, ता अबै असेड़ि मजत कांनेरै तेईनी जां असुनि बत्त लुहानेरै तेईनी व्यवस्थायरी जरूरत ना।
पुत्र जां वारिस
26-27जेख्णी तुहैं मसीहरै नाँईयां किना बपतिस्मा लिया, तेख्णी तुहैं मसीहरा जीवन नवाँ लिकड़ा सैयि ला ल्या। ऐठणीरै तेईनी, जेख्णी तुहैं यीशु मसीह पन विश्वास केया, तेख्णी तुवे सारै परमेश्वरैरी संतान बंणी ग्यै। 28मसीह मझ अबै ना कोई यहूदी आ, ना अलग जाति, ना दास, ना आजाद आ। ना जनेनी-मड़दा मझ कोई फर्क आ। असै यीशु मसीह मझ सभ अक बराबर अत्तै। 29केईनी कि अगर तुवे मसीह मझ अक अत्तै, ता तुवे अबै अब्राहमेरै परिवारैरा हिस्सा अत्तै जां तुहांनि सैक्यु सभ-किछ हासिल भूंणु; जेठणीरा परमेश्वरै अब्राहमा सिंउ वायदा क्यौरा थ्या।
Currently Selected:
गलातियों 3: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
