गलातियों 1
1
नमस्कार
1-2आंउ पौलुस, जै अक खास चैला आ। आंउ तुवाड़ै तेईनी ऐ चिट्ठी लिखता, जै यीशु मसीह पन विश्वास कातै जां गलातिया प्रदेशा मझ रींहथै। जै विश्वासी भाई ऐड़ि मूं सिंउ अत्तै, सैक्यै बि तुहांनि नमस्कार बोलतै अत्तै। आंउ मैहणुवां केरै गुटै ला या कोसक्यै खास मैहणुरी वजहि ला खास चैला ना बंणा; पण आंउ असेड़ै प्रभु यीशु मसीहरी जां परमेश्वरेरी वजहि ला अक खास चैला बंणा, जेनि यीशु मौरा मझां जीतैरा।
3आंउ प्रार्थना काता कि असैड़ा परमेश्वर पिता जां यीशु मसीह तुहांनि अनुग्रह जां शांति प्रदान करिया। 4परमेश्वर जै कि असैड़ा पिता आ तेसैरी ईच्छाईरै अनुसार यीशु मसीह अपांणा असेड़ै पापा केरै कारण बलिदान करि दित्ता, ताकि असै इस टैंमेरै संसारिक मैहणुवां केरै बुरै प्रभावा किना बचि रिय्हा। 5आंउ प्रार्थना काता, कि हर-अक मैहणु युग-युग तेईनी परमेश्वरेरी महिमा करिया। आमीन।
कोई होरी खुशखबरी ना
6आंउ तुवाड़ै बारै मझ बड़ा हैरान आ! कि परमेश्वरै जेनि तुवे यीशु मसीहरै अनुग्रह ला अपड़ै मैहणु भूंणेरै तेईनी शदाय, तैस किना तुवे योउतै छुईं मुड़ि करि होरी अलग खुशखबरी पन विश्वास कांना लगै। 7सिर्फ अकै सच्ची खुशखबरी आ, पण किछ मैहणु तुवाड़ै दिमाका परेशान कांना चांहथै अत्तै जां यीशु मसीहरी खुशखबरी खराब कांना चांहथै अत्तै। 8पण अगर जै खुशखबरी असुवें तुहांनि शुणाय, तैस छडि करि होरी कोई खुशखबरी स्वर्गा किना अईछी करि स्वर्गदूत बि शुणांणैरा दावा करिया, ता परमेश्वर तेन्हांनि सजा दिया। 9जिहीं असै पेहिलै बोलि बेठोरै अत्तै, तिहियें अबै आंउ फिरी बोलता, कि तैस खुशखबरी छडि जै तुहैं मनि लियौरी आ, अगर कोई बि अलग खुशखबरी शुणांता जां तैस खुशखबरी भूंणैरा दावा करिया ता परमेश्वर तेन्हांनि सजा दिया। 10साफ तौर पन, आंउ मैहणुवां खुश कांनेरी कोशिश ना काता, पण आंउ परमेश्वरा खुश कांना चांहथा। अगर आंउ ऐम्हीं तेईनी मैहणुवां खुश काता भूंता, ता आंउ मसीहरा सेवक ना थ्या भूंणा।
पौलुस किहीं खास चैला बंणा
11हे मिंडै विश्वासी भाईयो, आंउ तुहां मैहणुवंनी ऐ शुणांणा चांहथा कि आंउ तुहां मैहणुवंनी विश्वास दिवांता कि, जै खुशखबरी मीं शुणाउरी आ, सैकेई मैहणुवां केरी तरफि किना ना। 12केईनी कि मीं ऐ खुशखबरी पूर्वजा किना ना शिख्रौरी, जां ना कुनिक्यै मैहणु मूंनी ऐ शिख्राउरी आ, बल्कि ऐपु यीशु मसीह मूं पन प्रकट क्यौरी आ।
13-14विश्वासी भाईयो तुवे जांणतै कि जेख्णी आंउ यहूदी धर्मेरा पालन काता ऐ थ्या, ता केतिया जीवन जिईंथ्या। मिंडै बड़ै साउगी जै मिंडियै उम्रिरै थ्यै, सै बि यहूदी धर्मेरा पालन करींथ्यै, पण आंउ तैन्हांं सभनियांं किना बड़ा आघै थ्या। केईनी कि आंउ अपड़ा पूर्वजा केरै रीति- रिवाजा केरा पूरै दिल सिंउ पालन करींथ्या। तैस टैंमा आंउ कलीसियेरै मैहणुवां जै परमेश्वरेरी अराधना करींथ्यै, तैन्हांं सतांणेरै तेईनी पूरी तराहि सिंउ डटौरा थ्या, मीं तैन्हांं सभनियांंनि नष्ट कांनेरी कोशिश की।
15-16पण तेख्णी परमेश्वरै फैसला क्यौरा थ्या, कि अपड़ै पुत्रा मूं पन प्रकट करिया, ताकि आंउ होरनियां जातिया केरै बिच यीशुरै बारै मझ खुशखबरी शुणा सकूँ। परमेश्वर-ऐ आ, जेनि आंउ मिंडै जंमणा किना पेहिलै चुणौरा जां अपड़ै अनुग्रहरै कारण तेनी आंउ अपड़ि सेवा कांनेरै तेईनी शदा। जेख्णी यीशु अपांणा मूं पन प्रकट केया, ता आंउ सलाह लींणेरै तेईनी कोस किनि ना ग्या। 17जां जै मूं किना पेहिलै खास चैलै थ्यै, तैन्हांं सिंउ मिलणनी आंउ यरूशलेम शहरा मझ ना ग्या; बल्कि आंउ तुरन्त अरब देशानि चलि ग्या जां तेठां किना दुबारे दमिश्क शहरानि वापस चलि या।
18फिरी त्रियां साला बाद आंउ कैफा यानि पतरस जै अक खास चैला थ्या, तैस सिंउ मिलणेरै तेईनी यरूशलेम ग्या, जां तैस किनि पन्द्रह धियाड़िया तेईनी रिय्हा। 19तैस टैंमा मिंडै बोलै सिर्फ तैस खास चैलै सिंउ मिलियु, जै प्रभु यीशुरा भाई याकूब थ्या। 20परमेश्वरा पता, कि जै आंउ तुहांनि लिखता, सैक्यु पूरी तराहि सिंउ सच आ। 21यरूशलेम शहरा मझ तैन्हांं खास चैला सिंउ मिलणा किना बाद आंउ सीरिया जां किलिकिया प्रदेशनी ग्या। 22पण मसीह मझ विश्वासी जै यहूदिया प्रदेशा मझ रींहथै, सैक्यै मूं कदि मेऔरै ना थ्यै। 23पण सैक्यै शुणतै रिय्है, कि “अक टैंम जै असु सताईंथ्या, अबै सैहै तैस विश्वासेरी खुशखबरिरा प्रचार काता, जैस सै नष्ट कांनेरी कोशिश करींथ्या।” 24जां ऐठणीरै तेईनी सैक्यै परमेश्वरेरी महिमा कातै, केईनी कि तेनी आंउ अक संताणै बाऐ किना मसीहरै चेलैरै रूपा मझ बदली दितौरा।
Currently Selected:
गलातियों 1: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
